បើក​អ៊ីនធឺណិត​​ iPhone អត់​ចេះ​ពាក្យ​ណាមួយ ចុច​តែ​មួយ​ប៉ក​ចេញ​អត្ថន័យ​បាត់ (មិន​ Jailbreak)

iPhone បំពាក់ iOS ជំនាន់​ក្រោយៗ តែង​មាន​មុខងារ​វចនានុក្រម​មក (Dictionary) ​ជាមួយ ងាយ​ស្រួល​ក្នុង​ការ​ស្វែង​រក​អត្ថន័យ​នៃ​​រាល់​ពាក្យ​ភាសា​អង់គ្លេស​លើ​គ្រប់​វិបសាយ ដែល​អ្នក​មិន​ចេះ។

ឧទាហរណ៍​ពេល​អ្នក​បើក​វិបសាយ​ភាសា​អង់គ្លេស​ណាមួយ លើ​រាល់ Browser ក្នុង iPhone ហើយ​មិន​យល់​អត្ថន័យ​នៃ​ពាក្យ​ពិបាក​ណាមួយ​ អ្នក​គ្រាន់​តែ​ចុច​លើ​ពាក្យ​នោះ​ឲ្យ​យូរ នោះ​នឹង​ឃើញ​ ​ផ្ទាំង​មួយ​បង្ហាញ​មុខងារ​ដូចជា៖

• Copy ៖ សម្រាប់​ចម្លង​ពាក្យ (Copy)
• Share ៖ យក​ពាក្យ​ដែល​បាន​ជ្រើសរើស​នោះ​ទៅ​​ចែក​រំលែក​ឬ​ប្រើ​​ទៅ​លើ​ Message, Note, Mail និង​បណ្តាញ​សង្គម​ជា​ដើម វា​លឿន​មិន​បាច់​ច្រើន​តង់​ដូច​មុខងារ Copy ឡើយ។
• Look Up/Translate ៖ Browser ភាគច្រើន​ដូចជា Safari, Chrome និង Google ជា​ដើម តែង​​បង្ហាញ​ពាក្យ Look Up តែ​ចំពោះ UC Browser បង្ហាញ Translate។ ចុច​លើ​ពាក្យ Look Up/Translate អ្នក​នឹង​ឃើញ​អត្ថន័យ​សម្រាយ​នៃ​ពាក្យ ពិបាក​ដែល​អ្នក​មិន​ចេះ​នោះ។ បន្ទាប់​មក ចុច​លើ​សញ្ញា​ព្រួញ​នៅ​ខាង​ស្តាំ​នៃ​ពាក្យ​នោះ ដើម្បី​មើល​អត្ថន័យ​​​​​និង​ការ​ប្រើប្រាស់​​ពាក្យ​ពេញ​លេញ។

ដើម្បី​​ទទួល​បាន​អត្ថន័យ​នៃ ពាក្យ​ទាំង​អស់​លើ​អ៊ីនធឺណិត អ្នក​ត្រូវ​ចូល​ទៅ​កាន់ Settings > General > Dictionary ហើយ​ចុច​ធីក​លើ British English/American English បើ​អ្នក​ចង់​បាន​អត្ថន័យ​ជា​ភាសា​អង់គ្លេស។

ប៉ុន្តែ​បើ​អ្នក​ចង់​បាន​អត្ថន័យ ជា​ភាសា​ផ្សេង​ ធ្វើ​តាម​វិធី​ដូចគ្នា ហើយ​ត្រូវ​ចាំ​បន្តិច​រហូត​ទាល់​តែ iPhone ទាញ​យក​ភាសា​នោះ​រួច​រាល់។ *ចំពោះ​ភាសា​ខ្មែរ​ នៅ​មិន​ទាន់​​ដាក់​បញ្ចូល​​ក្នុង​មុខងារ​នេះ​នៅឡើយ​ទេ៕