iPhone កំណត់​​មុខងារ​សំងាត់​នេះ ទាល់តែយូរ​បាន​អ្នក​ផ្សេង​ធ្វើ​អី​ទូរសព្ទ​អ្នក​កើត

Restrictions លើ iPhone ជា​មុខងារ​សំខាន់​និង​មាន​ប្រយោជន៍​មួយ ដែល​អ្នក​ប្រើប្រាស់​ភាគ​ច្រើន មើល​រំលង។

មុខងារ​នេះ មាន​ប្រយោជន៍​ខ្លាំង​បំផុត ដែល​អាច​ឲ្យ​ម្ចាស់ iPhone អាច​កំណត់​សិទ្ធិ​ចូល​ប្រើប្រាស់​កម្មវិធី​និង​មុខងារ​សំខាន់ ពី​ភាគី​ទី​ពីរ ពិសេស​គឺ​ទប់​ស្កាត់​ការ​ចូល​វិបសាយ​ផ្ដេសផ្ដាស។ ក្នុង​ករណី​មិត្តភ័ក្ដិ​ឬ​កូនៗ​ឧស្សាហ៍​យក iPhone អ្នក​ទៅ​លេង អ្នក​អាច​កំណត់​សិទ្ធិ​ដល់​​ពួកគេ កុំ​ឲ្យ​ប្រើ​ទូរសព្ទ​តម្លៃ​​ខ្ទង់​ពាន់​ដុល្លារ របស់​អ្នក​ហួស​​ដែន​កំណត់។

ដើម្បី​កំណត់​មុខងារ​នេះ ចូល​ទៅ​កាន់ Settings > General > Restrictions ហើយ​វាយ​លេខ​កូដ​ដែល​អ្នក​ចង់​បាន។

អូស​មក​ក្រោម រក​មើល​ពាក្យ Websites ហើយ​ចុច​លើ​ពាក្យ​​នេះ។ អ្នក​នឹង​ឃើញ​ជម្រើស​បី​ក្រោម ALLOWED WEBSITES៖

• All Websites៖ អនុញ្ញាត​ឲ្យ​បើក​គ្រប់​វិបសាយ​ទាំងអស់។
• Limit Adult Content៖ ត្រង់​នេះ​ អ្នក​នឹង​ឃើញ​មុខងារ​ពីរ​គឺ ALWAYS ALLOW និង NEVER​ ALLOW។ ត្រង់ NEVER ALLOW ចុច​ Add a Website ហើយ​វាយ​វិបសាយ​អាសអាភាស​ឬ​វិប​ណាមួយ​ ដែល​អ្នក​មិន​ចង់​ឲ្យ​អ្នក​ដទៃ​បើក​ផ្តេសផ្តាស​លើ iPhone អ្នក។
• Specific Websites Only៖ ត្រង់​នេះ អ្នក​អាច​ចុច​​ពាក្យ Edit នៅ​ជ្រុង​ខាង​លើ​ផ្នែក​ខាង​ស្តាំ ហើយ​ចុច​លើ​សញ្ញា (-) ពណ៌​ក្រហម ហើយ​ចុច​ Delete បើ​ចង់​ឲ្យ អ្នក​ដទៃ​បើក​វិបសាយ​នោះ​បាន បើ​រួច​ហើយ​ចុច Done។ អូស​ទៅ​ក្រោម ចុច​លើ​ពាក្យ Add a Website ហើយ​​អាច​កំណត់​ចំនួន​វិបសាយ ដែល​អ្នក​ចង់​ឲ្យ​តែ​​បើក​មើល​បាន​លើ iPhone អ្នក។

បញ្ជាក់៖ ត្រង់​នេះ វា​នឹង​កំណត់​លើ​រាល់ Browser លើ​ iPhone មិន​ថា​តែ​ Safari ឡើយ។

នៅ​ផ្នែក​ខាង​លើ​បង្អស់​អ្នក​នឹង​ឃើញ Safari, Camera, Siri Dictation ជាដើម។ ក្នុង​ករណី​អ្នក​ផ្សេង​យក​ទូរសព្ទ​អ្នក​ទៅ​ប្រើ ហើយ​អ្នក​មិន​ចង់​ឲ្យ​ពួកគេ​ប្រើ​កម្មវិធី​ទាំងនេះ អាច​ចុច​បិទ​ (OFF) លើ​កម្មវិធី​ណាមួយ​ដែល​ចង់​បាន នោះ​កម្មវិធី​នោះ​នឹង​បាត់​ពី iPhone អ្នក។ បើ​ចង់​ឃើញ​វិញ គ្រាន់​តែ​ចុច​បើក (ON)។

អូស​មក​ក្រោម ឃើញ Installing Apps, Deleting App, In-App Purchases។ ត្រង់​កន្លែង​នេះ អ្នក​អាច​ចុច​បិទ ដើម្បី​កុំ​ឲ្យ​អ្នក​ផ្សេង អាច​ដំឡើង​កម្មវិធី​ លុប​កម្មវិធី និង​ទិញ​កម្មវិធី​លើ iPhone អ្នក​ដោយ​គ្មាន​ការ​អនុញ្ញាត។ ពេល​បិទ (OFF) App Store នឹង​បាត់​ពី iPhone ហើយ​គ្មាន​អ្នក​ណា អាច​លុប​កម្មវិធី​គ្រប់យ៉ាង​លើ iPhone អ្នក​បាន​ឡើយ។ បើ​ចង់​ប្រើ​វិញ គ្រាន់​តែ​ចុច​​បើក (ON)។

បើ​មិន​ចង់​ឲ្យ​​នរណា​ប៉ះពាល់​លើ​គណនី iCloud អ្នក ក្រែង​មាន​បញ្ហា​ធ្ងន់​ក សូម​អូស​ទៅ​ខាង​ក្រោម​បង្អស់ ហើយ​រក​មើល​ពាក្យ Accounts រួច​ចុច​ធីក​យក Don't Allow Changes។ ពេល​នោះ គ្មាន​អ្នក​ណា​អាច​ទៅ​រញ៉េរញ៉ៃ​គណនី iCloud អ្នក​បាន​ឡើយ។ បើ​ចង់​ដោះ​វិញ ចុច​យក Allow Changes។

បិទ​មុខងារ Restrictions៖

បើ​ចង់​បិទ​មុខងារ Restrictions អូស​ឡើង​ទៅ​លើ ចុច​ពាក្យ Disable Restrictions ហើយ​វាយ​លេខ​កូដ​ ដែល​អ្នក​បាន​កំណត់​ដំបូង។