Khmer Techno Innovation: ចំណេះដឹងលើម៉ូតូ

Showing posts with label ចំណេះដឹងលើម៉ូតូ. Show all posts

Tuesday, August 8, 2017

ជិះម៉ូតូលេខអូតូ ដឹងប្រេងកាឡេប៉ុន្មានខែ ទើបគេដូរចេញម្ដង?

បើនិយាយពីប្រេងម៉ាស៊ីនម៉ូតូអូតូ អ្នកទាំងអស់គ្នា ប្រាកដជាបានធ្លាប់ដឹង និងធ្លាប់បានប្ដូរជារឿយៗ ប៉ុន្តែចំពោះប្រេងកាឡេ ដែលមានតួនាទីសំខាន់ជួយឲ្យដំណើរការនៃការមូលដុំម៉ូតូដើរស្រួល មិនស្ទក់ បែរជាមិនសូវចាប់អារម្មណ៍ ទុករហូតដល់ខ្មៅ មិនបានប្តូរវាឲ្យបានទៀងទាត់នោះទេ។

ដើម្បីជួយឲ្យការតំហែទាំម៉ាស៊ីនម៉ូតូដំណើរការល្អលោក សីហា បានឲ្យដឹងថា ជាធម្មតា ៣ ខែទើបគេប្តូរប្រេងកាឡេម៉ូតូអូតូម្ដង។ តែប្រសិនបើម៉ូតូអ្នកមិនសូវជិះឆ្ងាយប៉ុន្មាននោះទេ គ្រាន់តែចាំថា ប្ដូរប្រេងម៉ាស៊ីន ៣ ដងទើបប្តូរប្រេងកាឡេម្តង ការធ្វើដូចនេះជួយឲ្យម៉ូតូស្ទុះលឿន មិនយ៉ុងម៉ាស៊ីន។

បើដូរប្រេងម៉ាស៊ីនម្ដង ហើយប្រេងកាឡេម្ដង បានទេ? លោកបាននិយាយថា មិនចាំបាច់ដល់ថ្នាក់ហ្នឹងទេ! ប្រេងកាឡេ មិនប្តូរក៏នៅតែម៉ូតូរត់បានធម្មតា តែបើមិនប្តូរប្រេងម៉ាស៊ីនទើបជារឿងធំ។
អ្នកជំនាញរូបនេះ បានសង្កត់ធ្ងន់ថា បើអ្នកមិនចាប់អារម្មណ៍ប្ដូរប្រេងកាឡេសោះ វាប៉ះពាល់ដល់ម៉ាស៊ីនម៉ូតូ និងដំណើរការរត់របស់ម៉ូតូដូចជា កាលណាអស់ជាតិប្រេងរំអិលកាឡេ ធ្វើឲ្យម៉ូតូស៊ីសាំងខ្លាំងជាងមុន ព្រោះថាវាប្រឹងតែម៉ាស៊ីន ចំណែកឯល្បឿនមិនសូវស្ទុះខ្លាំង ហើយឮសំឡេងខ្លាំងៗទៀតផង។

ការប្ដូរប្រេងម៉ាស៊ីន ប្រេងហ្វ្រាំង ប្រេងច្រវ៉ាក់ និងប្រេងកាឡេម៉ូតូនេះ ជាជម្រើសល្អបំផុតមួយក្នុងការថែទាំឲ្យម៉ាស៊ីនម៉ូតូនៅតែស្ទុះល្អ ហើយចំពោះតម្លៃនៃការប្ដូរម្ដង មិនសូវជាថ្លៃណាស់ណាទេ ពោលគឺប្រេងម៉ាស៊ីន ប្រេងហ្វ្រាំង ប្រេងច្រវ៉ាក់ ប្រេងកាឡេ នឹងទឹកស្អំជាដើមអស់ប្រហែលជា ១៣ ឬ ១៥ ដុល្លារប៉ុណ្ណោះ៕

វិធីធ្វើឲ្យអ្នកលក់ ហ៊ានទិញម៉ូតូមួយទឹកក្នុងតម្លៃខ្ពស់

វិធីក្នុងការលក់ម៉ូតូមួយទឹកចេញ មិនឲ្យខាតច្រើន មានប្រិយមិត្តខ្លះបានដឹងរួចមកហើយ តែចំពោះរបៀបក្នុងការធ្វើយ៉ាងណាឲ្យគេទិញម៉ូតូដែលធ្លាប់ប្រើហើយ ក្នុងតម្លៃមួយអាចទទួលយកបាន។

ដើម្បីជួយឲ្យប្រិយមិត្តលក់ម៉ូតូមួយទឹកឲ្យអ្នកទិញ-លក់បន្ត បានតម្លៃខ្ពស់ដែលអាចទទួលយកបាន លោក សីហា អ្នកលក់ម៉ូតូមួយកន្លែង បានបង្ហាញគន្លឹះសំខាន់ៗមួយចំនួនដូចខាងក្រោម៖

៖ ម៉ូតូនៅស្អាត ៨៥ ទៅ ៩០ ភាគរយ

ចំណុចនេះ សំដៅដល់ម៉ូតូដែលមានម្ចាស់ជាអ្នកស្រលាញ់ម៉ូតូ ហើយជាអ្នកថែទាំម៉ូតូទៀងទាត់ មិនធ្លាប់ប៉ះពារអ្វីមួយធ្ងន់ធ្ងរ សំឡេងម៉ាស៊ីនម៉ូតូនៅស្ងាត់ល្អ មិនលាន់ មិនកាន់ច្រេះ ធ្វើឲ្យអ្នកលក់ហ៊ានឲ្យតម្លៃមួយដែលអាចទទួលយកបាន។

៖ ម៉ូតូដើម មិនកែ

ជាធម្មតា ម៉ូតូកែ តែងមានចំណុចខុសគ្នាពីម៉ូតូដើម គ្រាន់តែមើលមួយភ្លែតក៏ដឹងដែរ ទោះជាកែតិចឬច្រើនក៏ដោយ ដូចនេះទោះជាម៉ាស៊ីននៅថ្មីល្អ ក៏អ្នកលក់មិនហ៊ានឲ្យថ្លៃខ្ពស់ដែរ ព្រោះត្រូវការយកទៅដូរដាក់ខោអាវដើម(របាំងខាងមុខ-ក្រោយ) ដើម្បីដាក់លក់វិញ។

៖ ម៉ូតូជិះអស់គីឡូតិច

សំដៅដល់រយៈចម្ងាយនៃការបើកបរដែលមាននៅលើកុងទ័រម៉ូតូ។ ចំណុចនេះ ចង់និយាយពីកុងទ័រម៉ូតូ ទោះជាអ្នកកែកុងទ័រ ឬច្នៃថ្មីបន្ថែមឲ្យលេខគីឡូតិចជាងមុន ឬកែឲ្យម៉ូតូដែលគេជិះជិតៗក៏អាចមើលដឹងដែរ។ របៀបមើលម៉ូតូដែលជិះអស់គីឡូច្រើន គេមើលទៅលើសំបុកអ៊ែរ ឬច្រវាក់មីញ៉ុងជាដើម។ បើមានបំណងចង់លក់ម៉ូតូ កុំកែកុងទ័រឲ្យសោះ ព្រោះនេះជាទង្វើមិនគួរគប្បីទេ វាប៉ះពាល់ដល់ទំនុកចិត្តអ្នកទិញក្រោយៗ ហើយអ្នកក៏មិនអាចយកម៉ូតូទៅលក់បានលើកទីពីរដែរ។

៖ ម៉ូតូធ្លាប់មានប្រវត្តិដួល ឬប៉ះគ្នា ឬអត់?

ជិះម៉ូតូនរណាក៏ធ្លាប់ដួលដែរ គ្រាន់តែទំហំនៃការប៉ះពាល់ដល់ការខូចខាតលើម៉ូតូខុសគ្នា អ្នកខ្លះដួលដល់ថ្នាក់បែកខ្ទេច អ្នកខ្លះដួលត្រឹមបែកបាក់អាវម៉ូតូខាងក្រៅប៉ុណ្ណោះ ទោះយ៉ាងនេះក្តី អ្នកទិញ-លក់គេនៅតែមានរបៀបមើលប្រវត្តិម៉ូតូអ្នកដែរ ដោយមើលលើប្រព័ន្ធសុវត្ថិភាព ប្រព័ន្ធហ្រ្វាំង សង់ត្រេម៉ូតូ(ម៉ូតូរៀចក ឬវៀចដៃចង្កូត) ជាដើម។ ដូចនេះបើអ្នកចង់លក់ម៉ូតូដែលធ្លាប់មានប្រវត្តិបាក់បែក ឲ្យបានតម្លៃសមរម្យ អ្នកត្រូវសម្រេចចិត្តចូលជាងប្ដូរគ្រឿងបន្លាស់ថ្មី ប៉ូលាទឹកថ្នាំថ្មី ឬជួសជុលកុំឲ្យមានរៀចក ឬវៀចឈ្នាន់។

៖ ដាក់តម្លៃលក់តាមតម្លៃទីផ្សារ

បើអ្នកដឹងថា ម៉ូតូអ្នកនៅល្អអាចលក់បានតម្លៃរាងគ្រាន់បើដែរ សូមកុំកាត់ថ្លៃខ្ពស់ពេក ត្រូវលក់ក្នុងតម្លៃជាក់ស្ដែង ជាធម្មតាអ្នកទិញ-លក់ គេប្រាកដជាបង្អាប់ទម្លាក់តម្លៃម៉ូតូអ្នកខ្លះហើយ តែក៏មិនមែនគេមិនទិញដែរ ហើយការបង្អាប់ក៏មិនមែនគ្រប់អ្នកលក់ទាំងអស់ដែរ គ្រាន់តែគេតថ្លៃខ្លះ ដើម្បីទុកលុយជួសជុល ឬលាងសម្អាតដាក់លក់វិញ។

៖ មានឯកសារសម្គាល់ម្ចាស់ម៉ូតូត្រឹមត្រូវ

ចំណុចនេះ អ្នកទិញម៉ូតូរូបណា ក៏ចង់បានដែរ ដើម្បីជៀសវាងការទិញប៉ះចំម៉ូតូខុសច្បាប់(ម៉ូតូចោរ)។ ការដែលអ្នកមានឯកសារសម្គាល់ម្ចាស់ម៉ូតូត្រឹមត្រូវ ក៏ជាចំណែកមួយធ្វើឲ្យអ្នកលក់ហ៊ានឲ្យតម្លៃខ្ពស់ ព្រោះឯកសារទាំងនោះត្រូវការពេលវេលា និងប្រាក់កាសច្រើនគួរសម ទំរាំបានចេញយកមកប្រើប្រាស់ ដូចនេះអ្នកគួរតែភ្ជាប់មកជាមួយឯកសារទាំងនោះ(កាតគ្រី អត្តសញ្ញាណប័ណ្ណ សៀវភៅស្នាក់នៅ ជាដើម ) ពេលដែលចង់លក់ម៉ូតូចេញ។

៖ ប្រើពាក្យសម្ដីសមរម្យ

អ្នកដែលបំណងចង់លក់ម៉ូតូ តែងបារម្ភខ្លាចអ្នកទិញបន្ត(អ្នកទិញ-លក់) កឹបកេងស៊ីចំណេញលើខ្លួន ជាហេតុធ្វើឲ្យពួកគេ បោះពាក្យសម្ដីដៀមដាម ផ្លែផ្កា និងប្រៀបធៀបពីកន្លែងមួយទៅកន្លែងមួយ ដើម្បីឲ្យតម្លៃម៉ូតូដែលខ្លួនចង់លក់បានថ្លៃ។ បើអ្នកមានគំនិតបែបនេះ សូមបញ្ឈប់ទៅ។ អ្នកទិញ-លក់ម៉ូតូ មិនមែនសុទ្ធអាក្រក់ កឹបកេងទាំងអស់នោះទេ ពួកគេបើកកន្លែងរកស៊ីមិនមែនលក់តែម្ដងហើយឈប់នោះទេ ដូចនេះអ្នកគួរនិយាយដោយការគោរពគ្នាទៅវិញទៅមក ទើបជាការល្អ បើអ្នកគោរពគេ គេនឹងគោរពអ្នកវិញ ហើយដំណើរការទិញ លក់ក៏រលូនទៅតាមនឹងដែរ។

៖ ត្រូវមានភាពស្មោះត្រង់

អ្នកលក់ក៏ជាមនុស្ស ហើយអ្នកទិញក៏ជាមនុស្ស ដូចនេះភាពស្មោះត្រង់ មិនបោកប្រាស់ជារឿងល្អបំផុត។ អ្នកយកម៉ូតូមកលក់ ហាក់ដូចជាផ្សព្វផ្សាយផលិតផលដែលខ្លួនមាន ឲ្យគេចាប់អារម្មណ៍ បើអ្នកផ្សព្វផ្សាយផលិតផលដោយពាក្យពិត អ្នកទិញប្រាកដជាទិញដោយទំនុកចិត្ត និងមិនសូវតថ្លៃច្រើនផងដែរ៕

ឡាន ម៉ូតូថ្មីៗ មិនគួរប្រើសាំងស៊ុបពែ ព្រោះ ...

តើសាំងស៊ុបពែ (Premium) នឹងធ្វើឲ្យម៉ាស៊ីនយានយន្តអ្នកដំណើរការល្អមែនទេ? តើសាំងធម្មតា (Regular) អាចបំផ្លាញម៉ាស៊ីនអ្នកមែនទេ? នេះជាសំនួរទូទៅសម្រាប់អ្នកបើកបរ ដែលមានចម្លើយខុសៗគ្នា។ ដូច្នេះអ្នកគួរអានអត្ថបទខាងក្រោម ដែលអាចជួយអ្នកសម្រេចចិត្តក្នុងការប្រើប្រាស់ប្រភេទសាំងឲ្យត្រូវតាមបច្ចេកទេស។

ប្រេងសាំងត្រូវកំណត់ដោយស្តង់ដារ Octane៖

- ប្រភេទសាំងធម្មតាមាន ៨៧ ដល់ ៩២ octane
- ប្រភេទសាំងស៊ុបពែមាន ៩១ ដល់ ៩៥ octane

Octane ធានានូវភាពសាំរបស់ប្រេងសាំងទៅនឹង Preignition ដែលជាកំហាប់ឥន្ធនៈជាប់ស៊ីឡាំងម៉ាស៊ីនក្រោយចំហេះ ហើយ Octane កាន់តែខ្ពស់ កំហាប់កាន់តែតិចចំហេះកាន់តែខ្លាំង ខណៈអ្នកខ្លះជឿខុសថា ប្រេងសាំងដែលមាន Octane ខ្ពស់មានថាមពលដូចនឹងប្រេងសាំងដែលមាន Octane ទាប។

សាំងធម្មតា មានតម្លៃធូរថ្លៃ តែពុំមានកម្លាំងចំហេះខ្លាំងនោះទេ ដូច្នេះវាច្រើនតែប្រើជាមួយឡាន និងម៉ូតូថ្មី ឬប្រភេទយានយន្តបំពាក់ម៉ាស៊ីនមិនត្រូវការចំហេះឥន្ធនៈខ្លាំង។ ម្យ៉ាងទៀតសាំងធម្មតានឹងមិនធ្វើឲ្យម៉ាស៊ីនយានយន្តឆាប់ឡើងកម្ដៅឡើយ។

សម្រាប់សាំងស៊ុបពែរវិញ មានតម្លៃថ្លៃជាងសាំងធម្មតា ព្រោះមានចំហេះខ្លាំង ហើយស៊ីគ្នានឹងម៉ាស៊ីនឡាន និងម៉ូតូប្រភេទស្ព័រ ឬប្រើយូរឆ្នាំ មិនសូវស្ទុះ តែសាំងប្រភេទនេះអាចធ្វើឲ្យម៉ាស៊ីនឆាប់ឡើងកម្ដៅជាងការប្រើសាំងធម្មតា។

ដោយឡែកសម្រាប់រថយន្តក្នុងតំបន់អឺរ៉ុបប្រើសាំងស្តង់ដារ RON 95 ដល់ RON 98 ដែលស្មើ Octance 87 និង Octane 98 របស់អាមេរិក ខណៈបច្ចុប្បន្នទីផ្សារកម្ពុជាប្រើប្រាស់ស្តង់ដារអាមេរិក ដោយកំណត់ខ្នាត Octane៕

ប្រភព៖ Autotrader ប្រែសម្រួល ៖ ប៊ុន ធឿន

រឿងគួរដឹងខ្លះៗ ពីសាំងដែលចាក់ចូលយានយន្តរាល់ថ្ងៃ

ពីមួយខែទៅមួយខែអ្នកប្រើប្រាស់យានយន្តទាំងឡាយត្រូវចូលទៅស្ថានីយប្រេងឥន្ធនៈមិនចេះតិចដងដើម្បីចាក់បំពេញប្រេងឥន្ធនៈដល់ម៉ាស៊ីនយានយន្ត។ ធ្លាប់ឆ្ងល់ទេថាប្រេងឥន្ធនៈនេះមានប្រភពមកពីណា ហើយកើតចេញពីណា?

ប្រេងឥន្ធនៈគឺចម្រាញ់ចេញពីសារធាតុរាវដ៏ខាប់ពណ៌ខ្មៅដែលបូមចេញពីក្រោមដីដ៏ជ្រៅ ដោយសារធាតុនេះត្រូវបានគេហៅថាប្រេងកាតឆៅ។ សារធាតុរាវនេះមានផ្ទុកនូវអ៊ីដ្រូកាបូន ហើយអ៊ីដ្រូកាបូននេះដែរជាធាតុគីមីដែលផ្សំឡើងពីម៉ូលេគុលអ៊ីដ្រូហ្សែន និង កាបូន។ អ៊ីដ្រូកាបូននីមួយៗដែលមានក្នុងប្រេងកាតឆៅថែមទាំងមានផ្ទុកម៉ូលេគុលកាបូនក្នុងចំនួនខុសៗគ្នាទៀតផង ដូចនេះប្រេងកាតឆៅអាចប្រែក្លាយជាផលិតផលជាច្រើនមុខ។

ឧទាហរណ៍ថាម៉ូលេគុលកាបូនពី ១ ទៅ ៤ អាចបង្កើតបានជាឧស្ម័នមេតា, អេតាន, ប្រូប៉ាន និង ប៊ូតាន។ ចំណែកអ៊ីដ្រូកាបូនដែលមានកាបូនពី ៥ ទៅ ៧ អាចបង្កើតជាទឹកលាងសម្អាតស្ងួត (Dry Cleaning Fluid) និង ថ្នាំលាប។ ចំពោះប្រេងឥន្ធនៈដែលប្រើសម្រាប់យានយន្តធ្វើឡើងពីអ៊ីដ្រូកាបូនដែលមានម៉ូលេគុលពី ៧ ទៅ ១២។

អ៊ីដ្រូកាបូនដែលមានកាបូនច្រើនជាង ១២ ប្រើសម្រាប់ផលិតប្រេងឥន្ធនៈធន់ធ្ងន់រួមមានប្រេងសម្រាប់ចង្កៀងប្រេងកាត, ប្រេងម៉ាស៊ូត, ប្រេងកម្ដៅ និង ប្រេងម៉ាស៊ីន ជាដើម។ អ្នកវិទ្យាសាស្ត្រអាចបំបែកអ៊ីដ្រូកាបូនដែលមានកាបូនខុសៗគ្នាតាមរយៈការចំហុយយកចំហាយ ព្រោះកាបូនដែលមានកាបូនខុសៗមានចំណុចពុះខុសៗគ្នា។

ការចំហុយធ្វើឡើងនៅរោងចក្រចម្រាញ់ប្រេង។ ពេលប្រេងកាតឆៅត្រូវបានចំហុយ ប្រភេទអ៊ីដ្រូកាបូនដែលមានចំនួនកាបូនខុសៗគ្នាត្រូវបានទាញចេញតាមរយៈចំហាយដែលភាយចេញ។ បន្ទាប់ពីឆ្លងកាត់ការចំហុយនេះប្រភេទប្រេងឥន្ធនៈដែលគេចង់បានត្រូវផលិតឡើងដោយឆ្លងកាត់ដំណាក់កាលមួយចំនួនទៀត។

ពេលដែលប្រេងឆៅបានចម្រាញ់ទៅជាប្រេងឥន្ធនៈរួច ជាធម្មតាគេបូមយកវាទៅកន្លែងផ្ទុកតាមរយៈបំពង់ទុយយោធំៗ។ ពីកន្លែងផ្ទុកនេះហើយដែលរថយន្តធំៗអាចមកដឹកយកបន្តបានដើម្បីចែកចាយទៅតាមស្ថានីយប្រេងឥន្ធនៈតាមតំបន់៕

ចង់លក់ម៉ូតូមួយទឹកចេញ កុំឲ្យខាតច្រើន អានអត្ថបទនេះទៅ

ជាធម្មតា ម៉ូតូដែលអូសចេញពីហាង យកមកប្រើហើយ តម្លៃមិនដូចរបស់ថ្មីនោះទេ តែងធ្លាក់ចុះតាមហ្នឹងដែរ ហើយបើចង់លក់ចេញវិញ ភាគច្រើនក៏ទទួលបានតម្លៃទាប។ មានចំណុចជាច្រើនដែលអ្នកទាំងអស់គ្នាគួរដឹង មុនប្រុងលក់ម៉ូតូចេញ។

ដើម្បីជួយឲ្យប្រិយមិត្តលក់ម៉ូតូចេញបានតម្លៃមួយដែលអាចទទួលយកបាន មិនទាបពេក និងមិនសូវខាតច្រើន លោក ហែម សីហា អ្នកលក់ម៉ូតូមួយកន្លែង បានបង្ហាញគន្លឹះសំខាន់ៗមួយចំនួនដូចខាងក្រោម៖

១៖ លក់ចេញឲ្យចំពេលវេលា

ចំណុចនេះ សំដៅទៅលើរយៈពេលដែលស៊េរីម៉ូតូមួយៗ ចេញលក់លើទីផ្សារ ដូចនេះបើចង់លក់ត្រូវគិតដល់ស៊េរីថ្មីដែលជិតនឹងចេញលក់។ ឧទាហរណ៍៖ Zoomer X ស៊េរី ២០១៧ នឹងចេញលក់លើទីផ្សារចុងឆ្នាំ ២០១៦ ខែតុលា ឬវិច្ឆិការជាដើម អឹចឹង! បើអ្នកជិះ Zoomer X ស៊េរី ០១៥ ឬ ០១៦ មានបំណងចង់លក់ ត្រូវលក់មុននឹងបន្តិច អាចថាមួយខែមុន ឬពីរទៅបីខែមុន ឬនិយាយឲ្យខ្លីថា លក់ឲ្យបានមុនស៊េរីថ្មីចេញ បើចាំដល់អាថ្មីចេញ ចឹងម៉ូតូយើងត្រូវអ្នកលក់ឲ្យថ្លៃទាប។

២៖ លក់ឲ្យអ្នកជិះផ្ទាល់វិញ

ចំណុចនេះ សំដៅដល់ម៉ូតូដែលកំពុងជិះ តែអ្នកមានបំណងចង់លក់ចេញ ដូចនេះអ្នកត្រូវចេះស៊ើបសួរមិត្តភក្តិ បងប្អូន ឬអ្នកស្គាល់ណាក៏បាន ដែលគេមានចង់ទិញម៉ូតូជិះ រួចផ្សព្វផ្សាយ ឬនិយាយពីគុណភាពម៉ូតូរបស់អ្នកដោយភាពស្មោះត្រង់ មិនភូតភរ មិនបោកប្រាស់ ហើយលក់តាមតម្លៃទីផ្សារ ជាក់ស្ដែង មិនខ្ពស់ខ្លាំងពេក។

៣៖ លក់ឲ្យត្រូវនឹងតម្រូវការទីផ្សារ

សំដៅទៅលើភាពពេញនិយមរបស់ម៉ូតូ ឬម៉ាកម៉ូតូ។ ឧទាហរណ៍៖ ម៉ូតូដែលអ្នកជិះដូចជា Zoomer X, PCX, Click, MSX, Lets, Nex ឬហុងដាឌ្រីមជាដើម សុទ្ធតែជាម៉ូតូពេញនិយមដែលអាចលក់ចេញបានតម្លៃល្អ បើអ្នកជិះម៉ូតូម៉ាកផ្សេងដែលទីផ្សារមិនសូវនិយម ទោះជានៅថ្មី ៨០ ឬ ៩០ ភាគរយក៏មិនសូវបានថ្លៃណាស់ណាដែរ ព្រោះមិនសូវមានតម្រូវការខ្លាំង។

៤៖ លក់ម៉ូតូបែប Classic

ម៉ូតូបែប Classic នេះ ចង់សំដៅទៅលើម៉ូតូដែលល្បីពីជំនាន់មុនៗដូចជា Honda Cup, ម៉ូតូ BMW ជាដើម។ ប្រសិនបើអ្នកចង់លក់ម៉ូតូប្រភេទនេះ តម្លៃរបស់វានឹងឡើងខ្ពស់ ព្រោះជាម៉ូតូកម្រ ដែលអ្នកទិញភាគច្រើនជាអ្នកមានទ្រព្យ ដែលគេទិញវាយកទៅដាក់តាំងជាដើម។

៥៖ ឆែកមើលប្រព័ន្ធសុវត្ថិភាព ប្រព័ន្ធហ្រ្វាំងម៉ូតូមុនលក់

សំដៅលើការថែទាំ ការប្រើប្រាស់ម៉ូតូប្រចាំថ្ងៃដូចជា ឧស្សាហ៍ដូរប្រងម៉ាស៊ីន ឆែកមើលប្រព័ន្ធហ្រ្វាំង ស្បែកហ្វ្រាំង សំបកកង់ ច្រវាក់មីញ៉ុង ប្រព័ន្ធភ្លើង ស៊ីផ្លេ ស៊ីញ៉ូ ឬប្រេងម៉ាស៊ីនជាដើម ត្រូវដូរចេញប្រសិនបើមានករណីខូចខាតខ្លាំង (បើម៉ូតូលេខ ត្រូវចូលជាងឆែកមើលឲ្យបានល្អិតល្អន់) បើម៉ូតូអូតូ ត្រូវឲ្យគេប្តូរប្រេងកាឡេ ដើម្បីឲ្យការមូលដុំដំណើរការល្អ មិនស្ទក់ជាដើម។

៦៖ ការប្រើប្រាស់តិច

ចំណុចនេះ សំដៅលើការថែទាំម៉ូតូប្រចាំថ្ងៃ ដែលមានដូចជា គួរតែជិះឲ្យបានតិចគីឡូបំផុតតាមដែលអាចធ្វើបាន គុណភាពម៉ូតូនៅល្អ មិនបាក់បែកស្ដុប កន្ទុយក្រោយ ឬចង្កៀងមុខ-ក្រោយជាដើម៕
ទាំងនេះគ្រាន់តែចំណេះដឹងទូទៅខ្លះៗ ប្រសិនបើប្រិយមិត្តចង់បន្ថែមលើចំណុចណាផ្សេងទៀត អាចបញ្ចេញមតិនៅខាងក្រោមនេះបាន៕

ចុចលីងទីនេះ ដើម្បីមើលព័ត៌មានផ្សេងៗពីការប្រើប្រាស់ម៉ូតូ

Khmer Techno Innovation

Tuesday, August 8, 2017

ជិះម៉ូតូលេខអូតូ ដឹងប្រេងកាឡេប៉ុន្មានខែ ទើបគេដូរចេញម្ដង?

Tuesday, July 25, 2017

វិធីធ្វើឲ្យអ្នកលក់ ហ៊ានទិញម៉ូតូមួយទឹកក្នុងតម្លៃខ្ពស់

Friday, July 21, 2017

ឡាន ម៉ូតូថ្មីៗ មិនគួរប្រើសាំងស៊ុបពែ ព្រោះ ...

Thursday, July 20, 2017

រឿងគួរដឹងខ្លះៗ ពីសាំងដែលចាក់ចូលយានយន្តរាល់ថ្ងៃ

ចង់លក់ម៉ូតូមួយទឹកចេញ កុំឲ្យខាតច្រើន អានអត្ថបទនេះទៅ

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

Ordered List

Definition List

Sample Text

Labels

Khmer Techno Innovation

Tuesday, August 8, 2017

ជិះ​ម៉ូតូ​លេខអូតូ ដឹង​ប្រេង​កាឡេ​ប៉ុន្មាន​ខែ ទើប​គេ​​​ដូរ​ចេញ​ម្ដង?

Tuesday, July 25, 2017

វិធី​ធ្វើ​ឲ្យ​​អ្នកលក់​ ហ៊ាន​ទិញ​ម៉ូតូ​មួយ​ទឹក​ក្នុង​តម្លៃ​ខ្ពស់

Friday, July 21, 2017

ឡាន​ ​ម៉ូតូ​ថ្មី​​ៗ​ ​មិន​គួរ​ប្រើ​សាំង​ស៊ុបពែ​ ​​ព្រោះ ...

Thursday, July 20, 2017

រឿងគួរ​ដឹង​ខ្លះៗ​ ពី​សាំង​​ដែល​ចាក់​​ចូល​យាន​យន្ត​រាល់​ថ្ងៃ

ចង់​លក់​ម៉ូតូ​​មួយ​ទឹក​ចេញ កុំ​​ឲ្យ​ខាត​ច្រើន អាន​អត្ថបទ​នេះ​ទៅ​

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

ជិះម៉ូតូលេខអូតូ ដឹងប្រេងកាឡេប៉ុន្មានខែ ទើបគេដូរចេញម្ដង?

វិធីធ្វើឲ្យអ្នកលក់ ហ៊ានទិញម៉ូតូមួយទឹកក្នុងតម្លៃខ្ពស់

ឡាន ម៉ូតូថ្មីៗ មិនគួរប្រើសាំងស៊ុបពែ ព្រោះ ...

រឿងគួរដឹងខ្លះៗ ពីសាំងដែលចាក់ចូលយានយន្តរាល់ថ្ងៃ

ចង់លក់ម៉ូតូមួយទឹកចេញ កុំឲ្យខាតច្រើន អានអត្ថបទនេះទៅ