Khmer Techno Innovation: Phone Camera

Showing posts with label Phone Camera. Show all posts

Thursday, October 12, 2017

អ្នកប្រើ iPhone ចង់ថតរូបបានស្អាត កុំភ្លេច តិចនិកទាំង ១២ ក្បាច់នេះ

iPhone បានធ្វើកំណែទម្រង់លើកាមេរ៉ា និងផ្នែកផ្សេងៗជាបន្តបន្ទាប់ ដើម្បីឲ្យទាន់សម័យ បំពេញតម្រូវការអ្នកប្រើប្រាស់ ព្រមទាំងការប្រកួតប្រជែងផងដែរ។ បើអ្នកមាន iPhone ក្នុងដៃអ្នកគួរសាកល្បងអនុវត្តនូវគន្លឹះទាំង ១២ ខាងក្រោម ក្នុងការទាញផលប្រយោជន៍ពីកាមេរ៉ា iPhone ដើម្បីថតឲ្យកាន់តែមានប្រសិទ្ធភាព។

១. អ្នកគួរធ្វើការសម្អាត Lens និង គ្រាប់ Flash ឲ្យបានស្អាតជាមួយនឹងក្រណាត់ទន់ ដូចជាក្រណាត់ជូតវ៉ែនតាជាដើម។

២. អ្នកគួរប្រើប្រាស់ Grid បង្ហាញលើអេក្រង់ ដើម្បីដាក់ Subject ឲ្យត្រូវនឹងបន្ទាត់ប្រសព្វ ដែលជាការអនុវត្តគោលការណ៍ Rule of thirds។ អ្នកអាចបើកវាលើអេក្រង់ ដោយចូលក្នុងកម្មវិធី Settings > Camera > បើកនូវប៊ូតុងត្រង់ Grid។

៣. អ្នកគួរប្រើប្រាស់ Burst mode ដើម្បីផ្ដិតបានបណ្ដុំរូបភាពនៃសកម្មភាពផ្សេងៗ ដែលងាយស្រួលក្នុងការជ្រើសរើសមួយណាល្អប្រសើរ ដោយចុចឲ្យជាប់លើប៊ូតុង Shutter។

៤. អ្នកគួរផលិតរូបភាពដោយប្រើប្រាស់កាមេរ៉ាក្រោយ ព្រោះវាមានកម្រិតគុណភាពខ្ពស់, មានមុខងារទប់លំនឹង, អាចថតរូប Slow motion និងមាន Flash។ ចំពោះកាមេរ៉ាមុខល្អសម្រាប់ការថត Selfies និង FaceTime។

៥. អ្នកគួរប្រើប្រាស់ Flash តែសម្រាប់បំពេញ ស្រមោលប៉ុណ្ណោះ ដែលពេលមានពន្លឺពីក្រោយ Subject នោះ Subject នឹងប្រែងងឹត ដែលជាការល្អក្នុងការប្រើប្រាស់ Flash ដើម្បីបំពេញស្រមោលទាំងនោះ ឲ្យរូបភាពមានតុល្យភាព។

៦. កុំពឹងផ្អែកតែលើ Filter ព្រោះពេលខ្លះវាមិនអាចធ្វើឲ្យប្រសើរឡើងនូវរូបភាពមិនល្អនោះទេ។ អ្វីដែលសំខាន់គឺការថតរូបភាពឲ្យបានត្រឹមត្រូវល្អ។ អ្នកអាចសាកល្បងនូវកម្មវិធី Instagram, VSCO, PhotoShop, Enlight និង Snapseed។

៧. អ្នកគួរដឹងពេលប្រើប្រាស់ HDR (High dynamic range) ដែលធ្វើការបញ្ចូលនូវរូបភាពជាច្រើននូវកម្រិត Exposure ខុសគ្នា ដើម្បីទទួលបានភាពលម្អិត ជាពិសេសពេលទិដ្ឋភាពមានតំបន់ភ្លឺខ្លាំង និងងងឹតខ្លាំង។

៨. iPhone មាន Focal length ប្រហែល 31mm ហើយមិនអាចពង្រីកបាននោះទេលើ Lens វា។ អ្នកអាចសាកល្បងភ្ជាប់នូវ Lens បន្ថែមសម្រាប់ថតរូបបានច្រើនជាងនេះ ដែលមាន Wide-angle, macro និង Fish-eye។

៩. ពេលថតអ្នកគួរទៅជិតនឹង Subject ជៀសជាងពង្រីកពីចម្ងាយ ដែលអាចធ្វើឲ្យបាត់បង់ភាពច្បាស់។

១០. iPhone អាចធ្វើការ Focus និងកំណត់ Exposure ដោយស្វ័យប្រវត្តិដែលអាស្រ័យលើកត្តាផ្សេងៗជាច្រើន ប៉ុន្តែពេលខ្លះអ្នកត្រូវការកំណត់ដោយខ្លួនឯង ដោយចុចឲ្យជាប់លើអេក្រង់ ដើម្បី Focus និង អូសឡើង ឬចុះក្រោមដើម្បីកំណត់ Exposure ដែលត្រូវការងងឹត ឬភ្លឺ។

១១. អ្នកគួរប្រើប្រាស់ Tripod ដើម្បីទប់លំនឹងពេលចុចថតកុំឲ្យរង្គើ។ លើសពីនេះ អ្នកអាចប្រើប្រាស់ ប៊ូតុងលើកាស Apple ដើម្បីចុចថតពីចម្ងាយ កាត់បន្ថយកុំឲ្យកាមេរ៉ារង្គើ។

១២. អ្នកគួរប្រើប្រាស់ Tripod ព្រមទាំង Self-timer ក្នុងការកំណត់វិនាទីថត ដែលល្អសម្រាប់ការថតរូបជាក្រុម ដូច្នេះគ្មាននរណាម្នាក់បាត់ពីរូបភាពនោះទេ៕

កំហុសទាំង ១០ ចំពោះការថតរូបលើស្មាតហ្វូន ដែលគួរជៀសវាង

មនុស្សជាច្រើនបានថតរូបផ្សេងៗ ជាមួយនឹងបច្ចេកវិទ្យាកាមេរ៉ាលើស្មាតហ្វូនចង់មិនចង់ពេលថតរូបគឺបើកកម្មវិធីថតរូបតម្រង់ Subject ហើយចុចថតតែម្ដង។ អ្នកប្រហែលជាបានឆ្លងកាត់នូវលក្ខណៈដែលបានរៀបរាប់ខាងក្រោមមួយចំនួន ទន្ទឹមនឹងនេះអ្នកគួរពិនិត្យមើល និងស្វែងយល់ដើម្បីកែលំអដំណើរការរបស់អ្នកក្នុងការថតរូបភាពឲ្យមានគុណភាពល្អ។

១. ប្រើប្រាស់កម្មវិធីខុស

កំហុស៖ ប្រើប្រាស់តែកម្មវិធីថតរូបស្រាប់ៗដែលមានមកជាមួយប្រព័ន្ធ។
នៅលើ iOS App Store និង Google Play មាននូវកម្មវិធីថតរូបជាច្រើន ដែលផ្ដល់នូវជម្រើសកាន់តែច្រើនក្នុងការថតរូប។ អ្នកគួរធ្វើការសាកល្បងនូវបណ្ដាលកម្មវិធីថតរូបផ្សេងទៀត ដើម្បីស្វែងរកអ្វីដែលចំនឹងចំណង់ចំណូលចិត្ត សម្រាប់គុណភាពរូប។

២. គ្រប់គ្នាត្រូវការ Rule of Thirds

កំហុស៖ មើលរំលងនូវរូបមន្តជាមូលដ្ឋាននូវ Rule of Thirds។
អ្នកគួរធ្វើការបង្ហាញគំនូស Grid លើកម្មវិធីថតរូប ដែលមានគំនូសបីបណ្ដោយទទឹង ហើយពេលអ្នកធ្វើការថតរូបគួរពិនិត្យមើល Subject ឲ្យនៅចំណុចប្រសព្វឆ្វេង ឬស្ដាំ។ អ្នកមិនគួរដាក់ Subject ឲ្យនៅចំណុចកណ្ដាលនៃរូបភាពនោះឡើយ ដែលធ្វើឲ្យកាត់បន្ថយការចាប់អារម្មណ៍លើ Subject។

៣. Composition

កំហុស៖ Composition ជាអ្វីដែលអ្នកគួរតែស្វែងយល់ឲ្យបានល្អ។ វាទាក់ទងថាតើ មនុស្សគួរឈរកន្លែងណា អ្នកចាប់ថតពីមុំណា ហើយសូម្បីតែរបៀបក្នុងការកាន់កាមេរ៉ា។ ការទាញកាមេរ៉ាចេញមក ហើយថត បន្ទាប់មកថតម្ដងហើយម្ដងទៀត វាជារូបមន្តសម្រាប់តែ DSLR ប៉ុណ្ណោះ មិនមែនសម្រាប់កាមេរ៉ាលើស្មាតហ្វូននោះទេ។

អ្នកគួរស្វែងយល់នូវ Composition ព្រោះរបៀបដែលអ្នកកំណត់ទីតាំង Subject មានសារៈសំខាន់ណាស់សម្រាប់រូបភាពអ្នក។ អ្នកគួរចេះប្រើប្រាស់នូវ Golden ratio, leading lines ព្រមទាំងការប្រើប្រាស់ផ្ទៃខាងមុខ និងផ្ទៃខាងក្រោយ។

៤. ប្រញាប់ថតពេក

កំហុស៖ ការទាញទូរសព្ទមក បើកកម្មវិធីថតរូប រួចថតតែម្ដង លឿនរហ័ស ប៉ុន្តែរូបភាពអាចនឹងព្រាល។ អ្នកមិនបានពិនិត្យមើលមនុស្សឈរយ៉ាងម៉េច មិនទៅជិត ឬបន្ទាបខ្លួន ឬកំណត់ Setting មិនប្រាកដលើកម្មវិធី សម្រាប់ការថត។

អ្នកគួរស្វែងយល់នូវកម្មវិធីថតរូបជាមុន ក្នុងការយល់ដឹងពីអ្វីដែលវាអាចធ្វើបាន ជារួមព្យាយាមកុំប្រើប្រាស់កម្មវិធី ឬកំណត់ Setting ណាដែលអ្នកមិនដឹងវាអ្វី។

៥. បើក Flash ចោល

កំហុស៖ Flash មានសារៈសំខាន់ក្នុងការថតរូប ជាពិសេសប្រសិនបើរូបភាពនោះងងឹត ដែលវាអាចបំពេញនូវស្រមោលដែលខ្វះបាន តែមិនល្អសម្រាប់ថតកន្លែងមានពន្លឺខ្លាំង។
អ្នកគួរជៀសវាងការប្រើប្រាស់ Flash តាមតែអាចធ្វើទៅបាន ព្រោះ កាមេរ៉ាលើ ស្មាតហ្វូន ទំនើបៗភាគច្រើនមាននូវ Low-light sensor ដ៏ល្អ។ សម្រាប់ករណីភាគច្រើន អ្នកមិនត្រូវការវានោះទេ ហើយប្រសិនបើអ្នកត្រូវការ ប្រហែលនោះមិនមែនជាពេលវេលា ឬទីកន្លែងដ៏ល្អនោះទេ ក្នុងការថតរូប។

៦. ប្រើប្រាស់នូវមុខងារ Zoom ឲ្យអស់លទ្ធភាព

កំហុស៖ អ្នកយល់ថាមុខងារ Zoom មានដំណើរការយ៉ាងល្អ ដែលអាចពង្រីកទៅកាន់ Subject បានជិតច្បាស់ល្អ។
អ្នកគួរជៀសវាងការប្រើប្រាស់មុខងារ Zoom ជារួមប្រើប្រាស់នូវកម្រិតពង្រីកដើមរបស់ Lens លើស្មាតហ្វូនប្រសិនបើអ្នកចង់ថតជិត អ្នកគួរទៅឲ្យជិតនឹង Subject ហើយថត។ បញ្ហានៃការ Zoom គឺធ្វើឲ្យបាត់បង់នូវគុណភាពនៃរូបភាព។

៧. ទាំងអស់គ្នាត្រូវការ Tripod

កំហុស៖ គ្មាននរណាម្នាក់ខ្វល់នឹងរូបភាពព្រាល ឬម្រាមដៃបង្ហាញក្នុងទិដ្ឋភាពរបស់ Lens នោះទេ។ កាមេរ៉ានៅនឹងល្អហើយថតនឹងដៃទៅបានហើយ។ ម្យ៉ាងទៀត Tripods ថ្លៃ ហើយពិបាកយកតាមខ្លួនទៀត។

អ្នកគួរប្រើប្រាស់នូវ Tripods ទោះជាវាពិបាកដាក់តាមខ្លួនបន្តិចមែន ប៉ុន្តែវានឹងធ្វើឲ្យគុណភាពរូបភាពមិនបាត់បង់។ អ្នកអាចជ្រើសរើសបានគ្រប់ទម្រង់ ទំហំ និងកម្រិតកម្ពស់ ដែលអ្នកចង់បាន ជារួមគឺអាចភ្ជាប់ស្មាតហ្វូនអ្នកបាន។

៨. ភ្លេចរក្សាកាមេរ៉ាឲ្យនៅនឹង

កំហុស៖ ការរង្គើពេលថតមិនអីទេ ហើយពេលថតគួរដកដង្ហើមចេញ។

ក្រៅពី Tripod អ្នកអាចដាក់ Device ផ្អែកនឹងជញ្ជាំង ឬកន្លែងផ្អែកណាដើម្បីរក្សាលំនឹង។ ម្យ៉ាងទៀតអ្នកអាចកាន់ដៃទាំងពីរពេលថត ប៉ុន្តែនៅតែអាចមានករណីរង្គើពេលអ្នកចុចប៊ូតុង Shutter ដូច្នេះ ប្រសិនបើកម្មវិធីថតរូបអាចកំណត់ពេលវេលាឲ្យថតបាន គួរប្រើប្រាស់វា។

៩. កាមេរ៉ា Settings

កំហុស៖ តម្រង់ហើយថត គ្រប់យ៉ាងនឹងដំណើរការដោយ
ស្វ័យប្រវត្តិ ដោយមិនចាំបាច់ប្រើប្រាស់ និងស្វែងយល់នូវ Settings មួយចំនួនដូចជា ISO និង Shutter speed ព្រោះគ្រាន់តែថតរូបធម្មតា មិនមែនអាជីពផង។

អ្នកគួរស្វែងយល់នូវ Settings លើកម្មវិធីថតរូប។ អ្នកមិនចាំបាច់រៀនពី Exposure triangle ប៉ុន្តែគួរដឹងថាទំនាក់ទំនងនៃ Aperture, ISO និង Shutter speed វាអាចកំណត់នូវគុណភាពរបស់រូបភាព។ ស្មាតហ្វូនចាស់មិនមានជម្រើសទាំងអស់នេះទេ តែអ្នកអាចពិចារណាលើ Focus និង White balance បាន។

១០. ភ្លេចរៀបចំពន្លឺ មិនអីទេ បច្ចេកវិទ្យាអាចសម្រួលបានគ្រប់យ៉ាង

កំហុស៖ ការប៉ះដោយផ្ទាល់នូវពន្លឺព្រះអាទិត្យ ពន្លឺតាមបង្អួច ឬពន្លឺដែលប្លាតពីប្រភពផ្សេងទៀត មិនមែនជាបញ្ហានោះទេ គ្មាននរណាម្នាក់សម្គាល់នោះទេ។

ការប្រើប្រាស់ពន្លឺជាផ្នែកមួយសំខាន់ណាស់ ដល់ការថតរូប។ អ្នកមិនគួរថតរូបនរណាម្នាក់ ដែលមានពន្លឺព្រះអាទិត្យនៅពីក្រោយពួកគេនោះ លុះត្រាតែអ្នកចង់ថតរូបលក្ខណៈ Silhouette។ ទីតាំងពន្លឺដែលជះលើ Subject មានសារៈសំខាន់ណាស់ក្នុងការពិចារណា។ ជារួម អ្នកគួរធ្វើតាមគោលការណ៍ Ps បី នៃការថតរូបលើស្មាតហ្វូនរួមមាន គម្រោង កំណត់ទីតាំង និងកំណត់ Settingsទុកជាមុន៕

គន្លឹះពេញលេញថតវីដេអូ Slo-Motion លើ iPhone ឲ្យបានត្រឹមត្រូវ

Slow-Motion ជាប្រភេទវីដេអូយឺតៗដែលយើងនិយមឃើញនៅតាមខ្សែភាពយន្តនៃឈុតឆាកពិសេសណាមួយ។ ថ្ងៃនេះ Sabay ណែនាំឲ្យចេះច្បាស់ពីគន្លឹះពេញលេញក្នុងការថតវីដេអូប្រភេទនេះឲ្យបានត្រឹមត្រូវនៅលើទូរសព្ទ iPhone។

+វិធីថតវីដេអូ Slo-Mo លើ iPhone

-ចូលទៅក្នុងកម្មវិធី Camera
-អូសមកស្ដាំរហូតដល់ឃើញមុខងារ Slo-Mo

-ផ្ដោតកាមេរ៉ាទៅចំកម្មវត្ថុដែលអ្នកត្រូវថត ហើយចាប់ផ្ដើមថតដោយចុចប៊ូតុងពណ៌ក្រហម (ករណីបើអ្នកចង់ថតរូបភាពណាមួយ អំឡុងពេលថតវីដេអូសូមចុចលើប៊ូតុងពណ៌សមាននៅផ្នែកខាងឆ្វេង)
-ក្រោយថតចាប់ សូមបញ្ចប់ដោយចុចប៊ូតុងពណ៌ក្រហមម្ដងទៀត នោះវីដេអូ Slo-Mo នឹងលោតស្វ័យប្រវត្តិចូលទៅក្នុងកម្មវិធី Photo របស់អ្នក។

+វិធីបើកមើលនិងកែច្នៃវីដេអូ Slo-Mo លើ iPhone:

-ចូលកម្មវិធី Photo > បើក Camera Roll

-រកវីដេអូ Slo-Mo ដែលអ្នកបានថត
-ចុចបើកមើលធម្មតា
-នៅផ្នែកខាងក្រោមវីដេអូស្ដាំដៃប៊ូតុង Start/Pause អ្នកឃើញបន្ទាត់ត្រេ ៣ ជាបន្ទាត់ថេរវេលាដែលអាចឲ្យយើងកាត់វីដេអូពីចំណុចចាប់ផ្ដើមទៅចំណុចបញ្ចប់ណាមួយតាមចិត្តរបស់អ្នក - ត្រង់កន្លែងដែលមានប្រឡោះធំ ជាវីដេអូ Slow Motion

-ក្រៅពីតំបន់នៃប្រឡោះធំនោះ ប្រភេទវីដេអូនឹងដំណើរការទៅធម្មតា
-ដើម្បីផ្លាស់ប្ដូរគ្រាន់ធ្វើការអូសឆ្វេងស្ដាំនៃបន្ទាត់
-ក្រោយកែច្នៃចប់ សូមចុច Done ជាការស្រេច។

+វិធីប្ដូរកម្រិត FPS នៃវីដេអូ Slo-Mo

កម្រិត FPS (Frame Per Second) ជាកម្រិតនៃវីដេអូយឺតដែលយើងថត បើទំហំ FPS កាន់តែខ្ពស់វីដេអូកាន់តែយឺត បើទំហំ FPS កាន់តែទាបវីដេអូកាន់តែលឿនទៅតាមហ្នឹងដែរ។

-ចូលទៅ Settings លើ iPhone
-អូសមកក្រោម រកពាក្យ Photo & Camera

-មើលត្រង់កន្លែង Record Slo-Mo (មានតែនៅលើទូរសព្ទ iPhone 6/6 Plus ឡើង)

-អ្នកអាចប្ដូរនូវកម្រិត ឧទាហរណ៍ 120fps ឬ 240fps

បើទោះបីជាការថតវីដេអូ Slo-Mo ជាការទាក់ទាញចំណាប់អារម្មណ៍ជាងវីដេអូធម្មតា ប៉ុន្តែទំហំផ្ទុកនៃការថតក៏ស៊ីធំដូចគ្នា។ បើអ្នកមិនមានអង្គផ្ទុកធំនោះទេ ក៏មិនគួរថតវីដេអូប្រភេទនេះច្រើនពេកដែរ ខណៈទំហំ 720p HD នៅកម្រិត 120fps ស៊ី 230MB ក្នុងមួយនាទី និង 240fps ស៊ី 300MB ក្នុងមួយនាទី។

ប្រើតែស្មាតហ្វូន ក៏ថតវីដេអូបានយ៉ាងឡូយ បើដឹងបច្ចេកទេសទាំងនេះ

ការដែលចង់ថតវីដេអូឲ្យបានស្អាតនៅលើស្មាតហ្វូន មិនមែនគ្រាន់តែលើកកាន់ថតធម្មតាៗ បាននោះទេ តែដរាបណាយើងត្រូវយល់ដឹងច្បាស់ពីតិចនិក និងវិធីសាស្ត្រមួយចំនួនជាមុន។ ថ្ងៃនេះ Sabay នឹងណែនាំពីគន្លឹះមួយចំនួន ដែលប្រិយមិត្តគួរស្វែងយល់ ដើម្បីអាចផលិតវីដេអូដោយស្មាតហ្វូនបានយ៉ាងទាក់ទាញ។

@សម្អាត Len កាមេរ៉ា

ស្ដាប់ទៅវាសាមញ្ញ ហើយគិតថាមិនពិបាកនោះទេ ប៉ុន្តែមនុស្សមួយចំនួនច្រើនតែងរំលងចំណុចនេះ។ មុនថតវីដេអូអ្វីមួយ គប្បីអ្នកប្រើប្រាស់គួររកកូនក្រណាត់សតូចមួយ ទៅជូតនៅលើរង្វង់គ្រាប់កាមេរ៉ា ដោយប្រើកម្លាំងថ្នមៗ ជៀសវាងមានការឆ្កូត ឬប៉ះទង្គិច។

@ធ្វើការកំណត់ Settings

ស្មាតហ្វូនទំនើបនាពេលបច្ចុប្បន្នមានការកំណត់នៅរបៀបរបបជាច្រើននៃការថតវីដេអូ ដោយពពួក Android មាននៅចំហៀងខាងស្កាំ រីឯ iPhone ត្រូវចូលទៅកាន់ Settings ផ្ទាល់។ ទំហំវីដេអូមានទៅតាមលក្ខខណ្ឌកំណត់របស់វា។
ក្នុងនោះជាទូទៅគេច្រើនប្រើនូវកម្រិត 1080p នៅលក្ខខណ្ឌ 24fps និង30fps ដែលស្តង់ដារនេះ សូម្បីតែការថតភាពយន្តខ្លះ ក៏គេរើសត្រឹម 30fps ដូចគ្នា ព្រោះរូបភាពមានលក្ខណៈរលូនទៅល្អ មិនលឿនពេក ហើយក៏មិនយឺតពេក។ ខុសពីប្រភេទចូលដល់ 60fps ដែលសម្រាប់ស្មាតហ្វូនស៊េរីទាបខ្លះមិនទាន់មានដល់នៅឡើយ ជាហេតុដែលគេលើកថាត្រឹម 30fps ជាចំណុចល្អបំផុត។

@Slow Motion

ត្រឹមកម្រិត 60fps ឬខ្ពស់ជាងនេះ ឡើងដល់ 120fps ឬ240fps វីដេអូនោះ ចូលបែបប្រភេទ Slow Motion ដែលយើងនិយមហៅថា វីដេអូយឺតៗ ។ បើស្មាតហ្វូនអ្នកអាចកំណត់បានដល់កម្រិត 120 ឬ240fps វាជាឱកាសល្អសម្រាប់អ្នកក្នុងការថតវីដេអូ Slow Motion បានយ៉ាងប្រសើរបំផុតជាងស្មាតហ្វូនស៊េរីទាបៗ។ ចំពោះកម្រិត 120fps ល្បឿនយឺតជាងកម្រិតធម្មតា ៥ ដង និង 240fps យឺតជាង ១០ ដង។

@វីដេអូ 4K

ការវិវត្តនៃបច្ចេកវិទ្យា បានធ្វើឲ្យស្មាតហ្វូនធន់ខ្ពស់ អាចថតវីដេអូដល់កម្រិត 4K តែមិនជារឿងល្អសម្រាប់អ្នកប្រើ ស្មាតហ្វូនទំហំ ១៦/៣២GB អ្វីនោះទេ ដរាបណាទំហំ ៦៤GB ឡើងទើបសក្ដិសម។ ទំហំផ្ទុកវីដេអូប្រភេទនេះគឺស៊ីធំមែនទែន ហើយខណៈកុំព្យូទ័រខ្លះ ដែលចង់បើកមើលវីដេអូ 4K ក៏មិនអាចដំណើរការបានផងដែរ។ ទទួលស្គាល់ថាគុណភាពបង្ហាញ វាធ្វើបានប្រសើរជាង ប៉ុន្តែក្នុងពេលនេះ យើងអាចថតត្រឹមកម្រិត 1080p គឺល្អបំផុត។

@មុខងារទប់លំនឹងរូបភាព

មុខងារទប់លំនឹងរូបភាពនៅពេលថតសម្រាប់ iPhone និងម៉ូដែល Galaxy ស៊េរីខ្ពស់គេហៅថា OIS (Optical Image Stabilization) និងពពួក Pixel របស់ Google គេហៅថា EIS (Electronic Image Stabilization) ប៉ុន្តែមានការទទួលស្គាល់ថា EIS អាចធ្វើបានល្អជាង OIS។ យ៉ាងណាមិញសូមបញ្ជាក់ថាមុខងារទាំងពីរ គឺមានគោលដៅតែមួយ ទប់លំនឹងស្ថិរភាពនៃការថត ហើយអ្នកក៏អាចប្រើកម្មវិធីជំនួយបង្កើតឡើងដោយក្រុមហ៊ុន Instagram គឺ Hyperlapse ជាដើម។

@ប្រើឧបករណ៍ជំនួយដើម្បីថតនឹងល្អ

ចំណុចដំបូងបើអ្នកមិនចង់ទិញឧបករណ៍ជំនួយ គឺអាចសាកល្បងថតដោយប្រើដៃទាំងពីរ ថ្កល់លើតុកាន់ជាប់ជាមួយស្មាតហ្វូនឲ្យនឹង។ ប៉ុន្តែបើលក្ខខណ្ឌនៃការថតខ្លះ ទាមទារឲ្យផ្លាស់ប្ដូរទីតាំងច្រើន អ្នកគួរតែទិញជើងទម្រមួយ (Tripod) ដែលមិនជាមានតម្លៃថ្លៃប៉ុន្មាននោះទេសម្រាប់ពពួកស្មាតហ្វូន។

@រកកន្លែងផ្ទុកឲ្យគ្រប់គ្រាន់

ករណីបើអ្នកសម្រេចថាថតវីដេអូដល់កម្រិត 4K ស្មាតហ្វូនមួយគ្រឿងរបស់អ្នក ប្រហែលជាផ្ទុកឯកសារទាំងនោះមិនបានគ្រប់គ្រាន់ឡើយ។ ដរាបណាយើងគួរប្រើប្រាស់សេវា Cloud រួមមានដូចជា Google Drive, iCloud ឬdropbox ជាដើម និងតាមរយៈការផ្ទេរឯកសារចូលកុំព្យូទ័រក៏បាន។ ផ្លាស់ប្ដូររបៀបនៃការថត
ជាការពិតណាស់សម្រាប់បណ្ដាញសង្គម Facebook, YouTube និង Vimeo អាចអនុញ្ញាតឲ្យអ្នក Upload វីដេអូដែលថតបែបបញ្ឈរ ប៉ុន្តែមិនប្រាកដថាអ្នកត្រូវធ្វើបែបនោះទេ។ តាមពិតទៅការថតវីដេអូដ៏ល្អមួយ គឺអ្នកគួរជ្រើសរើសថតបែបផ្ដេក Horizontal / landscape ទើបប្រសើរជាង។

@ប្រើកម្មវិធីជំនួយ

ក្រោយពីស្វែងយល់ច្បាស់ពីគន្លឹះមួយចំនួនខាងលើចប់អស់ហើយ អ្នកគួរដឹងពីកម្មវិធីជំនួយមួយចំនួនទៀតដែលយើងគួរប្រើប្រាស់ជាមួយវីដេអូរបស់យើង។ វីដេអូខ្លះ ខណៈទិដ្ឋភាពដែលថតចេញមានពណ៌មិនសូវស្រស់ស្អាត ម្ល៉ោះហើយយើងអាចធ្វើការបញ្ចូលនូវ Filters ជាច្រើន ឬកែច្នៃទៅតាមបែបបទដែលអ្នកពេញចិត្ត។ សម្រាប់ iOS អ្នកអាចប្រើ iMovie, Splice, Adobe Premiere Clip និង Filmic Pro ជាដើម ខណៈ Android មានដូចជា Power Director។

យ៉ាងណាមិញបើការរៀបរាប់ខាងលើ នូវមានចំណុចខ្វះខាត ឬប្រិយមិត្តមានមតិយោបល់ចង់បន្ថែមជាបទពិសោធន៍ផ្សេងទៀត សូមធ្វើការ Comment នៅខាងក្រោម៕

ប្រើ iPhone ថតរូប និងវីដេអូមិនចាញ់កាមេរ៉ាអាជីព បើស្គាល់មុខងារទាំងនេះច្បាស់

iPhone មានការនិយមប្រើប្រាស់ច្រើនពីគ្រប់ស្រទាប់វណ្ណៈ ព្រោះតែរូបរាងស្អាត និងល្បឿនដំណើរការ ហើយជាពិសេស គឺកាមេរ៉ាតែម្ដង។ ដូចនេះ Sabay ក៏សូមបង្ហាញនូវគន្លឹះមួយចំនួននៅលើ iPhone សម្រាប់បង្កើនសមត្ថភាពថតរូប និងវីដេអូដោយកាមេរ៉ារបស់ពួកវាតាមបច្ចេកទេស និងទទួលបានលទ្ធផលមិនចាញ់កាមេរ៉ាប្រភេទ DSLR។

@គ្រប់គ្រង Exposure

នៅលើកាមេរ៉ា iPhone មានសមត្ថភាពកំណត់នូវពន្លឺចូល Lens ដែលហៅថា Aperture។ ដើម្បីកំណត់ Aperture ដំបូងអ្នកចុចលើចំណុចណាមួយដើម្បី Focus រួចសង្កត់ឲ្យជាប់អូសឡើងលើ ឬចុះក្រោមដើម្បីកំណត់ពន្លឺដោយរូបសញ្ញាព្រះអាទិត្យពណ៌លឿងជាតំណាង។

@Focus និង Face Detection

ពេលអ្នកថតរូបមនុស្ស កាមេរ៉ាអាចចាប់យកផ្ទៃមុខ ដែលធ្វើឲ្យចំណុចនោះច្បាស់បានល្អ ដោយមានប្រអប់ជ្រុងពណ៌លឿងជាតំណាង។ ប្រសិនបើអ្នកចង់ឲ្យកាមេរ៉ាចាប់យកផ្ទៃមុខកាន់តែល្អ អ្នកគួរទៅជិតនឹងពួកគេរួចថត ម្យ៉ាងទៀតកាន់ល្អ បើអ្នកចុច Focus លើចំណុចទាំងនោះតែម្ដង។

@Zoom In

លើកាមេរ៉ា iPhone មិនមាន Optical Zoom ពិតប្រាកដនោះទេ ប៉ុន្តែអ្នកអាច Zoom ដូចនឹងកាមេរ៉ាឌីជីថលផ្សេងទៀតដែរ ដែលវាធ្វើការពង្រីកចំណុចកណ្ដាលនៃ Subject។ បើអ្នក Zoom ដើម្បីផ្ដិតយករូបភាពនោះ រូបភាពរបស់អ្នកនឹងមិនសូវច្បាស់ល្អនោះទេ ប៉ុន្តែក្នុងករណីដែលអ្នកមិនអាចមិន Zoom បាន អ្នកអាច ប្រើម្រាមដៃពីរ ដើម្បីពង្រីក ឬពង្រួមលើអេក្រង់កំឡុងពេលថតតែម្តង។

@HDR Shooting

ក្នុងករណីមានពន្លឺ Contrast ខ្លាំង អ្នកអាចថតដោយប្រើប្រាស់ HRD (High Dynamic Range) mode បាន ដោយវានឹងចាប់យក Exposure បីដាច់ពីគ្នា រួចលាយចូលគ្នាក្នុងរូបភាពតែមួយ។ អ្នកអាចចុចលើ icon HDR ក្នុងកម្មវិធីកាមេរ៉ា រួចជ្រើសយក On។ ដោយឡែកចាប់ពីម៉ូដែល iPhone 6 ឡើងកាមេរ៉ា HDR នឹងបង្កើតរូបភាពដែលមាន High Dynamic Range ដោយប្រើប្រាស់ Sensor របស់កាមេរ៉ា ជាសជាងប្រើប្រាស់រូបភាពបីខុសគ្នាលាយចូលគ្នា។

@Photo Filters

អ្នកអាចជ្រើសរើស Filter មួយចំនួនកំឡុងពេលថតដែលងាយស្រួលដល់អ្នកក្នុងការជ្រើសរើស Filter ដែលស័ក្តសមសម្រាប់រូបភាពណាមួយ។ អ្នកចុចលើ icon ផ្នែកខាងស្ដាំបង្អស់ខាងលើក្នុងកម្មវិធីកាមេរ៉ា រួចជ្រើសរើស Filter។ សម្រាប់រូបភាពដែលអ្នកថតរូបជាមួយ Filter ណាមួយ អ្នកនៅតែអាចប្ដូរ Filter ផ្សេងបាន ឬមិនប្រើ Filter ក៏បាន។

@ Shooting Features
អ្នកក៏អាចកំណត់ពេលវេលាសម្រាប់ឲ្យថតដោយស្វ័យប្រវត្តិផងដែរ។ អ្នកចុចលើ icon Timer ខាងលើ នៅជិត icon Filter ក្នុងកម្មវិធីកាមេរ៉ា រួចអាចជ្រើសរើសពេលវេលា ៣ ឬ ១០វិនាទីដើម្បីថត។

@Editing Features

កាមេរ៉ា iPhone ក៏មាន Editing tools សម្រាប់ធ្វើការកែប្រែ ឬបន្ថែម Filter លើរូបភាពផងដែរ ដែលមិនទាមទារពេលវេលាយូរនោះទេក្នុងការរៀនប្រើប្រាស់។ អ្នកអាចចូលទៅ Edit បានតាមរយៈPhoto Gallery ពេលអ្នកបើករូបភាពណាមួយ រួចចុចលើ icon នៅជិតនឹង icon លុបផ្នែកខាងក្រោមសម្រាប់ធ្វើការ Edit។ អ្នកអាចធ្វើការតម្រឹមរូបភាព, បន្ថែម Filter និងមុខងារជាច្រើនដែលអ្នកអាចសាកចុចលេងបានដើម្បីកាន់តែយល់ច្បាស់។ កុំបារម្ភអ្នកអាច Revert រូបភាពដែលបានកែប្រែរួចមកសភាពដើមវិញបាន។

@Shooting Modes

កាមេរ៉ា iPhone ផ្ដល់នូវ Shooting Modes ចំនួន ៨ ដោយ ៥ ប្រើសម្រាប់រូបភាព និង ៣ ទៀតប្រើសម្រាប់វីដេអូ។ ដើម្បីប្ដូរ Shooting Modes អ្នកអាចអូសទៅឆ្វេង ឬស្ដាំក្នុងតំបន់នៃប៊ូតុងថតរូបក្នុងកម្មវិធីកាមេរ៉ា។ ម្យ៉ាងវិញទៀតអ្នកក៏អាចប្រើប្រាស់ ប៊ូតុងដំឡើងសំឡេង (Volume up), កាស, និង Apple Watch ដើម្បីចុចថត ដែលអាចជួយកាត់បន្ថយភាពញ័រ ឬរង្គើ iPhone ពេលអ្នកថត។

-Photo : សម្រាប់ថតរូបភាពធម្មតាទាំងបញ្ឈរ ឬផ្ដេក។ អ្នកអាចចុចលើអេក្រង់ដើម្បី Focus ហើយចុចថតតែម្ដង។
-Portrait : សម្រាប់ថតមនុស្សបែបមានផ្ទាំងខាងក្រោមព្រាលៗ ហើយច្បាស់មុខ ប៉ុន្តែមានតែ iPhone 7 Plus ទេដែលមានមុខងារនេះ។
-Square : រូបភាពត្រូវបានថត ក្នុងទម្រង់ការ៉េបួនជ្រុង (Square frame) ដែលងាយស្រួលប្រើប្រាស់ក្នុងបណ្ដាញសង្គម Instagram។ អ្នកក៏អាចថតរូបភាពធម្មតា រួចធ្វើការតម្រឹមវាអោយក្លាយជារូបភាពប្រភេទ Square បានដែរ។

-Pano : អ្នកអាចថតរូបភាពជាមួយទិដ្ឋភាពបានវែង ហើយធំទូលាយ។ អ្នកចុចថត រួចរំកិលកាមេរ៉ាតាមទិសដៅសញ្ញាព្រួញដើម្បីផ្ដិតរូបភាពបានបន្ថែមទៀត តែគួរប្រុងប្រយ័ត្នកុំឲ្យរង្គើ ឬខុសទិសដៅខ្លាំងពេកពេលរំកិលកាមេរ៉ា ព្រោះអាចធ្វើឲ្យរូបខុសទ្រង់ទ្រាយ។

-Burst Mode : គឺចុចឲ្យជាប់លើកន្លែងថត ហើយ iPhone នឹងចាប់រូបជាប់ៗគ្នា ១០ សន្លឹកក្នុងមួយវិនាទី។
-Video : កាមេរ៉ាលើ iPhone អាចថតវីដេអូបានយ៉ាងល្អ ហើយថែមទាំងមាន Flash ជំនួយក្នុងការថតនៅកន្លែងមិនមានពន្លឺគ្រប់គ្រាន់ទៀតផង ហើយអ្នកគួរថតវីដេអូលក្ខណៈផ្ដេក ទើបមើលទៅស្អាត។ ពេលចុចថតវីដេអូ អ្នកនឹងឃើញប៊ូតុងពីរ ដែលពណ៌ក្រហមសម្រាប់បញ្ឈប់ការថត និងពណ៌សរសម្រាប់ថតយករូបភាពកំឡុងពេលថតវីដេអូ ប៉ុន្តែរូបភាពនោះមិនសូវច្បាស់ល្អទេ បើ Subject ផ្លាស់ទីលឿនពេក។
-Slo-Mo : អ្នកអាចថតវីដេអូ Slow motion (រូបភាពយឺតៗ) បានដល់ ១២០ ឬ ២៤០ fps (Frame per second)។ ម្យ៉ាងទៀត អ្នកក៏អាចកំណត់លើវីដេអូនោះថា តើពេលណាឲ្យវាយឺត និងលឿនបានផងដែរ នៅក្នុង Photo Gallery។

-Time-Lapse : អ្នកអាចថតវីដេអូលក្ខណៈបង្រួញពេលវេលាលឿន ដែលល្អសម្រាប់ថត បម្លាស់ទីពពក, ថ្ងៃរះ ឬលិច, ផ្កាលូតលាស់។ អ្នកគួរថតផ្ដេក ហើយប្រើប្រាស់ Tripod ដើម្បីជំនួយព្រោះការថតវីដេអូប្រភេទនេះចំណាយពេលវេលាយូរ។ ដំបូងអ្នកអាចកំណត់ Exposure និង Focus រួចចុចថតតែម្ដង៕

ប្រភព៖ makeuseof ប្រែសម្រួល ៖ ប៊ុន ធឿន

៧ យ៉ាងគួរដឹង មុនបង្កើតស្ទូឌីយោធ្វើវីដេអូ YouTube ដោយចំណាយលុយតិចបំផុត

ដើម្បីអោយវីដេអូមានកម្រិតគុណភាពល្អ អ្នកគួរ មានស្ទូឌីយ៉ោ (កន្លែងថត) តូចមួយល្មម ដែលមានសម្ភារៈគ្រប់គ្រាន់ក្នុង ការផលិតវីដេអូ ប៉ុន្តែអាស្រ័យលើប្រភេទវីដេអូដែលអ្នកផលិត វីដេអូខ្លះមិនតម្រូវទីតាំងសម្រាប់ផលិតនោះទេ។

ប្រសិនបើអ្នកមានបំណងបង្កើតស្ទូឌីយោ (studio) ផ្ទាល់ខ្លួនមែននោះ ខាងក្រោមនេះជាតម្រូវការបណ្ដាឧបករណ៍ និងកម្មវិធីសម្រាប់ផលិតក្នុងតម្លៃសមរម្យ៖
#១) កាមេរ៉ា

ការប្រើប្រាស់ស្មាតហ្វូន៖ អ្នកអាចជ្រើសរើសស្មាតហ្វូនណាមួយដែលអ្នកទាំងអស់គ្នាកំពុងប្រើយកមកថត ដោយខ្លួនឯង ឬបណ្ដាស្មាតហ្វូនដទៃទៀតដែលមានសមត្ថភាពកាមេរ៉ាល្អ អាចទទួលយកបាន។
ការប្រើប្រាស់កាមេរ៉ា DSLR៖ បើសិនជាអ្នកមានកាមេរ៉ាប្រភេទនេះកាន់តែល្អ ព្រោះវាអាចអាចប្ដូរកែវឡេន (lens) ដើម្បីធ្វើឲ្យវីដេអូមានភាពទាក់ទាញ។
ការប្រើប្រាស់កាមេរ៉ាច្រើនថត៖ អ្នកអាចប្រើប្រាស់កាមេរ៉ាច្រើន នៅច្រើនជ្រុងដើម្បីផ្ដល់រូបភាពច្រើនជ្រុង ដែលមានប្រយោជន៍ពេលយើងកាត់តវីដេអូ។

#២) Tripod (ទម្រជើងកាមេរ៉ា)

Tripod សម្រាប់កាមេរ៉ាប្រភេទ DSLR អាចប្រើប្រាស់សម្រាប់ទ្រកាមេរ៉ាកំឡុងពេលថត និងជួយទប់លំនឹងផងដែរ ហើយថែមទាំងល្អនៅពេលថតមួយកន្លែង។ Tripod ក៏មានសម្រាប់ស្មាតហ្វូនដែរ អ្នកអាចយកទៅថតនៅខាងក្រៅដូចជា ពេលថតដើរ ឬមួយកន្លែងជាដើម។
#៣) Microphone (ឧបករណ៍បំពងសំឡេង)

Microphone ដែលមានស្រាប់ជាប់នឹង PC, smartphone និងកាមេរ៉ា មិនសូវល្អសម្រាប់ថតយកសំឡេងនោះទេ ដោយវាបង្កជាសំឡេងរំខានផ្សេងៗកំឡុងពេលថត។ សម្រាប់កុំព្យូទ័រ PC មានម៉ូដែល Blue Snowball និង សម្រាប់ស្មាតហ្វូន ឬកាមេរ៉ាមានប្រភេទ RØDE Smartlav+ Lavalier ដែលអាចជួយធ្វើអាយសំឡេងច្បាស់ល្អកំឡុងពេលថត។
#៤) Lighting (ឧបករណ៍ជំនួយពន្លឺ)

អ្នកត្រូវពិនិត្យមើលវីដេអូ តើវាមានពន្លឺគ្រប់គ្រាន់ដែរឬទេ? បើមិនគ្រប់គ្រាន់ទេ អ្នកត្រូវរកកន្លែងដែលមានពន្លឺគ្រប់គ្រាន់ ឬទិញឧបករណ៍ភ្លើងជំនួយ។ ជាទូទៅស្ទើរតែគ្រប់វីដេអូដែលល្អៗសុទ្ធតែត្រូវការពន្លឺគ្រប់គ្រាន់ ដូចនេះអ្នកអាចជ្រើសរើសទិញឧបករណ៍ភ្លើងជំនួយដូចជា Safstar Photography Softbox ដែលមានលក់នៅតាមស្រុកយើង ឬកម្មង់ទិញតាមអនឡាញបាន។
#៥) កម្មវិធីកាត់តសំឡេង

ក្នុងកំឡុងពេលថត អ្នកប្រាកដជាបង្កកំហុសផ្សេងៗណាមួយពេលនិយាយ ដូចនេះប្រសិនបើអ្នកកម្មវិធីកាត់តសំឡេងនោះវានឹងជួយសម្រួលការងារនេះបានមួយផ្នែក។
កម្មវិធី Audacity ជាកម្មវិធីកាត់តមួយឥតគិតថ្លៃសម្រាប់ប្រើប្រាស់ ដែលមានមុខងារល្អៗសម្រាប់ដោះស្រាយលើសំឡេង ហើយអាចដំឡើងនៅលើ Window, macOS និង Linux បាន។
#៦) កម្មវិធីកាត់តវីដេអូ

មានកម្មវិធីកាត់តវីដេអូជាច្រើនដែលអាចប្រើប្រាស់ឥតគិតថ្លៃ។ អ្នកអាចជ្រើសរើសបាន ហើយអ្វីដែលសំខាន់ ត្រូវប្រាកថាកម្មវិធីនោះអាច export ទៅកាន់ format ដែលអាចបង្ហោះ ចូល Youtube បាន។
#៧) រូបភាពផ្ទៃខាងក្រោយ

អ្នកអាចប្រើប្រាស់ផ្ទៃខាងក្រោយផ្សេងៗ ដូចជា ប្រើប្រាស់ផ្ទាំងរូបភាព និងផ្ទាំងក្រណាត់ពណ៌បៃតង។ សម្រាប់ផ្ទាំង ក្រណាត់ពណ៌បៃតង អ្នកអាចផ្លាស់ប្ដូរផ្ទៃខាងក្រោយកំឡុងពេលកាត់តបាន។
អ្នកផលិតវីដេអូផ្សេងៗ ដើម្បីបង្ហោះចូល Youtube ជាផ្នែកមួយសម្រាប់យុវវ័យបច្ចុប្បន្ន ស្វែងរកថវិកាបន្ថែម ព្រមទាំងជាការបង្កើន និងបង្ហាញសមត្ថភាពរបស់ខ្លួនទៅកាន់ពិភពលោក ជាពិសេសអ្នកផលិតវីដេអូ បង្រៀន review ឧបករណ៍ផ្សេងៗ ការចម្អិនម្ហូប ចម្រៀង Cover ជាដើម។
ជាចុងក្រោយ អ្នកអាចចំណាយលុយបន្តិច ដើម្បីបន្ថែមគុណភាពរបស់វីដេអូ។ អ្នកអាចសាកល្បងលើពន្លឺរបស់វីដេអូ និងទីតាំងកាមេរ៉ា ដើម្បីអោយប្រាកដថាអ្វីដែលអ្នកចង់បង្ហាញចំទីតាំងល្អ។ មិនសំខាន់ខ្លាំង នោះទេ ក្នុង ការមាន studio សម្រាប់ផលិតវីដេអូ។ អ្នកមានត្រឹម smartphone និងអ៊ីនធឺណេត ក៏អាចផលិតវីដេអូ និងបង្ហោះចូល Youtube បាន ដែរ។ គ្រាន់តែ studio ជួយអោយកម្រិតគុណភាពវីដេអូខ្ពស់ជាង មុន ហើយអ្នកអាចប្រើប្រាស់ម្ដងម្កាល ឬញឹកញាប់អាស្រ័យលើប្រភេទវីដេអូ៕

គន្លឹះទាំង7 ថតរូបដោយប្រើប្រាស់ទូរស័ព្ទ iPhone

ដោយ ៖ គង់ រិទ្ឋរីណា

ថ្ងៃព្រហស្បតិ៍ ទី៦ ខែកក្កដា ឆ្នាំ២០១៧ ម៉ោង ១២:១៥ (06-07-2017 12:15)

យើងមកពិនិត្យមើលថា តើមានវិធីសាស្ត្រ អ្វីខ្លះដើម្បីឲ្យការថតរូបរបស់យើងច្បាស់ល្អ និងត្រូវតាមអ្វីដែលចង់បាន ។

១-ប្រើប្រាស់កម្មវិធីថតរូបផ្សេងៗ ៖

ប្រសិនបើមិនប្រញាប់ថតរូបទេនោះ អ្នកគួរតែប្រើប្រាស់កម្មវិធីថតរូបផ្សេងៗ ព្រោះ Apple បានបើកទូលាយដល់ក្រុមហ៊ុនបង្កើតកម្មវិធីទូរស័ព្ទផ្សេងៗដូចជា Shutter Speed, ISO, White Balance និង Exposure មានន័យថា អ្នកអាចថតរូបបានច្បាស់ជាង ពេលប្រើប្រាស់កម្មវិធីថតរូបទាំងនេះ ។

២-ថតរូបទៅតាមអ្វីដែលចង់បាន ៖

កម្មវិធីថតរូបរបស់ Apple មានផ្នែកជាច្រើនសម្រាប់ការថតរូបភាព ដូចជា Panorama, Square និង Photo ។ ប្រសិនបើអ្នកចង់ថតរូបដើម្បីបង្ហោះលើ Instagram គួរតែជ្រើសរើស Square ព្រោះអ្នកនឹងមិនចាំបាច់ Crop វាចេញពេលដែលបង្ហោះ ហើយវាអាចជួយឲ្យអ្នកដឹងថា ចម្ងាយប្រវែងណាស្អាតផងដែរ ។

៣-បិទ Flash ៖

ទូរស័ព្ទ iPhone ជំនាន់ថ្មីៗនាំមកនូវ Flash កាមេរ៉ាល្អជាងមុន ប៉ុន្តែវាគ្រាន់តែជាពន្លឺ LED ប៉ុណ្ណោះ ដែលមិនល្អគ្រប់គ្រាន់សម្រាប់ការថតរូបបានស្អាតឡើយ ។
សាកល្បងប្រើប្រាស់ពន្លឺធម្មជាតិ ឬប្រើប្រាស់កម្មវិធីកែប្រែរូបភាពដោយទាញ Exposure ឡើង ប្រសិនបើអ្នកថតរូបនៅពេលយប់ ។

៤-ប្រើប្រាស់ Burst Mode សម្រាប់ថតសកម្មភាព ៖

ប្រសិនបើចង់ថតរូបក្មេងៗកំពុងតែរត់លេង ឬថតការលេងកីឡាណាមួយ អ្នកអាចប្រើប្រាស់ Burst Mode បាន ព្រោះវាល្អសម្រាប់ការថតសកម្មភាពលឿន ។ Burst Mode មានសម្រាប់ iPhone 5s ឡើងទៅ ។
ដើម្បីប្រើប្រាស់ Burst Mode សូមចុចលើកន្លែងថត ឬប៊ូតុងដំឡើងសំឡេងឲ្យជាប់នៅពេលចាប់ផ្តើម វានឹងលោតលេខថា អ្នកថតបានប៉ុន្មានរូបភាពហើយ ។

៥-បើក HDR Auto ៖

iPhone អនុញ្ញាតឲ្យអ្នកប្រើ Hide Dynamic Range ឬ HDR ដែលអាចថតរូបមានពន្លឺស្អាត ។
អ្នកអាចបើក HDR ឬបិទវាដោយខ្លួនឯងតាមរយៈកម្មវិធីកាមេរ៉ា ប៉ុន្តែសម្រាប់ HDR របស់ iOS8 វិញ វាប្រើប្រាស់ Sensor របស់ទូរស័ព្ទអ្នកពេលរៀបនឹងថតរូបដើម្បីវាយតម្លៃថា តើរូបនេះត្រូវការ HDR ដែរឬទេ ហើយបើវាវាយតម្លៃថា ត្រូវការនោះ វានឹងបើក HDR ដោយខ្លួនឯង ។

៦-ប្រើប្រាស់ Focus Lock ៖

ប្រសិនបើអ្នកចង់ Focus ទៅលើវត្ថុរបស់មនុស្សណាមួយនោះ អ្នកអាច Lock Focus បាន មានន័យថា មិនថាអ្នកថតពីខាងណាទេ កាមេរ៉ាអ្នកនឹងរក្សា Focus លើមនុស្សឬវត្ថុនោះដដែល ។
អ្នកអាចប្រើប្រាស់វាបាន ដោយគ្រាន់តែចុចលើវត្ថុ ឬមនុស្សដែលចង់ Focus លើរហូតដល់វាលោតអក្សរ AE/AF Lock ពណ៌លឿង ។

៧-ថតរូបដោយប្រើប្រាស់ប៊ូតុងដំឡើងសំឡេង ៖

ដោយសារតែទូរស័ព្ទ iPhone មានកម្រាស់ស្តើង ការថតដោយចុចលើស្គ្រីនទូរស័ព្ទអាចនឹងធ្វើឲ្យកាមេរ៉ារង្គើ និងរូបភាពថតមកមិនច្បាស់។ ដូច្នេះ អ្នកអាចចុចលើប៊ូតុងដំឡើងសំឡេងវិញ ទើបអាចរក្សាលំនឹងដៃបានល្អ ៕

ប្រើតែកាមេរ៉ាទូរសព្ទក៏អាចថតម៉ូដែលរថយន្តបានស្អាតដែរ បើរៀនតាមនេះ

ភាគច្រើនរូបភាពរថយន្តស្អាតៗដែលអ្នកឃើញចុះផ្សាយលើសារព័ត៌មានសព្វថ្ងៃគឺថតដោយប្រើសុទ្ធសឹងតែកាមេរ៉ាអាជីព DSLR ដែលមានតម្លៃថ្លៃៗ។ តាមពិតទៅត្រឹមកាមេរ៉ារបស់ស្មាតហ្វូនក៏អាចថតរូបម៉ូដែលរថយន្តបានស្អាតដូចគ្នា ប្រសិនបើដឹងគន្លឹះមួយចំនួន។

វីដេអូខាងក្រោមនឹងបង្ហាញពីគន្លឹះខ្លះៗជួយឲ្យអ្នកអាចថតរូបម៉ូដែលរថយន្តបានស្អាត តាមរយៈការប្រើកាមេរ៉ាលើស្មាតហ្វូន៖

ចុចអាន៖

Khmer Techno Innovation

Thursday, October 12, 2017

អ្នកប្រើ iPhone ចង់ថតរូបបានស្អាត កុំភ្លេច តិចនិកទាំង ១២ ក្បាច់នេះ

កំហុសទាំង ១០ ចំពោះការថតរូបលើស្មាតហ្វូន ដែលគួរជៀសវាង

Tuesday, August 15, 2017

គន្លឹះពេញលេញថតវីដេអូ Slo-Motion លើ iPhone ឲ្យបានត្រឹមត្រូវ

Friday, August 4, 2017

ប្រើតែស្មាតហ្វូន ក៏ថតវីដេអូបានយ៉ាងឡូយ បើដឹងបច្ចេកទេសទាំងនេះ

Sunday, July 23, 2017

ប្រើ iPhone ថតរូប និងវីដេអូមិនចាញ់កាមេរ៉ាអាជីព បើស្គាល់មុខងារទាំងនេះច្បាស់

Sunday, July 9, 2017

៧ យ៉ាងគួរដឹង មុនបង្កើតស្ទូឌីយោធ្វើវីដេអូ YouTube ដោយចំណាយលុយតិចបំផុត

Thursday, July 6, 2017

គន្លឹះទាំង7 ថតរូបដោយប្រើប្រាស់ទូរស័ព្ទ iPhone

ដោយ ៖ គង់ រិទ្ឋរីណា

Thursday, June 29, 2017

ប្រើតែកាមេរ៉ាទូរសព្ទក៏អាចថតម៉ូដែលរថយន្តបានស្អាតដែរ បើរៀនតាមនេះ

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

Ordered List

Definition List

Sample Text

Labels