2014 ~ Khmer Techno Innovation

Friday, October 17, 2014

ទឹកធ្លាក់ច្រកល្អៀង

កំពង់ឆ្នាំង ទឹកធ្លាក់ច្រកល្អៀងគឺជារមណីយដ្ឋានធម្មជាតិមួយនៅជាប់ព្រំប្រទល់ ខេត្តកំពង់ឆ្នាំង និង ខេត្តពោធិ៍សាត់ដែលបានរៀបចំឡើងដោយសហគមន៍ ឃុំឈើតុំ មានការជួយឧបត្ថម្ភពីមន្ទីរបរិស្ថាន និង មន្ទីរទេសចរណ៍ខេត្តពោធិ៍សាត់ និងអង្គការជាដៃគូ។

រមណីយដ្ឋានធម្មជាតិមួយនេះមានទីតាំងស្ថិតក្នុង ភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ ជាប់ព្រំប្រទល់ ឃុំក្រាំងស្គារ ស្រុកទឹកផុស ខេត្តកំពង់ឆ្នាំង និងមានចម្ងាយប្រមាណ៧២គីឡូម៉ែត្រខាងលិចឆៀងខាងជើងទីរួមខេត្តកំពង់ ឆ្នាំង។

សម្រាប់ ភ្ញៀវទេសចរមកពីភ្នំពេញដើម្បីទៅទីនោះឲ្យបានឆាប់យើងត្រូវ ធ្វើដំណើរផ្លូវកាត់ក្រាលកៅស៊ូមួយកំណាត់ និងក្រាលផ្លូវគ្រួសក្រហមយ៉ាងរលោងមួយកំណាត់ទៀតទើបទៅដល់ទីនោះ។

បើគិត ចម្ងាយពីទីរួមខេត្តកំពង់ឆ្នាំង ទៅដល់រមណីយដ្ឋានដែលមានទឹកធ្លាក់ធម្មជាតិស្រស់ស្អាតនេះគេ ធ្លាប់វាស់កុងទ័ររថយន្តមានចម្ងាយ៧២គីឡូម៉ែត្រប៉ុណ្ណោះ។

ចង់ទៅ រមណីយដ្ឋានច្រកល្អៀង ត្រូវធ្វើដំណើរតាមបណ្តោយផ្លូវជាតិលេខ៥ពីក្រុងកំពង់ឆ្នាំង ទៅទិសខាងជើងចម្ងាយជាង១០គីឡូម៉ែត្រ នឹងទៅដល់ផ្សារមួយ ឈ្មោះផ្សារពង្រ ស្ថិតក្នុងឃុំពង្រស្រុករលាប្អៀរ។ ពេលទៅដល់ផ្សារ ភ្ញៀវ ទេសចរត្រូវបត់ចូលខាងឆ្វេងដៃតាមបណ្តោយផ្លូវក្រាលកៅស៊ូដែលធ្វើ ឡើងដោយ មន្ទីរសាធារណការ និងដឹកជញ្ជូនខេត្តកំពង់ឆ្នាំងមានចម្ងាយជាង២០គីឡូម៉ែត្រកាត់តាម ភូមិត្រពាំងម្លូ និងទៅដល់ស្ថានីយរថភ្លើងក្រាំងស្គា។

ពេល ទៅដល់ទីនោះគឺផុតផ្លូវក្រាលកៅស៊ូហើយ នឹងដល់ផ្លូវក្រាលគ្រួសក្រហមមួយស្រប តាមថ្នល់រថភ្លើងទៅទិសខាងជើង កាត់តាមផ្សារក្តុល រួចទៅដល់ជិតស្ថានីយរថភ្លើងបំណក់ ភ្ញៀវទេសចរ នឹងបានឃើញស្លាកសញ្ញា ដាក់ថា រមណីយដ្ឋានទឹកធ្លាក់ច្រកល្អៀង មានចម្ងាយ ១៥គីឡូម៉ែត្រឃើញមានផ្លូវមួយបត់ខាងឆ្វេងដៃ។ ពេលនោះលោកអ្នកត្រូវធ្វើដំណើរ ចូលទៅតាមផ្លូវកាត់ព្រៃភ្នំមានទេសភាពល្អណាស់ ដោយនៅតាមសងខាងផ្លូវមានដោយដើមឈើគ្រប់ប្រភេទតូច ធំ ខ្ពស់ៗដែលជាព្រៃស្រោងរហូតដល់គោលដៅ ដោយមានមន្ត្រីបរិស្ថាន និងសហគមន៍នៅទីនោះចាំបម្រើ ភ្ញៀវទេសចរជាតិ និងអន្តរជាតិផងដែរ.

គ្រាន់តែ បានឈានជើងចូលដល់បរិវេណនោះភ្លាម លោកអ្នកប្រាកដជានឹងបានឮសំឡេងទឹកធ្លាក់យ៉ាងគំហុក បោកនឹងផ្ទាំងថ្មយ៉ាងទ្រហ៊ឹង។ លោកអ្នកនឹងឃើញទឹកធ្លាក់យ៉ាងថ្លាដូចកញ្ចក់ បោកលើផ្ទាំងថ្មបែកយ៉ាងសក្បុស ពីលើចុះមកក្រោម បូកផ្សំជាមួយព្រៃឈើតូចធំ មើលទៅពិតជាគួរ អោយគយគន់នៃសម្រស់ធម្មជាតិរបស់រមណីយដ្ឋាន ទឹកធ្លាក់ច្រកល្អៀង ពិតប្រាកដមែន។

លោក អុំ ស៊ុន ចំរើន ហៅលោកតាឆន ជាសមាជិកសហគមន៍ ឃុំឈើតុំ ទឹកធ្លាក់ច្រកល្អៀងបានមានប្រសាសន៍ថា សហគមន៍របស់ លោក បានបង្កើត ឡើងនៅឆ្នាំ២០០២ ដោយមានលោក អ៊ិច អាត ជាប្រធានសហគមន៍នេះ និងមានការជួយឧបត្ថម្ភពីមន្ទីរបរិស្ថានខេត្ត និងទេសចរណ៍ ខេត្តពោធិ៍សាត់ និងអង្គការជាដៃគូមួយចំនួនទៀតបានផ្ដួចផ្ដើមកសាងផ្លូវចូលមក រមណីយដ្ឋាន នេះដែលអាចឲ្យរថយន្តតូចធំចូលមកកម្សាន្តបានយ៉ាងងាយស្រួល។ ក្រៅពីនោះបានកសាង បន្ទប់ទឹកបង្គន់អនាម័យ ធុងសម្រាប់ដាក់សំរាម តុឈើតាមមាត់ទឹកសម្រាប់ភ្ញៀវអង្គុយកម្សាន្ត ចាក់បេតុងលើផ្ទាំងថ្មជាផ្លូវសម្រាប់ដើរ និងស្ពានមួយចំនួនសម្រាប់ដើរតាមមាត់ជ្រោះ ទឹកធ្លាក់នេះផងដែរ។ក្រៅពីនោះក៏នៅ មានគេធ្វើស្លាកសញ្ញា សម្រាប់បង្ហាញផ្លូវ និងទីតាំងដែលភ្ញៀវទៅដល់ទៀតផង។ក្រៅពីស្លាកសញ្ញាបង្ហាញផ្លូវ នូវមានស្លាក សញ្ញាហាមឃាត់មាន ដូចជាហាម នាំយកនូវរបស់បែកជាអំបែង មានដបភេសជ្ជៈគ្រប់ប្រភេទនាំ ចូល បរិវេណរមណីយដ្ឋានដែលអាចបង្កគ្រោះថ្នាក់ដល់មនុស្សនិងកង់រថយន្ត និងហាមនេសាទត្រីផងដែរ។

លោកតា បានបន្តថា ទឹកធ្លាក់ច្រកល្អៀង ឬហៅឈ្មោះមួយទៀត “យ៉ោក”នេះមានច្រើនដំណាក់ណាស់ តែសហគមន៍បានដាក់ស្លាកតែ៣ដំណាក់ធំៗប៉ុណ្ណោះ ដែលចាប់ពីចំណុចទៅដល់ ឡើងទៅលើមានចម្ងាយ៩០០ម៉ែត្រ។ ក្នុងនោះមានទឹកធ្លាក់ ថ្មសណ្តូន ទឹកធ្លាក់ជ្រៃក្រឹម និងទឹកធ្លាក់ខ្ពស់ជាងគេគឺដំណាក់ស្ដេច ដែល មានចម្ងាយ៩០០ម៉ែត្រនេះ។

លោកតា ស៊ុន ចំរើន បាន បញ្ជាក់ទៀតថា សហគមន៍របស់លោក បានគ្រប់គ្រងដីតំបន់នេះចំនួន ជាង៣៥០ហិតា ដែលកំណត់ ដោយ មន្ទីរបរិស្ថានខេត្ត និងអង្គការម្លប់បៃតង។ ចំពោះចំណូលដែលបានមកពីភ្ញៀវ ក្នុង នោះរថយន្តធុនតូចមួយ គ្រឿង៥ពាន់រៀល រថយន្តធន់ធំមួយ គ្រឿង១ម៉ឺនរៀល និងភ្ញៀវម្នាក់១ពាន់រៀល គឺយកសម្រាប់ជួសជុល និងកសាងបន្ថែមក្នុងរមណីយដ្ឋាននេះ និងសម្រាប់ជួលអ្នកដើរ រើសសំរាម បើទោះមានធុងសម្រាប់ដាក់សំរាមពិតមែន តែភ្ញៀវខ្លះនៅតែចោលសំរាមពាសវាលពាស កាលដដែល។ ក្រៅពីនោះចំណូលមួយផ្នែកបានយកទៅកសាងផ្លូវក្នុងឃុំឈើតុំ ដែលមាន១២ភូមិ។ សហគមន៍នៅ បានដាក់ឧគ្ឃោសនស័ព្ទជាច្រើនកន្លែងសម្រាប់ភ្ញៀវ ជូនដំណឹងពីការ បាត់របស់ បាត់កូនចៅ និងជូនដំណឹងផ្សេងៗ ដោយពុំគិតថ្លៃ។

បើ ទោះបីមានការអះអាងបែបនេះក្តី ក៏នៅមានភ្ញៀវបានត្អូញត្អែរដែរថា ផ្លូវចូលទៅតែប៉ុន្មានគីឡូម៉ែត្រសោះគ្មានការថែទាំ និងជួសជុលបន្ថែម ធ្វើឲ្យរថយន្តភ្ញៀវមានការពិបាកក្នុងការធ្វើដំណើរ និងសេវាកម្មលក់ដូរនៅកន្លែងកម្សាន្តមានតម្លៃថ្លៃគួរសមដែរ។

សម្រាប់ ភ្ញៀវដែលបានទៅកម្សាន្តនៅទីនោះពិតជាលាន់មាត់សរសើរថា ពិតជាល្អស្អាតនិងមានធម្មជាតិស្រស់បំព្រងណាស់ និងមានទឹកធ្លាក់យ៉ាងថ្លាយង់យល់បាតដី និងបានឃើញត្រីតូចធំ រួមផ្សំនឹងខ្យល់បរិសុទ្ធធម្មជាតិទៀតផងនោះ ពិតជាស្ងើចសរសើរមិនដាច់ពីមាត់ថា ពិតជាជក់ចិត្តមែន ហើយនឹងបបួលមិត្តភក្ដិ កូនចៅទៅលេងនៅពេលក្រោយៗទៀតជា ពុំខានឡើយ៕

ល្បីថា មាន់ដុត នៅភ្នំស្អាងឆ្ងាញ់, គួរតែទៅសាក!

កណ្តាល: គ្រាន់តែឮថាមាន់ដុតលោកអ្នកប្រាកដជាស្រក់ទឹកមាត់ហើយមើលទៅនោះ។ មាន់ដុតឬទាដុតឆ្ងាញ់បែបណា ? លោកអ្នកដែលមិនធ្លាប់ទៅភ្នំស្អាងប្រាកដជាមិនដឹងទេ។ តែបើលោកអ្នកធ្លាប់បានទៅដល់ទីនោះវិញ លោកអ្នកប្រាកដជាដឹងថា តើមាន់ដុតភ្នំស្អាងមានរស់ជាតិឆ្ងុយឆ្ងាញ់បែបណា!។ ពិតមែនហើយ ដោយសារតែភាពល្បីរន្ទឺអំពីថ្វីដៃនៃការដុតមាន់របស់អ្នកលក់ ទើបគេសម្គាល់ឃើញជារៀងរាល់ថ្ងៃ ពិសេសថ្ងៃសៅរ៍ និងថ្ងៃអាទិត្យ តែងតែមានភ្ញៀវទៅហូបមាន់ដុតនៅភ្នំស្អាងយ៉ាងច្រើនកុះករ។

ប៉ុន្តែភ្ញៀវដែលទៅលេងកំសាន្ត មិនមែនសម្តៅទៅហូបតែមាន់ដុតប៉ុណ្ណោះទេ សំខាន់គឺទៅលេងកំសាន្តនៅទីនោះ ដើម្បីលំហែរកាយ និងទស្សនាទេសភាពធម្មជាតិនៅតាមជើងភ្នំ និងលំហផ្ទៃជលសារក្នុងរដូវវស្សាលាយឡំនិងធម្មជាតិខៀវខ្ចីនៅតាម ជើងភ្នំជាទីមនោរម្យ។

ចំណែកក្នុងរដូវទឹកសម្រក ឬរដូវប្រាំងក្នុងលំហផ្ទៃជលសារក៏ក្លាយទៅជាទេសភាពខៀវខ្ចី មើលទៅឃើញវាលស្រែដ៏ធំល្វឹងល្វើយដាច់កន្ទុយភ្នែក គួបផ្សំនិងការជួបជុំក្រុមគ្រួសារ ជីដូនជីតា មិត្តភ័ក្រ គូសង្សារ ឈប់សម្រាកនៅលើខ្យូសក្រោមម្លប់ជ្រៃ ម្លប់ពោធិ៍ តាមជើងភ្នំមានខ្យល់ធម្មជាតិបក់បោកលាយឡំនិងក្លិនលំអងផ្កាស្រែ ស្រូវជះមកប៉ះច្រមុះម្តងៗ ធ្វើឲ្យចាប់ចិត្តណាស់។

ថ្វីត្បិតតែតំបន់ទេសចរណ៍នៅភ្នំស្អាងវាមានលក្ខណៈគ្រួសារ យ៉ាងណាក៏ដោយ តែចំពោះសន្តិសុខសណ្តាប់ធ្នាប់ បរិស្ថានមានអនាម័យគឺល្អ ធ្វើឲ្យភ្ញៀវដែលទៅកំសាន្តមានផាសុខភាព។ បើបានទៅកំសាន្តម្តងហើយ ចងតែទៅកំសាន្តម្តងទៀត។ តំបន់ទេសចរណ៍ភ្នំស្អាងនេះ មិនមានលក្ខណៈធំដុំតាមស្តង់ដារឡើយ ក៏ប៉ុន្តែវាអាចធ្វើឲ្យបងប្អូនភ្ញៀវទេសចរណ៍ ដែលទៅកំសាន្តនៅទីនោះ បានសប្បាយនិងបានហូបមាន់ដុតដ៏ឈ្ងុយឆ្ងាញ់ និងមិនបាច់បារម្ភពីតម្លៃឡើយ។ ប្រជាពរដ្ឋអ្នកលក់ដូរប្រមាណជា១០គ្រួសារនៅទីនោះមានជីវភាពធូរធា ដោយសារមុខរបរដុតមាន់នេះ។

មាន់ដុតមួយក្បាលមានតម្លៃតាម តូចតាមធំ ពី២៥០០០ទៅ៣៥០០០រៀល ហើយបើចង់ហូបបាយ អ្នកលក់ហ្វ្រី(free)បាយ ឲ្យដោយមិនគិតថ្លៃទៀត។ ចំណែកភេសជ្ជៈ ស្រាបៀរ ទឹកក្រូច ទឹកផ្លែឈើ ទឹកសុទ្ធ លក់ក្នុងតម្លៃធម្មតា ។ ខ្យូសនីមួយៗមានក្រាលកន្ទេល និងមានអង្រឹងសម្រាប់គេងលំហែរកាយទៀតផង។

បើលោកអ្នកចង់ទៅ លេងភ្នំស្អាង លោកអ្នកធ្វើដំណើរពីរង្វង់មូលក្រុងតាខ្មៅទៅ មានចម្ងាយតែជាង១០គីឡូម៉ែត្រប៉ុណ្ណោះ។ លោកអ្នកធ្វើដំណើរចេញពីក្រុងក្រុងតាខ្មៅ ឆ្ពោះតាមផ្លូវជាតិលេខ២១ ប្រមាណ១១គីឡូម៉ែត្រ លោកអ្នកនិងឃើញមានការាស់សាំងមួយដែលមានយីហោ មានផល នៅខាងស្តាំដៃ ហើយមានផ្លូវក្រាលកៅស៊ូមួយបត់ស្តាំឆ្ពោះទៅលិច លោកអ្នកធ្វើដំណើរបត់ស្តាំតាមផ្លូវជាប់ និងការាស់សាំងឈ្មោះ មាន ផល ឆ្ពោះទៅលិចបន្តិច លោកអ្នកនឹងឃើញបន្ទាយទាហាន សឹករង ស្រុកស្អាងនៅខាងឆ្វេងដៃ និងឃើញសាលាឃុំស្អាងភ្នំនៅខាងស្តាំដៃ ហើយធ្វើដំណើរទៅមុខបន្តិចទៀត ប្រហែល១៥០០ម៉ែត្រ លោកអ្នកនិងឃើញ ក្លោងទ្វារវត្តភ្នំស្អាង នៅខាងស្តាំដៃហើយ ហើយធ្វើដំណើរតាមផ្លូវវត្តរហូតបានប្រមាណជា២៥០០ម៉ែត្រ លោកអ្នកនិងទៅដល់វត្ត និងកន្លែងកំសាន្ត។

ថ្វីត្បិតតែនៅភ្នំ ស្អាងនេះ ល្បីថា មាន់ដុតមាន់ស្រែមានឱជារសឆ្ងុយឆ្ងាញ់ពិតមែន ក៏ប៉ុន្តែក៏មានភ្ញៀវខ្លះនិយាយថា ជាមាន់ធម្មតា ដុតតាមរបៀបដូចតែគ្នាទេ។ តែមានគុណសម្បត្តិត្រង់ថា ទី១ជាមាន់ស្រែពិតប្រាកដ ទី២ការសម្រាកកំសាន្តហូបចុកនៅកន្លែងមួយដែលយើងមានអារម្មណ៍ថាស ប្បាយ ជាហេតុបណ្តាឲ្យយើងហូបអ្វីក៏ឆ្ងាញ់ ព្រោះកន្លែនោះវាប្លែកពីនៅផ្ទះរបស់យើង។

ស្រីដា អាយុ២៤ឆ្នាំ កម្មការិនីរោងចក្រកាត់ដេរ ជាប្រជាពលរដ្ឋមានស្រុកកំណើតនៅភូមិត្នោតញី ឃុំខ្ពប ស្រុកស្អាង ខេត្តកណ្តាល។ បច្ចុប្បន្នស្នាក់នៅផ្ទះជួល ក្រុងតាខ្មៅ បាននិយាយថា មូលហេតុដែលនាងចង់ទៅលេងកំសាន្តនៅភ្នំស្អាង ដោយសារទី១ ចង់ទៅកំសាន្តទស្សនាទេសភាពតាមជើងភ្នំ និងលំហផ្ទៃជលសាព្រមទាំងទេសភាពវាលស្រែ។ ទី២នៅទីនោះម្ហូបអាហារថោកសមល្មម ដែលនាងមិនភ័យព្រួយពីតម្លៃឡើយ។ ទី៣ទិសដៅដែលនាងទៅកំសាន្តនៅទីនោះ គឺចង់តែហូបមាន់ដុតទេ ព្រោះមាន់ដែលអ្នកលក់នោះ គឺជាមាន់ស្រែពិតប្រាកដ ហើយមានរសជាតិឆ្ងុយឆ្ងាញ់គួរឲ្យចង់ហូបណាស់។ប៉ុន្តែស្រីដានាង បានបង្ហាញពីភាពព្រួយបារម្ភខ្លាចតំបន់ទេសចរណ៍ក្លាយទៅជារបស់ឈ្មួញ ពេលនោះ សេវានៅទីនោះ នឹងឡើងថ្លៃ ទាំងម្ហូបអាហារ និងភេសជ្ជៈជាមិនខាន ។

ចំណែកលោក ខាត់ សុខឿន អាយុ៥១ឆ្នាំ ជាអាជីវករលក់ខោអាវនៅផ្សារតាកែវ មានស្រុកកំណើតនៅស្រុកបាទី ខេត្តតាកែវ លោកបាននិយយាថា គាត់ឮល្បីថា មាន់ដុតនៅភ្នំស្អាងគឺមានរសជាតិឆ្ងុយឆ្ងាញ់ គាត់ក៏បាននាំគ្រួសារមកលេងកំសាន្តនៅទីនោះ ។ ពិតប្រាកដណាស់ សម្រាប់ប្រពន្ធកូនរបស់គាត់បានសសើរមិនដាច់ពីមាត់ថា ឆ្ងាញ់មែន។ ប៉ុន្តែផ្ទុយទៅវិញចំពោះរូបលោកបានកោតសសើរនៅទីនោះមានសន្តិសុខ សណ្តាប់ធ្នាប់ អនាម័យល្អ និងមានធម្មជាតិស្រស់ត្រកាល់គួរឲ្យចង់គយគន់ណាស់។

ពេលដែល លោកទៅដល់តំបន់កំសាន្តនៅភ្នំស្អាងនោះ លោកនិយាយថា ដូចមានអារម្មណ៍ធូរស្រាលនឹងសប្បាយរីករាយទៀតផង។ ប៉ុន្តែលោកក៏បានបង្ហាញនូវការព្រួយបារម្ភផងដែរ អីពីការខ្លាចបាត់បង់តំបន់ទេសចរណ៍ជាលក្ខណៈគ្រួសារនេះ។ បើសិនជាតំបន់ទេសចរណ៍ធ្លាក់ទៅដល់ដៃក្រុមឈ្មួញវិញ តម្លៃនៃម្ហូបអាហារប្រាកដជាឡើងថ្លៃទ្វេរដងជាក់ជាមិនខាន។

លោកបានបញ្ជាក់ថា បើយោងតាមព័ត៌មានដែលលោកទទួលបាន តំបន់ទេសចរណ៍នេះ មានឈ្មួញម្នាក់ កំពុងចង់ច្បាមយកតំបន់ទេសចរណ៍នេះមកធ្វើអាជីវកម្មហើយ៕

ចំណុចពិសេសទាំង ៨ដែលប្រិយមិត្តគួរដឹងពេលទិញ iPhoneថ្មីយកមកប្រើលើកដំបូង

មាន ប្រិយមិត្តខ្លះមិនទាន់បានដឹងថាតើត្រូវធ្វើដូចម្ដេចទេពេលទិញ iPhone ថ្មីប្រើលើកដំបូង។ មានរឿងជាច្រើនដែលអ្នកគួរដឹងនៅពេលដែលទើបតែទិញ iPhone យកមកប្រើ។ ចំណុចសំខាន់ៗទាំង៨ខាងក្រោមគឺជារឿងអ្វីដែលប្រិយមិត្តគួរតែ ធ្វើ៖

១. ត្រូវ Activate iPhone ថ្មីរបស់អ្នក

អ្នក អាចប្រើកម្មវិធីផ្សេងៗយ៉ាងច្រើនដូចជា FaceTime, Find My iPhone, iMessage និងមុខងារជាច្រើនទៀតបន្ទាប់ពី iPhone របស់អ្នកត្រូវបាន Activate ។

២. ត្រូវ Install iTunes

នៅ ពេលដែលអ្នកបានដំឡើង iTunes ចូលទៅក្នុងiPhone របស់អ្នកនោះអ្នកនឹងមានភាពងាយស្រួលក្នុងការដាក់ឬ ដកបទចម្រៀង វីដេអូ រូបភាព និងកម្មវិធីផ្សេងទៀតក្នុងiTune។

៣. ត្រូវបង្កើត Apple ID

បន្ទាប់ ពីអ្នកបានបង្កើតApple ID ហើយនោះអ្នកអាចចូលទៅដោនឡូតកម្មវិធីជាច្រើននៅក្នុង iTunes Store ឬ App Store បានដោយងាយ។

-ដើម្បីរៀនពីរបៀបបង្កើត Apple ID តាម iPhone មិនបាច់ប្រើ Credit Card សូមចុចត្រង់នេះ!

៤. ត្រូវ Set Up និង Synce iPhone របស់អ្នក

ពេល ដែលអ្នកមាន iTunes និង Apple ID ហើយអ្នកអាចភ្ជាប់ iPhone របស់អ្នកទៅនឹងកុំព្យូទ័រដើម្បី Synce រូបថត, Music Library, eBook និងអ្វីផ្សេងទៀតដែលអ្នកគិតថាចាំបាច់ដាក់ចូលក្នុងកុំព្យូទ័រ របស់អ្នក។

៥. ត្រូវរៀបចំ iCloud

៦. ត្រូវSet Up មុខងារ Find My iPhone

Find My iPhone ជាមុខងារពិសេសមួយប្រើប្រព័ន្ធ GPS ហើយអាចឲ្យអ្នកស្វែងរកiPhone របស់អ្នកនៅពេលដែលវាបាត់ត្រឡប់មកវិញ។

-ដើម្បីរៀនពីរបៀបស្វែងរកiPhone ដែលបានបាត់ឬត្រូវចោរលួចត្រឡប់មកវិញ សូមចុចត្រង់នេះ!

៧. រៀនពីរបៀបប្រើប្រាស់កម្មវិធីនៅដែលមានស្រាប់ក្នុង iPhone

៨. ទាញយកកម្មវិធីថ្មីៗពី App Store

អ្នក អាចនឹងត្រូវការកម្មវិធីពិសេសៗជាច្រើនទៀតសម្រាប់បម្រើទៅដល់ សេចក្តីត្រូវការរបស់អ្នកក្រៅពីមុខងារដែលមានស្រាប់នៅក្នុង iPhone របស់អ្នក។ សង្ឃឹមថា ចំណុចខ្លីៗទាំង ៨ នេះនឹងជួយឲ្យអ្នកប្រើប្រាស់ iPhone កាន់តែងាយស្រួលជាងមុន៕

ចុចអាន៖ របៀបឆែកមើល Activation Lock មុនសម្រេចចិត្តទិញ iPhone មួយទឹក

ប្រែសម្រួល៖ ប៉ែត ផាន់និត
ប្រភព៖ ipod.about

ឈាង វណ្ណារិទ្ធិ ពីក្មេងរកត្រី ដាំបន្លែចិញ្ចឹមគ្រួសារទៅជាសាស្ត្រាចារ្យនៅសាកលវិទ្យាល័យដ៏ល្បីនៅអង់គ្លេស

Sat, 9 August 2014

Leeds ជាសាកលវិទ្យាល័យឥដ្ឋក្រហមរបស់ចក្រភពអង់គ្លេសដែលមានទីតាំងនៅក្នុង ទីក្រុងលីដស៍នៃតំបន់ West Yorkshir ប្រទេសអង់គ្លេស។ Leeds មានសិស្សប្រមាណ៣៣៦០០នាក់ដែលជាតួលេខខ្ពស់បំផុតមួយក្នុងចំណោម សាកលវិទ្យាល័យនានាក្នុងចក្រភពអង់គ្លេស។ ពីឆ្នាំ២០០៦ ដល់បច្ចុប្បន្ននេះ សាកលវិទ្យាល័យនេះបានបង្កើនលំដាប់ថ្នាក់របស់ខ្លួនដល់លេខ២នៅ អង់គ្លេសដែលមានចំនួនសិស្សចុះឈ្មោះចូលរៀនច្រើនជាងគេបន្ទាប់ពី សាកលវិទ្យាល័យមេនឆេស្ទ័រ (University of Manchester)។

ភាពល្បីល្បាញរបស់ Leeds បានទាក់ទាញសិស្សនិស្សិត និងសាស្ដ្រាចារ្យទូទាំងពិភពលោកឲ្យចង់មកសិក្សា និងបង្ហាត់បង្រៀននៅទីនេះ។
ពិតណាស់ សាលាល្បី សាស្ដ្រាចារ្យក៏មិនអន់នោះទេ។ ក្នុងចំណោមសាស្ដ្រាចារ្យមកពីគ្រប់ទិសទីនោះ យុវជនកម្ពុជាដែលមានសមត្ថភាពខ្ពស់ក៏ជាធនធានដ៏សំខាន់ម្នាក់នៅ សាកលវិទ្យាល័យ Leeds ផងដែរ។

ស្ថិតក្នុងវ័យ៣៥ឆ្នាំ លោក ឈាង វណ្ណារិទ្ធ បានចាប់ផ្ដើមបង្រៀនជាសាស្ត្រាចារ្យ និងជាអ្នកស្រាវជ្រាវផ្នែកសិក្សាអាស៊ីប៉ាស៊ីហ្វិកនៅឯសាកលវិទ្យាល័យ លីដស៍ (University of Leeds) ស្ថិតក្នុងចក្រភពអង់គ្លេសក្នុងឆ្នាំ២០១៣។

មុននឹងមានឱកាសចូលបង្រៀននៅឯសាកលវិទ្យាល័យធំមួយនេះលោក វណ្ណារិទ្ធិ បានចំណាយពេលជាច្រើនឆ្នាំធ្វើជាអ្នកដឹកនាំវិទ្យាស្ថានខ្មែរសម្រាប់ សហប្រតិបត្តិការ និងសន្តិភាព(CICP) ជាស្ថាប័នស្រាវជ្រាវនយោបាយ និងសង្គមមួយនៅប្រទេសកម្ពុជា។

សាស្ដ្រាចារ្យរូបនេះបានរំឭកដល់ជីវិតកុមារភាព និងប្រវត្ដិនៃការសិក្សារបស់លោកថា ស្ថានភាពជីវភាពគ្រួសារមិនអំណោយផល លោកហាក់មានក្ដីសង្ឃឹមតិចតួចណាស់ក្នុងការបញ្ចប់ការសិក្សាថ្នាក់ ឧត្ដម។

លោកបាននិយាយថា៖ «បើមើលទៅស្ថានភាពជាក់ស្ដែងរបស់ខ្ញុំ[ពីដំបូង]គ្មាននរណាម្នាក់ជឿ ថា ខ្ញុំអាចរៀនបានដល់ថ្នាក់បណ្ឌិតទេ»។

មានកំណើតក្នុងស្រុកស្ទោង ខេត្តកំពង់ធំ ក្នុងពេល១ខែក្រោយការវាយលុកកាន់កាប់ចូលពីសំណាក់កងទ័ពវៀតណាម ក្នុងឆ្នាំ១៩៧៩ ដោយកំព្រាឪពុកផងនោះ កុមារា ឈាង វណ្ណារិទ្ធ រស់នៅតែជាមួយម្ដាយ ដែលត្រូវរ៉ាប់រងចិញ្ចឹមគ្រួសារទាំងមូល ហើយខ្លួនលោកផ្ទាល់តែងតែជួយរកត្រី រកបន្លែបន្លុកមកផ្គត់ផ្គង់ចំណីអាហារគ្រួសារដែលប្រកបរបរដាំដុះ បន្លែ និងធ្វើចម្ការ។

ថ្វីដ្បិតតែជីវភាពមិនសម្បូរសប្បាយយ៉ាងណាក៏ដោយ ក៏ម្ដាយដែលតែងតែផ្ដល់តម្លៃអាទិភាពដល់ការសិក្សាអប់រំជានិច្ចកាល បានបញ្ជូនលោកទៅសាលាតាំងតែពីតូច និងឆ្លៀតពេលជួយបង្រៀនកូនៗផងដែរ។

លោកបានរំឭកថា៖ «ម្ដាយខ្ញុំគាត់ឲ្យតម្លៃលើការអប់រំណាស់។ ដោយសារតែកាលសម័យគាត់ ស្ត្រីរៀនអត់បានដល់ថ្នាក់ឌីប្លូមទេ»។

ជាមួយនឹងការតស៊ូព្យាយាមរៀនសូត្រ និងការជំរុញពីសំណាក់គ្រួសារលោក ឈាង វណ្ណារិទ្ធ ដែលជាសិស្សឆ្នើមពេលរៀននៅវិទ្យាល័យក្នុងក្រុងស្ទឹងសែន លោកបានប្រឡងជាប់សញ្ញាបត្រមធ្យមសិក្សាទុតិយភូមិក្នុងឆ្នាំ១៩៩៦ គ្រាដែលការប្រឡងត្រូវបានរៀបចំឡើងយ៉ាងហ្មត់ចត់ និងតឹងតែងជាទីបំផុត។

លោក វណ្ណារិទ្ធ បានដំណាលពីការប្រឡងនោះថា៖ «ពេលនោះការប្រឡងមានសភាពតឹងតែងណាស់។ ប៉ុន្ដែវាក៏ជាមោទនភាពមួយដែរពីព្រោះសិស្សតែ១០ភាគរយប៉ុណ្ណោះ ទូទាំងខេត្តដែលបានប្រឡងជាប់ហើយខ្ញុំទទួលបាននិទ្ទេសល្អបង្គួរ ថែមទៀតផង»។

សាស្ដ្រាចារ្យនៅ Leeds រូបនេះ បានបន្ដថា យ៉ាងណាមិញ នៅពេលផ្លាស់មកសិក្សាថ្នាក់បរិញ្ញាបត្រជំនាញគីមីវិទ្យានៅឯ វិទ្យាស្ថានបច្ចេកវិទ្យាកម្ពុជា(ITC) លោកបានជួបការលំបាកជាខ្លាំងដោយសារតែខ្វះធនធាន និងប្រាក់កាសទើបលោកសម្រេចចិត្តប្រឡងអាហារូបករណ៍ទៅសិក្សានៅប្រទេស វៀតណាម ហើយជាប់បានរៀនថ្នាក់បរិញ្ញាបត្រជំនាញការទូត និងទំនាក់ទំនងអន្តរជាតិនៅទីនោះតែម្ដង។

មូលហេតុដែលចាប់យកជំនាញការទូតនេះលោកបាននិយាយថា៖ «ខ្ញុំគិតថា ជំនាន់នោះគេនាំគ្នាសម្រុកទៅរៀនពេទ្យ ឬគ្រប់គ្រងជាដើម ខ្ញុំក៏នឹកឃើញរៀនជំនាញការទូតដែលវាខុសពីគេ និងមិនសូវមានអ្នករៀនទៀត»។

រហូតដល់បច្ចុប្បន្ននេះលោក វណ្ណារិទ្ធនៅតែជឿថា ជំនាញការទូតបាននាំឲ្យអ្នករៀនចេះពិតប្រាកដ និងមានចំណេះដឹងទូលំទូលាយពីសកលលោកមកជួបជុំគ្នា។ ជំនាញការទូតមិនមែនធ្វើការនៅតែជាមុខនាទីការទូតប៉ុណ្ណោះទេ ប៉ុន្ដែសូម្បីតែវិស័យឯកជនក៏គេត្រូវការអ្នកចេះវិស័យនេះដែរ។
ក្រោយពីទទួលបានបរិញ្ញាបត្រនៅឆ្នាំ២០០២ លោក វណ្ណារិទ្ធ បានត្រឡប់មកប្រទេសវិញ និងបម្រើការងារផ្នែកត្រួតពិនិត្យការដកហូតអាវុធជាតិផ្ទុះនៅ អង្គការជប៉ុនមួយមុននឹងលោកទទួលបានអាហារូបករណ៍ទៅរៀនថ្នាក់ អនុបណ្ឌិត និងបណ្ឌិតនៅជប៉ុនពីឆ្នាំ២០០៤ ដល់ឆ្នាំ២០០៩ ក្នុងជំនាញការទូតដែលលោកផ្ដោតសំខាន់លើតំបន់អាស៊ីប៉ាស៊ីហ្វិក។

ក្រោយពីបញ្ចប់ការសិក្សាទាំង២កម្រិតនេះ លោកត្រឡប់មកប្រឡូកនឹងការងារស្រាវជ្រាវនៅ CICP និងបានធ្វើការបោះពុម្ពផ្សាយការងារស្រាវជ្រាវជាប្រចាំរហូតកិច្ចការ ទាំងនេះក្លាយជាសមិទ្ធផលជាដុំកំភួន។ ចំណេះដឹង និងបទពិសោធការងារទាំងនេះលោកត្រូវបានជ្រើសរើសជាសាស្ត្រាចារ្យនៅ សាកលវិទ្យាល័យលីដស៍ក្នុងឆ្នាំ ២០១៣ ដែលនៅមុននេះលោកក៏ជាសាស្ត្រាចារ្យនៅតាមបណ្ដាសាកលវិទ្យាល័យនានា នៅក្រុងភ្នំពេញផងដែរ។

លោក ឈាង វណ្ណារិទ្ធ បានបន្ថែមថា៖ «[ក្នុងជំនាញទំនាក់ទំនងអន្តរជាតិ]អ្នកសិក្សាត្រូវឧស្សាហ៍តាមដាន ព្រឹត្តិការណ៍ជាតិ និងអន្តរជាតិនានាដូចជាកិច្ចប្រជុំកិច្ចចរចាផ្សេងៗ ហើយចេះចោទសួរថា ហេតុអ្វីបានជាគេសម្រេចចិត្តបែបនេះ? ហេតុអ្វីគេធ្វើទស្សនកិច្ចទៅប្រទេសនេះ ឬប្រទេសនោះ?»។

យុវជនកម្ពុជារូបនេះ ក៏បានផ្ដល់បទសម្ភាសជាមួយប្រព័ន្ធផ្សព្វផ្សាយកម្រិតពិភពលោកមួយ ចំនួន ដូចជា Al Jazeera និង Channel News Asia លើព្រឹត្តិការណ៍ពិភពលោកជាច្រើន។ លោកបញ្ជាក់ថា បើមានចំណេះដឹងផ្នែកទ្រឹស្ដី និងប្រមូលព្រឹត្តិការណ៍ព័ត៌មានហើយគេក៏ត្រូវឧស្សាហ៍ជួបពិភាក្សា ជាមួយនឹងអ្នកជំនាញដទៃទៀតដើម្បីបង្កើន និងផ្លាស់ប្ដូរយោបល់គំនិតពីគ្នាទៅវិញទៅមកដែរ។

វណ្ណារិទ្ធ ក្នុងនាមជាអ្នកយុទ្ធសាស្ត្រផ្នែកការទូត និងកិច្ចការអភិវឌ្ឍន៍ម្នាក់ លោកជឿជាក់ថា ចំណែកធំនៃថវិកាជាតិគួរចាក់ចូលទៅក្នុងការកែទម្រង់ និងអភិវឌ្ឍបំពាក់បំប៉នវិស័យអប់រំ និងវិស័យសុខភាពហើយត្រូវលុបបំបាត់ជំងឺបក្ខពួកនិយម។

ជាចុងក្រោយ លោកបានថ្លែងថា៖ «បើគ្មានសុខភាព គ្មានចំណេះដឹង សង្គមណាក៏មិនអាចអភិវឌ្ឍបានដែរ។ សង្គមយើងត្រូវឲ្យតម្លៃអ្នកចេះដឹង និងគតិបណ្ឌិតនានាហើយប្រជាជន និងនិស្សិតខ្លួនឯងក៏ត្រូវស្រឡាញ់ការអានដើម្បីបង្កើនចំណេះដឹងផង ដែរ»៕

អូន ឆេងប៉រ

ជប៉ុនធ្វើគម្រោងទេសចរណ៍ប្លែកៗលើផ្ទៃដី ៧០០ ហិកតានៅឧទ្យានគិរីរម្យ

Sat, 2 August 2014

សេត គឹមសឿន

ជាមួយនឹងទេសភាពខៀវខ្ចីបីដូចឋានសួគ៌បៃតងលាក់ខ្លួនកណ្តាល ព្រៃភ្នំ លាយឡំជាមួយនឹងផ្សែងអ័ព្ទនារដូវវស្សានោះ គិរីរម្យ ត្រូវបានគេដឹងថា ជាតារាបៃតងនៃរមណីយដ្ឋានធម្មជាតិដ៏ស្រស់ត្រកាលមួយដែលស្ថិតនៅមិន ឆ្ងាយប៉ុន្មានពីភ្នំពេញ។

គម្រោងសាងសង់ផ្ទះលូ ដ៏ប្លែកៗជាច្រើនកំពុងដំណើរការសាងសង់គួរឲ្យទាក់ទាញ ។

ពីមុន ប្រជាពលរដ្ឋកម្ពុជា ធ្លាប់តែទៅលេងកម្សាន្ត និងសម្រាកលម្ហែនៅក្នុងសម្រស់ព្រៃឈើពណ៌បៃតងខ្ចី ដែលភាគច្រើនជាដើមស្រល់ខ្ពស់ស្រោងឡើងសន្លឹម និងងូតទឹកជ្រោះត្រជាក់ល្ហឹមលេងកម្សាន្តតែប៉ុណ្ណោះ ប៉ុន្តែនៅពេលនេះ និងខាងមុខដ៏ខ្លី ភ្ញៀវទេសចរជាតិ និងអន្តរជាតិ នឹងកាន់តែមានភាពភ្ញាក់ផ្អើល និងប្លែកភ្នែកជាមួយនឹងគម្រោងអភិវឌ្ឍន៍តំបន់ទេសចរណ៍ដ៏ធំមួយឈ្មោះ ថា Kirirom Pine View Resort របស់ក្រុមហ៊ុន A Two A Co,. Ltd ជប៉ុន ដែលនឹងធ្វើឲ្យតំបន់ទេសចរណ៍ឧទ្យានជាតិគិរីរម្យ មានលក្ខណៈសម្បូរបែបទាំងកន្លែងស្នាក់នៅ និងកន្លែងកម្សាន្តប្លែកៗ ខណៈនៅពេលនេះ ការកសាងគម្រោងនោះកំពុងប្រព្រឹត្តទៅយ៉ាងសកម្ម។

លោក ហួរ ជិនហ៊ៅ អ្នកគ្រប់គ្រងផ្នែករបស់ Kirirom Pine View Resort បានឲ្យដឹងថា ដោយសារតែនៅគិរីរម្យសម្បូរដោយដើមស្រល់ស្រស់ស្អាត ដូច្នេះហើយទើបក្រុមហ៊ុនសម្រេចដាក់ឈ្មោះថា Pine View Resort។

លោកបានបន្តថា គម្រោងទេសចរណ៍ដ៏ធំនេះ ត្រូវបានរៀបចំឡើងនៅលើផ្ទៃដី ៧០០ ហិកតា ហើយនៅក្នុងគម្រោងនោះត្រូវបានបែងចែកជាបី គឺ គម្រោង Pine View Resort គម្រោង Construction A 2 A និង គម្រោង Future University។

បឹងកាឡូ និងផ្ទះបែបខ្មែរធ្វើសម្រាប់ទេសចរស្នាក់នៅ។ សេត គឹមសឿន

ជាជំហានដំបូងអ្វីដែលជាចំណាប់អារម្មណ៍ទាក់ទាញយ៉ាងខ្លាំង សម្រាប់ភ្ញៀវទេសចរជាតិ និងអន្តរជាតិនោះគឺ គម្រោង Pine View ដែលនៅក្នុងគម្រោងនេះ គឺផ្តោតទៅលើការសាងសង់រមណីយដ្ឋានប្លែកៗ និងភោជនីយដ្ឋាន។

លោក ជិនហ៊ៅ បាននិយាយថា៖«នៅក្នុងជំហានដំបូងនេះ យើងកំពុងធ្វើលើគម្រោង Pine View Resort គឺយើងសាងសង់កន្លែងស្នាក់នៅប្លែកៗសម្រាប់ភ្ញៀវ ដូចជា បឹងកាឡូ ផ្ទះតង់ ផ្ទះលូ និងផ្ទះបែបខ្មែរជាដើម»។

ផ្ទះលូ ត្រូវបានទទួលការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរជាតិ និងអន្តរជាតិ ទៅលើគំនិតច្នៃប្រឌិតថ្មីៗប្លែកៗរបស់ខ្លួននៅក្នុងការសាងសង់ ដែលមើលទៅទិដ្ឋភាពនេះស្អាតប្លែកគួរឲ្យចង់គេងមិនចាញ់នៅបរទេស នោះទេ។ ផ្ទះលូ ត្រូវបានគេសាងសង់ឡើងពីលូស៊ីម៉ងត៍ធំមួយ ដោយធ្វើជើងទម្រ កុំឲ្យរមៀល ហើយនៅខាងក្នុងគេបានច្នៃធ្វើជាគ្រែសម្រាប់ដាក់ពូកដ៏ទន់ល្មើយ គួរឲ្យចង់គេង ជាមួយនឹងការរចនាធ្វើទ្វារបំពាក់ដោយវាំងនន និងកន្លែងដាក់អីវ៉ាន់យ៉ាងសុវត្ថិភាព។

សំណង់ផ្ទះតង់ជាច្រើននៅកណ្តាលព្រៃគួរឲ្យចង់ស្នាក់នៅ។ សេត គឹមសឿន

លោក ជិនហ៊ៅ បានបញ្ជាក់ថា៖ «នៅខាងក្នុងផ្ទះលូ គេរចនាឡើងយ៉ាងស្អាត ជាមួយការបំពាក់នូវឧបករណ៍ផ្សេងៗគួរឲ្យទាក់ទាញ តែនៅក្នុងផ្ទះលូនោះ បំពាក់តែកង្ហារប៉ុណ្ណោះ មិនមានម៉ាស៊ីនត្រជាក់ ឬទូរទស្សន៍ទេ ដោយសារតែទីនេះជាកន្លែងសម្រាកលម្ហែ(Relax) ដូច្នេះភាគច្រើនភ្ញៀវចូលចិត្តភាពស្ងប់ស្ងាត់បែបធម្មជាតិ ពិសេសអ្នកសាងសង់គេយល់ពីស្ថានភាពនៅគិរីរម្យនេះ គឺនៅពេលយប់វាត្រជាក់គ្រប់គ្រាន់សម្រាប់ការសម្រាក»។

ក្រៅពីកន្លែងស្នាក់នៅប្លែកៗ ដូចជា ផ្ទះលូ ផ្ទះតង់ និងផ្ទះបែបខ្មែរនោះ ក្រុមហ៊ុនរបស់ជប៉ុនមួយនេះ បានឲ្យដឹងថា Pine View Resort នៅមានកន្លែងកម្សាន្តលេងជាច្រើនទៀត ដូចជាកន្លែងសម្រាប់បោះតង់ស្នាក់នៅជាក្រុម កន្លែងលេងកីឡាជិះកង់ ជិះស្គីកង់ លេងបាល់ទាត់ហ្វូតសាល បាល់ទះ វាយសី តេនីស ហើយក៏មានសេវាជួលកង់ជិះកម្សាន្តផងដែរ។

ដោយឡែកអ្វីដែលនឹងកាន់តែចាប់អារម្មណ៍នោះ គឺ ក្រុមហ៊ុន A Two A Co,. Ltd នឹងសាងសង់សាកលវិទ្យាល័យដ៏ធំមួយឈ្មោះថា Future University នៅលើរមណីយដ្ឋានគិរីរម្យនេះ ដែលជាជំហានដំបូងនឹងមានវគ្គសិក្សាលើផ្នែក បច្ចេកវិទ្យាព័ត៌មាន (IT) និងភាសាជប៉ុន អង់គ្លេស។
លោក ជិនហ៊ៅ បានបញ្ជាក់ថា៖ «លោកនាយកម្ចាស់ក្រុមហ៊ុន គាត់ស្រឡាញ់ព្រៃឈើធម្មជាតិណាស់ ដូច្នេះគាត់ចង់ឲ្យប្រជាជននៅទីនេះមានការងារធ្វើ ពិសេសចង់ឲ្យសិស្សនៅទីនេះបានរៀនសូត្រនឹងគេ»។

លោក ហួរ ជិនហ៊ៅ បានលើកឡើងបន្តទៀតថា បន្ទាប់ពីបញ្ចប់ជំហានដំបូង ក្រុមហ៊ុននឹងមានគម្រោងថ្មីៗប្លែកៗជាច្រើនទៀត សម្រាប់ជំរុញឲ្យវិស័យទេសចរណ៍នៅទីនោះ មានការទាក់ទាញកាន់តែខ្លាំង ក្នុងនោះលោកក៏បានលើកឡើងពីគម្រោងចង់បង្កើតបន្ទប់ស្នាក់នៅ និងភោជនីយដ្ឋានលើដើមឈើ និងសេវាខ្សែរ៉តជាដើម។

លោកសង្ឃឹមថា បន្ទាប់ពីធ្វើការផ្សព្វផ្សាយរួច ទីនេះនឹងក្លាយជាកន្លែងដ៏ទាក់ទាញមួយសម្រាប់មនុស្សគ្រប់ជាតិសាសន៍ ដែលចង់មកលម្ហែលេងជាលក្ខណៈធម្មជាតិនៅពេលទំនេរ។
ជាមួយនឹងក្តីសង្ឃឹម លោក ជិនហ៊ៅ ក៏បានលើកឡើងពីកង្វល់មួយចំនួននៃដំណើរការអភិវឌ្ឍន៍ផងដែរ។ លោកឲ្យដឹងថា៖«យើងក៏មានបញ្ហាប្រឈមមួយចំនួនដែរ គឺនៅពេលនេះ ចំនួនទេសចរស្គាល់នៅមានកម្រិតនៅឡើយ ហើយអ្វីដែលពិសេសនោះ គឺបញ្ហាផ្លូវថ្នល់ឡើងមកកាន់គិរីរម្យ ដែលនៅពេលបានខូចខាតអស់ជាច្រើនអន្លើហើយ តែទោះបីជាយ៉ាងណាខ្ញុំសង្ឃឹមថា ភ្ញៀវទេសចរនឹងមានកំណើនខ្ពស់នៅពេលរមណីយដ្ឋានយើងធ្វើរួចរាល់នោះ»។

គួរបញ្ជាក់ថា ឧទ្យានជាតិព្រះសុរាម្រិត ឬឧទ្យានជាតិគិរីរម្យនេះ ត្រូវបានបង្កើតឡើង នៅក្នុងឆ្នាំ១៩៤០ ដោយនាយកដ្ឋានគង្គា និងរុក្ខាប្រមាញ់ គ្របដណ្ដប់លើផ្ទៃដីប្រមាណ ៨ ៤០១ហិកតា និងស្ថិតនៅលើខ្ពង់រាបមានរយៈកម្ពស់ពី ៣០០ ទៅ១ពាន់ម៉ែត្រពីនីវ៉ូសមុទ្រ។
រមណីយដ្ឋានឧទ្យានជាតិគិរីរម្យ ត្រូវបានយាងធ្វើព្រះរាជទស្សនកិច្ចដោយសម្ដេចព្រះបាទនរោត្ដម សីហនុ ជាលើកដំបូងតាមរយៈសត្វដំរី នៅឆ្នាំ១៩៤៤។
នៅគ្រានោះព្រះអង្គក៏បានសព្វព្រះរាជហឫទ័យ នឹងសម្រស់ព្រៃភ្នំធម្មជាតិលម្អដោយដើមស្រល់រេរា ទឹកជ្រោះធ្លាក់ជាអន្លើ និងសត្វម្រឹគីម្រឹគាជាច្រើនអម្បូរដែលរស់នៅទីនោះ។
ព្រះអង្គមានព្រះរាជតម្រិះថា៖ «ព្រៃស្រល់បែបនេះ មានតែនៅក្នុងប្រទេសបារាំងប៉ុណ្ណោះ ប៉ុន្តែមិននឹកស្មានថាព្រៃស្រល់នេះមាននៅក្នុងប្រទេសកម្ពុជាយើង ឡើយ»។
ទ្រង់ក៏បានរាជានុញ្ញាតឲ្យអ្នកជំនាញបច្ចេកទេសសិក្សា និងកំណត់ឈ្មោះតំបន់នេះថា «ខ្ពង់រាបគិរីរម្យ» និងត្រាស់បង្គាប់ឲ្យនាយកដ្ឋានគង្គា និងរុក្ខាប្រមាញ់សាងសង់ព្រះរាជដំណាក់ នៅត្រង់ចំណុចអូរខ្សាច់ស។ ក្រោយមកទៀតទ្រង់ក៏បានកសាងផ្លូវ និងស្ពាននានាទៅទូទាំងតំបន់គិរីរម្យសម្រាប់បម្រើឲ្យវិស័យទេសចរណ៍៕

Khmer Techno Innovation

Friday, October 17, 2014

ទឹកធ្លាក់ច្រកល្អៀង

Tuesday, September 2, 2014

ល្បីថា មាន់ដុត នៅភ្នំស្អាងឆ្ងាញ់, គួរតែទៅសាក!

ចំណុចពិសេសទាំង ៨ដែលប្រិយមិត្តគួរដឹងពេលទិញ iPhoneថ្មីយកមកប្រើលើកដំបូង

Friday, August 8, 2014

ឈាង វណ្ណារិទ្ធិ ពីក្មេងរកត្រី ដាំបន្លែចិញ្ចឹមគ្រួសារទៅជាសាស្ត្រាចារ្យនៅសាកលវិទ្យាល័យដ៏ល្បីនៅអង់គ្លេស

Friday, August 1, 2014

ជប៉ុនធ្វើគម្រោងទេសចរណ៍ប្លែកៗលើផ្ទៃដី ៧០០ ហិកតានៅឧទ្យានគិរីរម្យ

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

Ordered List

Definition List

Sample Text

Labels

Khmer Techno Innovation

Friday, October 17, 2014

ទឹកធ្លាក់​ច្រក​ល្អៀង

Tuesday, September 2, 2014

ល្បី​ថា មាន់​ដុត នៅ​ភ្នំ​ស្អាង​ឆ្ងាញ់​, គួរតែ​ទៅ​សាក​!

ចំណុច​ពិសេស​ទាំង​ ៨​ដែល​ប្រិយ​មិត្ត​​គួរ​ដឹង​ពេល​ទិញ​ iPhone​​ថ្មី​​យក​មក​ប្រើ​លើក​ដំបូង

Friday, August 8, 2014

Friday, August 1, 2014

ជប៉ុន​ធ្វើ​គម្រោង​​ទេសចរណ៍​ប្លែកៗ​លើ​ផ្ទៃដី​ ៧០០ ​ហិកតា​នៅ​ឧទ្យាន​គិរីរម្យ

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

ទឹកធ្លាក់ច្រកល្អៀង

ល្បីថា មាន់ដុត នៅភ្នំស្អាងឆ្ងាញ់, គួរតែទៅសាក!

ចំណុចពិសេសទាំង ៨ដែលប្រិយមិត្តគួរដឹងពេលទិញ iPhoneថ្មីយកមកប្រើលើកដំបូង

ជប៉ុនធ្វើគម្រោងទេសចរណ៍ប្លែកៗលើផ្ទៃដី ៧០០ ហិកតានៅឧទ្យានគិរីរម្យ