9:53 PM
ការផ្គត់ផ្គង់ប្រព័ន្ធសេវាទូរសព្ទបានរីករាលដាលយ៉ាងធំទូលាយ
ដល់ប្រជាពលរដ្ឋរស់នៅសហរដ្ឋអាមេរិក
ក្រោមការផ្ដល់ដោយក្រុមហ៊ុនធំៗជាច្រើន។ ថ្ងៃនេះ Sabay
ណែនាំឲ្យអ្នករាល់គ្នា ស្គាល់បណ្ដាក្រុមហ៊ុនធំទាំង ៤
ក្នុងសហរដ្ឋអាមេរិករួមមាន Verizon Wireless, AT&T Mobility,
T-Mobile US និង Sprint Corporation។
១. Verizon:
គិតត្រឹមខែមេសា ឆ្នាំ ២០១៧ ក្រុមហ៊ុន Verizon Wireless បានឈរនៅលំដាប់កំពូលនៃក្រុមហ៊ុនទូរគមនាគមន៍នៅអាមេរិក។ បង្កើតឡើងជាលើកដំបូងនៅឆ្នាំ ២០០០ មកទល់បច្ចុប្បន្នមានអ្នកប្រើសរុបប្រមាណ ១៤៦ លាននាក់ ។
ក្រុមហ៊ុនមានការិយាល័យកណ្ដាលនៅអាមេរិកមួយនេះ បានគ្របដណ្ដប់ប្រព័ន្ធ 4G LTE ប្រមាណ ៩៨% នៃអ្នកប្រើសរុប។ ផ្ដល់ឲ្យអតិថិជនអាចប្រើប្រាស់ទៅបាន ផ្អែកលើការគាំទ្រនៃឧបករណ៍ទៅនឹងប្រព័ន្ធប្រតិបត្តិខ្លួន។ កន្លងទៅនាឆ្នាំ ២០១៥ ក្រុមហ៊ុនយក្សមួយនេះ ក៏បានប្រកាសពីគម្រោងបង្កើតឡើងនូវប្រព័ន្ធផ្គត់ផ្គង់ជំនាន់ទីប្រាំ 5G ក្នុងពេលខាងមុខផងដែរ។
២. AT&T:
AT&T ត្រូវបានបង្កើតឡើងជាលើកដំបូងនៅថ្ងៃទី ៥ តុលាឆ្នាំ ១៩៨៣ បច្ចុប្បន្នខ្លួនមានការិយាល័យកណ្ដាលក្នុងទីក្រុង Dellas រដ្ឋ Texas សហរដ្ឋអាមេរិក។ AT&T ពីមុនធ្លាប់គ្រប់គ្រងដោយក្រុមហ៊ុន BellSouth និង SBC Communications នាចន្លោះឆ្នាំ ២០០០ ដល់ ២០០៧ ប៉ុន្តែក្រោយមកក៏ប្ដូរមកដាក់ឈ្មោះ AT&T Mobility វិញ និងមាន CEO ថ្មី លោក Randall L. Stephenson កាន់តំណែងនាថ្ងៃទី ៩ ឧសភា ឆ្នាំ ២០០៧។
ស្ថិតក្នុងលំដាប់ទី២ មានអ្នកប្រើប្រមាណ ១៣៤ លាននាក់ ក្រុមហ៊ុននេះក៏ធ្លាប់ប្រកាសទិញក្រុមហ៊ុន T-Mobile USA ក្នុងតម្លៃ ៣៩ ពាន់លានដុល្លារ នាឆ្នាំ ២០១១ ប៉ុន្តែត្រូវបានបរាជ័យ ក្រោយមានការជំទាស់ពីក្រុមហ៊ុនផ្គត់ផ្គង់សេវាទូរសព្ទចល័តដទៃទៀត ព្រោះខ្លាចមានការធ្លាក់ចុះនៃការប្រកួតប្រជែងលើទីផ្សារ។
៣. T-Mobile:
ក្រុមហ៊ុន T-Mobile US ស្ថិតក្រោមការគ្រប់គ្រងរបស់ក្រុមហ៊ុនប្រទេសអាល្លឺម៉ង់ Deutsche Telekom បច្ចុប្បន្នមានការិយាល័យកណ្ដាលក្នុងទីក្រុង Bellevue រដ្ឋ Washington សហរដ្ឋអាមេរិក។ CEO លោក John Legere បានឡើងកាន់តំណែងចាប់តាំងពីថ្ងៃទី ២២ កញ្ញាឆ្នាំ ២០១២។ គិតត្រឹមត្រីមាសទី ១ ឆ្នាំ ២០១៧ ខ្លួនមានអ្នកប្រើសរុបដល់ទៅ ៧២.៦ លាននាក់ក្នុងទឹកដីអាមេរិក។
ជារៀងរាល់ឆ្នាំខ្លួនអាចរកចំណូលប្រហែល ៣៧ ពាន់លានដុល្លារ ហើយដោយចង់មានការប្រកួតប្រជែងខ្ពស់ T-Mobile US បានដាក់ឲ្យប្រើនូវប្រព័ន្ធ 4G នាឆ្នាំ ២០០៣ និងកំពុងវិវត្តទៅតំបន់ផ្សេងទៀតជាបន្តបន្ទាប់មកទល់សព្វថ្ងៃ។
៤. Sprint Corporation:
Sprint មានដើមកំណើតដំបូងចេញពីក្រុមហ៊ុន Telephone Company នាឆ្នាំ ១៨៩៩ ប៉ុន្តែនៅឆ្នាំ ២០១៣ ក្រុមហ៊ុននេះបានលក់ទៅឲ្យក្រុមហ៊ុនប្រទេសជប៉ុន SoftBank Group។ បច្ចុប្បន្នមានការិយាល័យកណ្ដាលក្នុងទីក្រុង Overland Park រដ្ឋ Kansas សហរដ្ឋអាមេរិក។ មាន CEO លោក Marcelo Claure អាចជួយរកចំណូលកាលពីឆ្នាំ ២០១៦ កន្លងទៅបាន ៣២.១៨ ពាន់លានដុល្លារ។
ក្រុមហ៊ុនមានបុគ្គលិកបម្រើការជាង ៣ ម៉ឺននាក់មួយនេះ គិតត្រឹមត្រីមាសទី ១ ឆ្នាំ ២០១៧ ខ្លួនទទួលបានអតិថិជនអ្នកប្រើប្រាស់សរុប ៥៩.៧ លាននាក់ ជាប់ជាក្រុមហ៊ុនលំដាប់ទី ៤ នៅអាមេរិក៕
The Largest Telecom Providers in the United States
| Rank | Provider Name | Subscribers (Millions) |
|---|---|---|
| 1 | Verizon Wireless | 146 |
| 2 | AT&T Mobility | 134.2 |
| 3 | T-Mobile US | 72.6 |
| 4 | Sprint Corporation | 59.7 |
| 5 | U.S. Cellular | 5 |
0 comments:
Post a Comment