September 2015 ~ Khmer Techno Innovation

មូលដ្ឋានគ្រឹះនៃការថតរូប មេរៀនទី៣៖ ISO

ដោយ Victor A 3 May 2013

មេរៀនថតរូបនេះឧបត្ថមដោយ Canon Imaging Academy (CIA)

សួស្តីមិត្តអ្នកអានទាំងអស់ដែលស្រលាញ់ការថតរូប ខ្ញុំសង្ឃឹមថាអ្នកទាំងអស់គ្នាបានអាននិង សាកល្បងនូវការប្រើប្រាស់ Shutter Speed ដែលខ្ញុំបានពន្យល់ក្នុង មេរៀនទី២ កាលពីសប្ដាហ៍មុនរួចហើយ ក្នុង ថ្ងៃនេះខ្ញុំចង់លើកយកមេរៀនទី៣ អំពី ISO ដែលជាផ្នែកមួយសំខាន់ក្នុងចំណោមមុខងារទាំងបីដែលទ្រទ្រង់សោភ័ណ ភាពរបស់រូប។

ISO វាសំគាល់កម្រិតនៃការទទួលយកពន្លឺរបស់ Sensor នៅក្នុងម៉ាស៊ីនថត ។ ប្រសិនបើយើងប្រើ ISO លេខតូចមានន័យថា Sensor ទទួលយកពន្លឺបានតិច ចំណែកឯ ISO លេខធំ នោះមានន័យថាកម្រិតទទួលយកពន្លឺរបស់ Sensor បានច្រើន វាពិតជាជំនួយក្នុងការថតរូបភាពនៅកន្លែងខ្វះពន្លឺ និងពេលយប់។ យ៉ាងណាមិញវាមានចំណុចអវិជ្ជមានមួយនៅត្រងថាវាបន្ថែម Noise (គ្រាប់ល្អិត) អោយរូបភាព។

វិឌីអូខាងក្រោមបង្ហាញពីរបៀបផ្លាស់ប្តូរ ISO៖

https://www.youtube.com/watch?v=nesDxrT9R0E

តាមការបញ្ជាក់ពីខាងដើម លេខ ISO ទាបឬខ្ពស់ មានផលវិជ្ជមាននិងអវិជ្ជមានរៀងៗខ្លួន វាអាស្រ័យលើស្ថានភាពពន្លឺនិងទីតាំងថតរូប ។

ខាងក្រោមជារង្វាស់ខ្នាតមួយកម្រិតៗនៃ ISO និងការប្រៀបធៀបលេខ ISO ទាបនិងខ្ពស់

ចំណាំ៖ តែទោះបីជាយ៉ាងអ្នកគួរព្យាយាមប្រើ ISO អោយបានទាបតាមកាលៈទេសៈដែលអាចធ្វើទៅបាន ព្រោះបើអ្នកប្រើ ISO ទាប គុណភាពរបស់រូបថតរក្សាបានកាន់តែល្អ។

សូមធ្វើការសង្កេតនូវរូបភាពខាងក្រោមទាំងពីរនេះដែលត្រូវបាន ថតដោយម៉ាស៊ីនថតតែមួយ Canon 60D ហើយប្រើលេខ ISO ខុសគ្នា ខាងឆ្វេង ISO 200 & ខាងស្តាំ ISO 1600៖

លទ្ធផលនៃសង្កេត៖ ខ្ញុំជឿថាអ្នកទាំងអស់គ្នាមិនអាចមើលឃើញភាពខុសគ្នារវាងរូប ទាំងពីរនោះទេ ។ ប៉ុន្តែយើងទៅសង្កេតរូបភាពបន្ទាប់ខាងក្រោមដែលខ្ញុំបានពង្រីក អោយធំជាងមុន

នៅពេលនេះ ខ្ញុំច្បាស់ថាអ្នកទាំងអស់គ្នាអាចសង្កេតឃើញភាពខុសគ្នា ។ រូបភាពនៅខាងស្ដាំដែលថតដោយ ISO 1600 មានគ្រាប់គ្រើមល្អិតៗ ដែលភាសាអង់គ្លេស និងអ្នកថតរូបអាជីពហៅថា “Noise” ។

ខាងក្រោមនេះជារូបដដែល ប៉ុន្តែខ្ញុំពង្រីកអោយធំជាងមុន៖

អ្នកអាចសង្កេតឃើញកាន់តែច្បាស់ ហើយថារូបភាពដែលនៅខាងស្តាំបង្ហាញគ្រាប់ល្អិតនិងគ្រើមជាងរូបនៅ ខាងឆ្វេង មានន័យថានៅពេលដែលអ្នកថតរូបដោយប្រើ ISO ខ្ពស់វានឹងបន្ថែមគ្រាប់ល្អិតៗ ឬ Noise ដែលមានផលប៉ះពាល់នៅក្នុងការផ្ដិតរូបខ្នាតធំ ។ នេះមិនមានន័យថា ម៉ាស៊ីនថតទាំងអស់ (ខុសម៉ូដែលគ្នា) ថតនៅ ISO ដូចគ្នាមានគុណភាពរូបដូចគ្នានោះទេ។ ខាងក្រោមនេះជាឧទាហរណ៍បញ្ជាក់ ៖

រូបនៅខាងឆ្វេងខ្ញុំប្រើកាំមេរ៉ា Canon 60D និងនៅខាងស្តាំខ្ញុំប្រើ Sony DSC-T200 ដែលថតឡើងក្នុងកម្រិត ISO 1600 ដូចគ្នា ។ ក្នុងរូបនេះអ្នកមិនអាចមើលឃើញភាពខុសគ្នានោះទេ ។ ខ្ញុំសូមបង្ហាញរូបខាងក្រោមបន្ទាប់ដែលធ្វើការពង្រីកឲ្យកាន់តែជិត

អ្នកអាចឃើញច្បាស់ហើយថារូបនៅខាងស្តាំថតដោយ Sony DSC – T200 បង្ហាញគ្រាប់ល្អិតនិងគ្រើម (Noise) បើទោះបីជាថតនៅក្នុងកម្រិត ISO ដូចគ្នាក៏ដោយ ។

ខាងក្រោមជាការបៀបធៀបរូបដែលថតដោយ ម៉ាស៊ីនថត Canon 60D សម័យក្រោយ ថតនៅ ISO ខ្ពស់ ជាមួយនឹង ម៉ាស៊ីនថត Sony DSC – T200 សម័យមុន ថតនៅ ISO ទាប

តាមការសង្កេតយើងឃើញថា រូបខាងឆ្វេងបើទោះបីជាថតនៅ កម្រិត ISO 1600 (ខ្ពស់) ក៏ដោយក៏រូបភាពនេះមានគុណភាពច្បាស់ល្អ ជាងរូបនៅខាងស្តាំដែលថតដោយ Sony ក្នុងកម្រិត ISO 200 (ទាប) ។
ក្នុងស្ថានភាពបែបណាដែលយើងគួរប្រើ ISO ទាប សូមចង់ចាំការពន្យល់ខាងក្រោម៖

អ្នកគួរប្រើ ISO ទាប (100) ក្នុងស្ថានភាពដូចរូបខាងក្រោម៖

រូបខាងក្រោមគឺថតនៅពេលយប់ ខ្វះពន្លឺ តាមទ្រឹស្តី គួរតែប្រើ ISO ខ្ពស់ ប៉ុន្តែយើងអាចប្រើ Flash (ភ្លើងជះពន្លឺជំនួយ) បានដូច្នេះអ្នកអាចប្រើ ISO 100 (ទាប)៖

រូបខាងក្រោមខ្ញុំបានថតនៅក្នុងកម្រិត ISO 100 ដូចគ្នាបើទោះបីជារូបនេះថតពេលយប់ និងខ្វះពន្លឺក៏ដោយ។ វាអាចធ្វើទៅ បានដោយសារខ្ញុំប្រើ Tirpod (ជើងកាំមេរ៉ា) និងប្រើ Shutter Speed យឺត ។

ក្នុងស្ថានភាពបែបណាដែលយើងគួរប្រើ ISO ខ្ពស់ សូមចង់ចាំការពន្យល់ខាងក្រោម៖

អ្នកគួរប្រើ ISO ខ្ពស់ (100) ក្នុងស្ថានភាពដូចរូបខាងក្រោម៖

រូបភាពនេះថតនៅកម្រិត ISO 1000 ដោយហេតុថា ខ្ញុំថតក្នុងកន្លែងខ្វះពន្លឺនិង គេមិនអនុញ្ញាតិអោយប្រើ Flash ដោយសារថាអាចបង្កការរំខានដល់សត្វ ។

រូបនេះត្រូវបានថតក្នុងកម្រិត ISO 800 នៅក្នុង Indoor Park (Genting Highland, Malaysia) ស្ថានភាពជាក់ស្ដែងគឺខ្វះពន្លឺ និងខ្ញុំត្រូវប្រើ Shutter Speed លឿនល្មមអាចចាប់យកសកម្មភាពនានាបាន ដូច្នេះខ្ញុំត្រូវតែប្រើ ISO ខ្ពស់ ។

រូបនេះខ្ញុំប្រើ ISO 3200 ថតនៅ ផ្សាររាត្រី ភ្នំពេញ មូលហេតុមានពីរ គឺស្ថានភាពជាក់ស្ដែងខ្វះពន្លឺ និងខ្ញុំចង់បន្ថែមភាពច្នៃប្រឌិត អោយរូបនេះមានគ្រាប់ល្អិតដូចរូបថតសម័យបុរាណ។
សង្ខេបមេរៀន៖

ជួបគ្នាពេលក្រោយជាមួយនឹងមេរៀនដែលនិយាយអំពីទំនាក់ទំនងរវា Aperture & Shutter Speed & ISO ។ កុំភ្លេចណាសាកល្បងថតដោយធ្វើការផ្លាស់ប្តូរ Aperture និង Shutter និង ISO នៅពេលថតរូប ។ មានសំនួរនិងមតិផ្សេងៗ សូមដាក់ក្នុងប្រអប់មតិខាងក្រោមនេះ សូមអរគុណ ៕
សម្រាប់អ្នកមិនទាន់បានឆ្លងកាត់មេរៀនទី១ សូមចុចត្រង់នេះ និងមេរៀនទី២ សូមចុចត្រង់នេះ

«មេរៀន-ថតរូបនេះឧបត្ថមដោយ Canon Imaging Academy (CIA) ។ CIA គឺជាសាលាបង្រៀនថតរូបរបស់ក្រុមហ៊ុន Canon ដែលស្ថិតនៅ i-Qlick Canon Showroom ផ្ទះលេខ ១៤៦ មហាវិថី ព្រះសីហនុ រាជធានីភ្នំពេញ ។ CIA ផ្តល់ជូននូវវគ្គសិក្សាថតរូប និងសិក្ខាសាលាជាច្រើនដូចជា ថ្នាក់មូលដ្ឋាននៃការថតរូប ថតទេសភាព ថតម៉ូដែល សិក្សាពន្លឺក្នុងស្ទួតឌីយ៉ូ និងថ្នាក់ផ្សេងៗទៀត ។ សម្រាប់ព័ត៌មានបន្ថែមសូមចូលទៅកាន់ទំព័រ Facebook របស់ក្រុមហ៊ុន i-Quick : https://www.facebook.com/iQlickCambodia »

មូលដ្ឋានគ្រឹះនៃការថតរូបមេរៀនទី២៖ Shutter Speed

ដោយ Victor A 26 April 2013

មេរៀនថតរូបនេះឧបត្ថមដោយ Canon Imaging Academy (CIA)

កាលពីមេរៀនទី១ ខ្ញុំបានបង្ហាញរួចហើយទាក់ទងទៅនឹងការប្រើប្រាស់ក៏ដូចជា មុខងាររបស់ Aperture ដែលអាចកំណត់ពន្លឺនិងបណ្ដុំរូបភាពច្បាស់នៅក្នុងប្លង់។ នៅក្នុងមេរៀននេះ អ្នកនឹងស្វែងយល់អំពី Shutter Speed ដែលវាសំគាល់អំពីរយៈពេលដែលបន្ទះ Shutter នៅបើកចំហខណៈពេលដែលម៉ាស៊ីនថតចាប់យករូបភាព។ Shutter បើកកាន់តែយូរ ពន្លឺកាន់តែច្រើនចូលទៅកាន់ Sensor របស់ម៉ាស៊ីនថត ផ្ទុយមកវិញប្រសិនបើ Shutter បើករយៈពេលខ្លី ពន្លឺចូលទៅកាន់ Sensor ម៉ាស៊ីនថតកាន់តែតិច។

Shutter Speed មានរង្វាស់ខ្នាតជាវិនាទីឬជាប្រភាគនៃវិនាទី ខាងក្រោមនេះជាកម្រិតគោលនៃ Shutter Speed ។

ចំណាំ៖ Shutter Speed: 1 sec យឺតជាង 1/2 sec និងបន្តបន្ទាប់រហូតដល់ 1/500 sec ដែលជាល្បឿនលឿនជាងគេក្នុងតារាងខាងលើ ។ ពីមួយកម្រិត 1 sec មានពន្លឺចូលច្រើនជាងពីរដងនៃ Shutter Speed 1/2 sec និងបន្តបន្ទាប់គ្នា ។ វាមានភាពស្រដៀងគ្នាទៅនឹង Aperture ឬ F-stop ដែរ។ សម្រាប់ការបង្ហាញលេខ Shutter Speed លើម៉ាស៊ីនថតវាខុសគ្នាពីការបង្ហាញនៅក្នុងទ្រឹស្ដីដូចមានបង្ហាញ ក្នុងរូបខាងលើស្រាប់ ។

ឧទាហរណ៍៖ Shutter speed 1 sec វានឹងបង្ហាញលើម៉ាស៊ីនជា 1″ ដូចការបង្ហាញក្នុងរូបខាងក្រោម ចំពោះ Shutter speed តូចជាង 1 sec វានឹងបង្ហាញជា 15″ មានន័យថា 15 sec ឬពេលខ្លះ ០”5 មានន័យថា 0.5 sec ៖

រីឯ Shutter speed 1/500 sec វានឹងបង្ហាញលើម៉ាស៊ីនជាលេខ 500

ខាងក្រោមនេះជាវិឌីអូបង្ហាញពីរបៀបប្តូរ Shutter speed លើម៉ាស៊ីនថតជាក់ស្ដែង៖

https://www.youtube.com/watch?t=1&v=oxIRWmpRGC4

ជើងកាមេរ៉ាអាចជួយកាត់បន្ថយភាពព្រិលមិនច្បាស់ដោយសារភាពញ័របាន

Shutter speed ដែលសមរម្យវាអាស្រ័យទៅលើប្រភេទកែវឆ្លុះដែលលោកអ្នកប្រើ៖

ចំណាំ: កែវឆ្លុះភាគច្រើននាសម័យថ្មីនេះមានមុខងារម្យ៉ាងឈ្មោះ Image Stabilization ដែលអាចជួយកាត់បន្ថយភាពញ័រដែលបណ្ដាលអោយមានរូបភាពព្រិលមិន ច្បាស់ ។

Shutter Speed មានមុខងារមួយទៀតនៅក្នុងការផ្ដិតយករូបភាព គឺវាអាចចាប់យករូបភាពដែលមានសកម្មភាពរហ័ស ។ សូមមើលការពន្យល់ខាងក្រោម៖

ខាងក្រោមនេះជាឧទាហរណ៍ដែលបង្ហាញពីការថតរូបភាពដែលមានសកម្មភាព លឿនដោយប្រើល្បឿន Shutter speed ផ្សេងៗពីគ្នា និងឧទាហរណ៍នៅក្នុងការប្រើ Shutter speed យឺតក្នុងការចាប់យករូបភាពនៅពេលយប់ ដោយប្រើជាមួយ Tripod ។

នេះជារូបភាពថតដោយប្រើ Shutter Speed 1/15 sec ឬ 15 លើម៉ាស៊ីនថត បង្ហាញរូបភាពមានចលនាមិនច្បាស់

នេះជារូបភាពថតដោយប្រើ Shutter Speed 1/30 sec ឬ 30 លើម៉ាស៊ីនថត បង្ហាញរូបភាពមានចលនាមិនច្បាស់

នេះជារូបភាពថតដោយប្រើ Shutter Speed 1/60 sec ឬ 60 លើម៉ាស៊ីនថត បង្ហាញរូបភាពមានចលនាមិនច្បាស់

នេះជារូបភាពថតដោយប្រើ Shutter Speed 1/125 sec ឬ 125 លើម៉ាស៊ីនថត បង្ហាញរូបភាពមានចលនាមិនច្បាស់

នេះជារូបភាពថតដោយប្រើ Shutter Speed 1/250 sec ឬ 250 លើម៉ាស៊ីនថត បង្ហាញរូបភាពមានចលនារាងច្បាស់ ប៉ុន្តែនៅមិនទាន់ល្អ

នេះជារូបភាពថតដោយប្រើ Shutter Speed 1/500 sec ឬ 500 លើម៉ាស៊ីនថត បង្ហាញរូបភាពមានចលនារាងច្បាស់

នេះជារូបភាពថតដោយប្រើ Shutter Speed 1/1000 sec ឬ 1000 លើម៉ាស៊ីនថត បង្ហាញរូបភាពមានចលនាច្បាស់ដូចនៅនឹងថ្កល់។

ចំណាំ៖ ល្បឿននៃរូបមានសកម្មភាពកាន់តែលឿន អ្នកត្រូវការកំណត់ Shutter speed កាន់តែធំ ដើម្បីចាប់យករូបភាពអោយនៅនឹងថ្កល់និងច្បាស់ល្អ ។

រូបភាពឧទ្ធម្ភាគចក្រខាងក្រោមនេះថតឡើងដោយល្បឿន 1/400 យើងសង្កេតទាំងអស់គ្នា ។ តួនិងកន្ទុយឧទ្ធម្ភាគចក្រមានភាពនឹងថ្កល់និងច្បាស់ល្អ ប៉ុន្តែស្លាបកង្ហារទាំងពីរវិញនៅមានភាពព្រិល នេះដោយសារ Shutter spedd 1/400 វាលឿនគ្រប់គ្រាន់ក្នុងការចាប់យកតួនិងកន្ទុយឧទ្ធម្ភាគចក្រ តែមិនទាន់លឿនគ្រប់គ្រាន់ក្នុងការចាប់យកកង្ហារទាំងពីរនោះទេ ៖

ស្ថានភាពផ្សេងគ្នា ប្រើ Shutter speed ផ្សេងគ្នាដែរ៖

Shutter speed: 1/250 សម្រាប់ថតកូនក្មេងរត់

Shutter speed: 1/500 សម្រាប់ថតសត្វ

Shutter speed: 1/640 សម្រាប់ថតសកម្មភាពកីឡាតាមទីសាធារណៈ

Shutter speed: 2.5 sec ឬ 2″5 សម្រាប់ពេលយប់ខ្វះពន្លឺ

Shutter speed: 20 sec ឬ 20″ សម្រាប់ថតពេលយប់នឹងបន្ថែមភាពឆ្នៃប្រឌិតអោយមានរាងព្រិល

Shutter speed: 1/30 sec ថតពេលថ្ងៃដោយរំកិលម៉ាស៊ីនថតតាមកម្មវត្ថុក្នុងរួបអាចបន្ថែមភាពច្នៃប្រឌិតផងដែរ ។

សង្ខេបមេរៀន

ជួបគ្នាពេលក្រោយជាមួយនឹងមេរៀន ISO ។ កុំភ្លេចណាសាកល្បងថតដោយធ្វើការផ្លាស់ប្តូរ Aperture និង Shutter ។ មានសំនួរនិងមតិផ្សេងៗ សូមដាក់ក្នុងប្រអប់មតិខាងក្រោមនេះ សូមអរគុណ ៕
សម្រាប់អ្នកមិនទាន់បានឆ្លងកាត់មេរៀនទី១ សូមចុចត្រង់នេះ

មូលដ្ឋានគ្រឹះនៃការថតរូប មេរៀនទី១៖ Aperture

ដោយ Victor A 20 April 2013

មេរៀនថតរូបនេះឧបត្ថមដោយ Canon Imaging Academy (CIA)

រូបភាពមួយដែលស្អាតហើយច្បាស់ល្អ ត្រូវមានលក្ខណៈសម្បត្តិច្រើនយ៉ាងក្នុងនោះគេរាប់បញ្ចូលចាប់តាំង ពីភាពឆ្នៃប្រឌិត (Creativity) ប្លង់ (Composition) និងពន្លឺគ្រប់គ្រាន់ (Lighting) ។ល។ លក្ខណៈសម្បត្តិទាំងអស់នោះគេហៅថា Exposure ។ សម្រាប់អ្នកប្រើ ប្រាស់ម៉ាស៊ីនថត DSLR អាចធ្វើការកំណត់នូវមុខងារបីដែលអាចធ្វើអោយរូបថតមានសោភ័ណ គ្រប់គ្រាន់ (Good Exposure) ។ ប៉ុន្តែមុននឹងនិយាយអំពីមុខងារទាំងបីអ្នកទាំងអស់គ្នាកំពុងមាន ចម្ងល់ថាអ្វីទៅជាម៉ាស៊ីនថត DSLR (Digital Single-Lens Reflex – ជាប្រភេទម៉ាស៊ីនថតឌីជីថលដែលប្រើប្រាស់ប្រព័ន្ធកញ្ចក់ឆ្លុះនិង ចំណាំងផ្លាតក្នុងការនាំពន្លឺនិងរូបភាពពីកែវខាងមុខទៅកាន់ Sensor និងកែវឆ្លុះខាងក្រោយនៃម៉ាស៊ីនថត) ។

មុខងារទាំងបីដែលកំណត់នូវសោភ័ណភាព រូបថត នោះមានដូចជា Aperture, Shutter Speed និង ISO។ នៅក្នុង Lens (កែវឆ្លុះនីមួយៗវាមានប្រហោងដែលអនុញ្ញាតអោយពន្លឺចូលទៅកាន់ ម៉ាស៊ីនថត ទំហំនៃមុខកាត់ដែលបើកនោះគេអោយហៅថា Aperture

ចំណែក នៅក្នុងម៉ាស៊ីនថតមានបន្ទះបិទបើកមានតួនាទីដូចទ្វារ វាបើកនៅពេលយើងចុចថតចាប់យករូបភាព រួចហើយបិទទៅវិញ ។ សម្រាប់ម៉ាស៊ីនថត DLSR ប្រភេទនេះយើងអាចកំណត់រយៈពេលដែលបន្ទះនោះនៅបើកហើយរយៈពេលដែល បន្ទះនេះបើកយើងហៅថា Shutter Speed។ ចំណែកឯនៅក្នុងតួម៉ាស៊ីនថតមាន Sensor ហើយការកម្រិតនៃការទទួលយកពន្លឺរបស់ Sensor គេហៅថា ISO។

Aperture មានមុខងារកំណត់កម្រិតពន្លឺចូលទៅក្នុងម៉ាស៊ីនថត

ការកំណត់ Aperture យើងត្រូវប្រើមុខងារ F-Stops ។ តម្លៃ F-stop អាចមើលឃើញនៅក្នុង View Finder ក៏ដូចជាអេក្រង់ LED ខាងលើ។

វិឌីអូបង្ហាញពីរបៀបផ្លាស់ប្តូរ F-stop

https://youtu.be/C1e0t_i4lwQ

អ្វីជា F-Stop? ខាងក្រោមនេះជារូបមន្ត F-Stop ៖

នេះជាចំណុចដែលធ្វើអោយមានការភាន់ច្រឡំជាច្រើនសម្រាប់អ្នករៀនពី Aperture

ខាង ក្រោមនេះជាកម្រិតលេខនៃ F-stop ដែលពីលេខមួយទៅមួយវាកំណត់កម្រិតពន្លឺចូលច្រើនជាងឬតិចជាង 2 ដង។ ឧទាហរណ៍៖ f/2 មានកម្រិតពន្លឺថយ២ដងតិចជាង f/1.4

ការកំណត់ F-stop ជាក់ស្ដែងលើម៉ាស៊ីនថត៖

https://youtu.be/eEn2Pc2AK4M

សម្រាប់កែវឆ្លុះផ្សេងគ្នា F-stop ក៏អាចផ្លាស់ប្តូរផ្សេងគ្នាដែរ៖

https://youtu.be/ro77Z9AY0wk

Aperture ក្រៅពីកំណត់កម្រិតពន្លឺ វាក៏មានមុខងារកំណត់ផងដែរនូវបណ្ដុំរូបភាពច្បាស់ក្នុងប្លង់ ដែលគេហៅថា Depth of Field (DOF)

ទំនាក់ទំនង F-stop នឹង DOF (បណ្ដុំរូបភាពច្បាស់ក្នុងប្លង់)

សង្ខេបទំនាក់ទំនង F-stop នឹង DOF

រូបថតឧទាហរណ៍ពេលដែលប្រើ F-stop ផ្សេងគ្នា ។ F/22 បណ្ដុំភាពច្បាស់មានច្រើនក្នុងប្លង់

F/4 បណ្ដុំភាពច្បាស់មានតិចក្នុងប្លង់

សង្ខេបមេរៀនទី១ ៖ Aperture

សូមកុំភ្លេចតាមដានមេរៀនក្រោយទៀត។ សម្រាប់សំនួរផ្សេង សូមដាក់បញ្ចូលក្នុងប្រអប់បញ្ចេញមតិខាងក្រោម៕

Khmer Techno Innovation

Wednesday, September 30, 2015

មូលដ្ឋានគ្រឹះនៃការថតរូប មេរៀនទី៣៖ ISO

មូលដ្ឋានគ្រឹះនៃការថតរូបមេរៀនទី២៖ Shutter Speed

មូលដ្ឋានគ្រឹះនៃការថតរូប មេរៀនទី១៖ Aperture

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

Ordered List

Definition List

Sample Text

Labels

Khmer Techno Innovation

Wednesday, September 30, 2015

មូលដ្ឋាន​គ្រឹះ​នៃ​ការ​ថត​រូប មេរៀន​ទី​៣៖ ISO

មូលដ្ឋាន​គ្រឹះ​នៃ​ការ​ថត​រូបមេរៀន​ទី​២៖ Shutter Speed

មូលដ្ឋាន​គ្រឹះ​នៃ​ការ​ថត​រូប មេរៀន​ទី​១៖ Aperture

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

មូលដ្ឋានគ្រឹះនៃការថតរូប មេរៀនទី៣៖ ISO

មូលដ្ឋានគ្រឹះនៃការថតរូបមេរៀនទី២៖ Shutter Speed

មូលដ្ឋានគ្រឹះនៃការថតរូប មេរៀនទី១៖ Aperture