October 2017 ~ Khmer Techno Innovation

Saturday, October 14, 2017

មកស្វែងយល់ពី AR ក្នុងពិភពបច្ចេកវិទ្យា

បច្ចុប្បន្ន មានការជជែកគ្នាច្រើនទាក់ទងនឹបច្ចេកវិទ្យា Augmented reality ជាពិសេសក្រោយការបង្ហាញនូវទូរស័ព្ទជំនាន់ថ្មី iPhone X។ ជាធម្មតា យើងនិយមហៅថា AR ដែលមកពីពាក្យ Augmented reality។

AR(Augmented reality) ធ្វើការបន្ថែមនូវរូបភាពបង្កើតពីកុំព្យូទ័រពីលើទិដ្ឋភាពជាក់ស្តែង។ ការរួមបញ្ចូលគ្នារវាងទិដ្ឋភាពពិត និងរូបភាពបង្កើតពីកុំព្យូទ័រ បានបង្ហាញនូវចំនុចវិជ្ជមានមួយទៅលើកម្មវិធីពេលអនាគត ដូចជា ហ្គេម Pokemon Go ដែលជាប្រភេទហ្គេម AR ដោយអ្នកអាចដេញចាប់បិសាចក្នុងទិដ្ឋភាពពិតៗដែលបង្ហាញលើអេក្រង់ទូរស័ព្ទតាមរយៈកាមេរ៉ាខាងក្រោយ។

១)តើអ្នកត្រូវការអ្វីសម្រាប់ប្រើប្រាស់ AR?

បច្ចេកវិទ្យាដ៏ទំនើបក្នុង Processing power (CPU របស់ទូរស័ព្ទ) អាចឲ្យ Smartphone ភាគច្រើនអាចប្រើប្រាស់បានជាមួយនឹង 3D animation ដែលផ្តល់នូវបទពិសោធន៍ថ្មី និងហ្គេមប្រភេទ AR ដល់អ្នកប្រើប្រាស់។

ដូច្នេះអ្វីដែលអ្នកត្រូវការគឺ Smartphone ទំនើបជាមួយនឹងកាមេរ៉ាដ៏ល្អ មានអេក្រង់ Resolution ខ្ពស់។ វាក៏ត្រូវការមាន Accelerometer ដែលជា Sensor សម្រាប់ពិនិត្យមើលនូវបម្លាស់ទីនៃទីតាំងទូរសព្ទ ដូចនេះវាអាចបន្ថែម និងតាមដាននូវរូបភាពបង្កើតពីកុំព្យូទ័រលើទិដ្ឋភាពពិត ដោយអាស្រ័យលើទីតាំងដែលតម្រង់ទៅ។

ម្យ៉ាងទៀត អ្នកក៏អាចប្រើប្រាស់ Tablet ជា AR device ផងដែរ ដោយសារ Hardware មានលក្ខណៈស្រដៀងនឹង Smartphone ហើយថែមទាំងមានអេក្រង់ធំទៀត។
ចំពោះ Laptops និង Desktop PCs ក៏អាចប្រើប្រាស់ AR បានដែរតាមរយៈ Webcam ប៉ុន្តែដោយការកង្វះនៃ Motion sensor កម្មវិធី AR លើកុំព្យូទ័រនៅមានព្រំដែនកំណត់ ប៉ុន្តែអ្នកអាចបន្ថែមនូវ Effect និង Animation ទៅលើ Video call បាន។

តាមពិត AR មាននូវ AR headsets មួយចំនួនដូចជា Google Glass របស់ក្រុមហ៊ុន Google និង HoloLens របស់ក្រុមហ៊ុន Microsoft ជាដើម ដោយវាបន្ថែមនូវរូបភាព ឬអក្សរ ឬរូប 3D ភ្ជាប់នឹងទិដ្ឋភាពពិតប្រាកដ។

២) តើ Augmented reality មានដំណើរការយ៉ាងដូចម្តេច?

ក្នុងបច្ចេកវិទ្យា AR ចំនុច Reality ត្រូវបានចាប់យកដោយកាមេរ៉ា បន្ទាប់មកបង្ហាញលើអេក្រង់ ឯកាមេរ៉ា និងអេក្រង់កាន់តែល្អ រូបភាពកាន់តែដូចជាក់ស្តែង។

ទម្រង់ផ្សេងទៀតនៃ AR គឺប្រើប្រាស់នូវ Mini projector ដើម្បីបន្ថែមនូវអក្សរ និងរូបភាពបង្កើតពីកុំព្យូទ័រ ទៅលើទិដ្ឋភាពពិតៗ ដោយផ្ទាល់ ឬលើកញ្ចក់អេក្រង់ដែលថ្លា។

ផ្នែក Augmented គឺសំដៅលើការបន្ថែមនូវរូបភាពបង្កើតពីកុំព្យូទ័រ (CGI) ទៅកាន់ទិដ្ឋភាពពិតដែលអ្នកបានឃើញ។ CGI objects (ឧទាហរណ៍ តួអង្គបិសាច) បានបង្កើតដោយ CPU និង GPU នៃ AR device។ Smartphone និង Tablet ទំនើបៗបច្ចុប្បន្នមាននូវ Hardware ដែលអាចបង្កើតនូវរូបភាពទាំងនោះបាន។

AR headset អាចមាននូវ Hardware ក្នុងនោះដើម្បីបង្កើតនូវ CGI objects ឬវាត្រូវការភ្ជាប់ទៅនឹងកុំព្យូទ័រ (ឬទូរស័ព្ទ) ក្នុងការបង្កើតនូវរូបភាពទាំងនោះ។ AR headsets ដែលត្រូវការភ្ជាប់នឹងឧបករណ៍ផ្សេង មានលក្ខណៈធូរថ្លៃ និងតូច ប៉ុន្តែការបម្លាស់ទីមានកំណត់ ដោយសារតម្រូវការ Device ដាច់ដោយលែក។
Objects (ឧទាហរណ៍ តួអង្គបិសាច) ដែលអ្នកបានឃើញក្នុង AR អាចគ្រប់គ្រង និងមានសកម្មភាពជាមួយ តាមវិធីផ្សេងៗ ដូចជា សំឡេង ឬ Motion control, handheld controller ឬដោយការបម្លាស់ទីនៃ AR device ប្រសិនបើវាមាន Motion sensors។

AR មាននៅលើ Snapchat

Snapchat ក៏ប្រើប្រាស់នូវ Augmented reality ផងដែរ ដោយប្រើប្រាស់នូវកាមេរ៉ាមុខ ក្នុងការបន្ថែមនូវ AR effects ទៅលើរូបភាពដែលអ្នកថតលក្ខណៈ Selfies ដូច្នេះអ្នកអាចបន្ថែមនូវ Effects ដែលផ្លាស់ប្ដូរលក្ខណៈរូបរាងអ្នកពេលថត រួចអ្នកអាចចែករំលែកវីដេអូ ឬរូបភាពដោយ Enable (បើកដំណើរការ) នូវ Effects ទៅកាន់មិត្តភក្ដិបាន។ លក្ខណៈសម្បត្តិមួយទៀតរបស់ AR គឺមិនត្រូវការនូវ Headset (ឧបករណ៍បន្ថែម) នោះទេ ដែលមានភាពងាយស្រួលក្នុងការប្រើប្រាស់។

ជាពិសេសក្រុមហ៊ុនធំៗ ដូចជា Apple, Google, Microsoft, Dell និង Acer មានទស្សនវិស័យផ្សេងៗលើទម្រង់នៃ AR ដែលនឹងអាចមានអ្វីចាប់អារម្មណ៍ថ្មីនាពេលអនាគត៕

ស្មាតហ្វូនស៊េរីថ្មី កាមេរ៉ា៤ Huawei nova 2i

Huawei nova 2i គឺជាកំពូលស្មាតហ្វូនស៊េរីថ្មី កាមេរ៉ាភ្លោះមុខក្រោយដំបូងបង្អស់ របស់ក្រុមហ៊ុន Huawei។ Huawei nova 2i ត្រូវបានរចនាឡើងជាមួយនឹង អេក្រង់ធំ ពេញភ្នែក ពេញគែម ៥.៩ អ៊ីញ (HUAWEI FullView Display) ជាមួយនឹងសមត្ថភាព កំពូលនៃកាមេរ៉ាភ្លោះមុខ ១៣MP/២MP ភ្ជាប់ជាមួយនឹង Smart Selfie Toning Flash ឯកទេសអ្នក Selfie មួយគ្មានពីរ អាចផ្តិតយករូបភាពច្បាស់ស្រស់ស្អាត Pro Mode បែបសិល្បៈ portrait, Wide Aperture, Effect, Bokeh ស៊ីវិល័យ និងរស់រវើក។

ចំណែកឯ កាមេរ៉ាភ្លោះ ខាងក្រោយវិញ ១៦MP/២MP មានសមត្ថភាពខ្លាំង អាចផ្តិតយករូបភាព បែបសិល្បៈ ស៊ីវិល័យ កម្រិតខ្ពស់ ព្រាលផ្ទៃខាងក្រោយបានស្រស់ស្អាតល្អ (bokeh) និងជួយបន្ថែមពន្លឺ សម្រាប់ទីតាំង ដែលមាន ពន្លឺខ្សោយ ដូចកាមេរ៉ាអាជីព។ HUAWEI nova 2i ត្រូវបានបំពាក់ដោយបន្ទះឈីប Octa-core Kirin ៦៥៩, មាន រ៉េម (RAM) ៤GB និង រ៉ូម (ROM) ៦៤GB ប្រើប្រាស់ប្រព័ន្ធប្រតិបត្តិការ Android-7 ជាមួយនឹងថាមពលថ្មធំមហិមា ៣,៣៤០mAh ស៊ីមពីរ ល្បឿនអ៊ីនធើណិតលឿនកប់ Best 4G LTE Smart Ever ផ្តល់ជូននូវបទពិសោធន៍ថ្មីអស្ចារ្យ កាន់តែលឿន និង អស់កង្វល់រឿងអស់ថ្ម ល្អប្រើ មិនមែនល្អមើល ប្រើអស់ចិត្ត តែមិនអស់ថ្ម ។

ចំណុចខ្លាំងនិងខ្សោយទាំង ៣ មុនទិញ Pixel 2 ឬ Pixel 2 XL

ស្មាតហ្វូន Pixel 2 និង Pixel 2 XL បានប្រកាសបង្ហាញកាលពីយប់ថ្ងៃទី ៤ តុលាក្រោមតម្លៃប្រហែល ៦៤៩ ដុល្លារ និង ៩៤៩ ដុល្លារ (ទំហំ 128GB)។ ចំណុចពិសេសម្យ៉ាងរបស់ស្មាតហ្វូននេះ ស្ថិតលើផ្នែកកាមេរ៉ា ដែលបានឈរចំណាត់ថ្នាក់ទី ១ ជាស្មាតហ្វូនមានកាមេរ៉ាល្អបំផុតក្នុងលោក ទទួលបានពិន្ទុដល់ ៩៨ ពី DxOMark។

Sabay បង្ហាញពីចំណុចខ្លាំងនិងខ្សោយ ៣ ម៉ូដែល ទាំង ២ ដែលអ្នកគួរពិចារណាឲ្យបានច្បាស់មុនសម្រេចចិត្តទិញ។

+ចំណុចខ្លាំង

១.គុណភាពកាមេរ៉ាល្អផ្តាច់គេ

ដូចបានបកស្រាយពីខាងលើ ថ្វីបើ Pixel 2 និង Pixel 2 XL មានកាមេរ៉ាត្រឹមមួយគ្រាប់ក្ដី តែកម្រិតគុណភាពបង្ហាញចេញមកទាំងផ្នែកខាងមុខនិងខាងក្រោយ អាចធ្វើបានប្រសើរជាងទូរសព្ទ iPhone 8 Plus និង iPhone X ថែមទៀតផង។ នេះពឹងផ្អែកលើប្រព័ន្ធ Software ពិសេសៗដែល Google បានសម្រិតសម្រាំងយ៉ាងចាស់ដៃ។

២.មុខងារ Active Edge និង AR Core

Galaxy Note 8 មានជំនួយការពិសេស Bixby ខណៈ iPhone X មានមុខងារ ARKit ប៉ុន្តែ Pixel 2 អាចប្រើមុខងារទាំងនោះបានដូចគ្នា ជាពិសេសគឺមុខងារ Active Edge ដែលអ្នកត្រូវច្របាច់លើស៊ុមគែងសងខាងទូរសព្ទ ស្រដៀងនឹង HTC U11 ដើម្បីឲ្យបើកមុខងារជំនួយការ Assistant របស់ខ្លួន។ ដោយឡែកមុខងារ ARCore អ្នកអាចប្រើកាមេរ៉ាដ៏ស្រស់ស្អាតមួយនោះ ថតបង្ហាញនូវទិដ្ឋភាពលេចធ្លោ ផ្សេងទៀតទៅខាងក្រៅ ប្រហាក់ប្រហែលទៅនឹងស្ពតដែល Apple ធ្លាប់បង្ហាញពី ARKit។

៣.មុខងារ Always-On Display

ជាមុខងារកើតមានយូរមកហើយសម្រាប់ត្រកូល Android ស៊េរីខ្ពស់ៗ ប៉ុន្តែទន្ទឹមដែល Pixel 2 មានមុខងារឆ្លាតវៃ AI ជាជំនួយ ម្ល៉ោះ Google ក៏បានបញ្ចូលមុខងារនោះត្រលប់មកដាក់លើត្រកូល Pixel ថ្មីនេះបន្តទៀត។ វានឹងបង្ហាញ Notification និងម៉ោង នៅលើអេក្រង់ដែលងងឹតឈឹង អំឡុងពេល Lock Screen ប៉ុន្តែវាអាចជួយសន្សំសំចៃថាមពលថ្មបានប្រសើរជាងមុន។

+ចំណុចខ្សោយ

1.Pixel 2 និង Pixel 2 XL មានកាមេរ៉ាស្មើគ្នា

ទាំងគុណភាពកាមេរ៉ាប្រព័ន្ធ Software កម្លាំងម៉ាស៊ីន ទូរសព្ទ Pixel 2 និង Pixel 2 XL មានទំហំស្មើគ្នាទាំងអស់ ប៉ុន្តែតម្លៃនៃការចំណាយ រវាងស្មាតហ្វូនទាំង ២ គឺខុសគ្នាដល់ទៅ ២០០ ដុល្លារ។ បើអ្នកសម្រេចចិត្តថាយក Pixel 2 XL ម្ល៉ោះមានន័យថាដើម្បី ស្មាតហ្វូនអេក្រង់ពេញនិងធំបន្តិច ក៏ដូចជាថាមពលថ្មខុសគ្នាបន្តិច អ្នកត្រូវចាយបន្ថែមដល់ ២០០ ដុល្លារ ខុសពី iPhone 8 និង iPhone 8 Plus តម្លៃវាខុសគ្នាប្រហែល ១០០ ដុល្លារ ប៉ុន្តែ Apple រចនាលើ iP8 Plus មានគុណភាពកាមេរ៉ាខ្ពស់ជាង iP8 ឆ្ងាយ។

2.ការលុបរន្ធដោតកាស

មិនខុសពីក្រុមហ៊ុន Apple, Lenovo និង LeEco Google សម្រេចដើរតាមគេលុបរន្ធដោតកាស ៣.៥មម ចោលពីស្មាតហ្វូន Pixel 2។ ប៉ុន្តែ Google ក៏បានផ្តល់ឱកាសឲ្យអ្នករាល់គ្នាអាចទិញឧបករណ៍ជំនួយពីខាងក្រៅ ដែលមានតម្លៃ ៤៤.៩៥ ដុល្លារ អាចឲ្យអ្នកស្ដាប់ចម្រៀងបណ្ដើរ និងសាកថ្មបណ្ដើរ។ មធ្យោបាយមួយទៀត អ្នកអាចទិញកាស Pixel Bud ស្រដៀងនឹង AirPods ថ្លៃ **១៥៩ ដុល្លារ**ក៏បាន។

3.អេក្រង់ Pixel 2 XL មិនដាច់គែមសងខាងនៅឡើយ

ត្រូវទទួលស្គាល់ថាអេក្រង់ Pixel 2 XL មិនទាន់រចនាដាច់គែមសងខាងស្អាតដូច Galaxy S8 និង Note 8 នៅឡើយ ប៉ុន្តែអាចថាប្រសើរជាង iPhone X ត្រង់ការរចនាដាក់រន្ធស្រូបសំឡេងនិង Sensor ខាងលើធ្លាក់មកកណ្ដាល ធ្វើឲ្យមនុស្សមួយចំនួនមិនពេញចិត្ត។ សម្រាប់ Pixel 2 XL ជាស្មាតហ្វូនប្រើអេក្រង់ពេញ OLED ពិតមែន ប៉ុន្តែគែមសងខាងនៅសល់បន្តិចបន្តួច តាមផ្នែកខាងលើ, ខាងក្រោម និងចំហៀងឆ្វេងស្ដាំ។

+លក្ខណៈសម្បត្តិកាមេរ៉ា Pixel 2

- Sensor វិមាត្រ 1/2.6-inch ទំហំ 12MP
- Aperture ទំហំ f/1.8
- បច្ចេកវិទ្យា Dual-Pixel Autofocus
- មុខងារទប់លំនឹង OIS
- បច្ចេកវិទ្យា HDR+
- ប្រព័ន្ធ Portrait Mode ជំនាន់ថ្មី។

ការសាកល្បងពេញលេញក្រុមការងារ DxOMark បានថតរូបចំនួន ១,៥០០ សន្លឹកប្រើរយៈពេលលើសពី ២ ម៉ោង ប៉ុន្តែខាងក្រោមជាជំហាននៃការសង្ខេបយកចំណុចសំខាន់ៗតែប៉ុណ្ណោះ។

+កន្លែងមានពន្លឺភ្លឺ

នៅទីតាំងមានពន្លឺភ្លឺខ្លាំង Pixel 2 អាចផ្ដិតយករូបភាពបានយ៉ាងល្អ ទាំងកម្រិតពណ៌ដែលបង្ហាញចេញមក និងការគ្រប់គ្រងគ្រាប់ Noise ម៉ូដែលថ្មីនេះ ពិតជាធ្វើបានលើសស្មាតហ្វូនដទៃ។ លើសពីនេះទៀត សម្រាប់ការថតទេសភាព (Landscape) និងក្នុងទីក្រុង (Cityscape) សាកសមបំផុតសម្រាប់អ្នកថតរូបលក្ខណៈ Outdoor។

គេបានយករូបដែលថតចេញពី HTC U11 មកធៀប Pixel 2 វាបង្ហាញថាទាំងគុណភាពរូបក្នុងទីតាំងងងឹតនិងភ្លឺ ស្មាតហ្វូនរបស់ Google អាចបង្ហាញពណ៌ភ្លឺច្បាស់ជាង។

+កន្លែងខ្វះពន្លឺនិងការប្រើ Flash

នៅលក្ខខណ្ឌមានពន្លឺមិនគ្រប់គ្រាន់ កាមេរ៉ា Pixel 2 បន្តធ្វើបានល្អដដែល ដោយឡែកចំពោះការប្រើ Flash ពពួកស្មាតហ្វូនមួយចំនួន ធ្វើបានល្អតែក្នុងករណីប្រើ Flash ជំនួយសុទ្ធ ឬខ្លះត្រូវការជំនួយនៃពន្លឺជុំវិញខ្លួនវា ប៉ុន្តែ Pixel 2 អាចធ្វើបានប្រសើរក្នុងករណីទាំងពីរ។ ត្រូវចិត្តសម្រាប់អ្នកនិយមថតរូប Portrait ឬថតរូបសន្លឹកធម្មតានៅទីតាំងខ្សោយពន្លឺ មានដូចជាក្នុងគេហដ្ឋានជាដើម។

+ការ Zoom និងថតបែប Blur

ខណៈ Pixel 2 ជាស្មាតហ្វូនកាមេរ៉ាមួយគ្រាប់ ម្ល៉ោះបើចង់ថតបែប Zoom, Depth Effect, Portrait Mode និង Bokeh (ថត Blur) បាន លុះត្រាតែពឹងលើប្រព័ន្ធ Software។ DxOMark បានតេស្តពីកម្រិត Zoom 2x ដល់ 8x ប៉ុន្តែក្នុងលក្ខខណ្ឌនេះ យើងបង្ហាញត្រឹមកម្រិត 4x។ សង្កេតឃើញ Pixel 2 ធ្វើបានល្អ បើធៀបនឹងស្មាតហ្វូនប្រើកាមេរ៉ាមួយគ្រាប់ដូចគ្នា ប៉ុន្តែធៀបនឹងស៊េរីប្រើកាមេរ៉ាភ្លោះ អាចថានៅចាញ់គេបន្តិច។

ចំណែកឯការថត Blur ឬព្រាល Background ក្រោយ ដែលយើងនិយម Portrait Mode ទូរសព្ទ Pixel 2 អាចធ្វើទៅបានដូចស្មាតហ្វូនកាមេរ៉ាភ្លោះអ៊ីចឹងដែរ។ Subject ដែលយើងផ្ដោតយក បង្ហាញឲ្យឃើញភ្លឺច្បាស់មិនចាញ់ iPhone 8 Plus ប៉ុន្តែផ្ទៃ Blur ខាងក្រោយ ហាក់បីនៅមានកម្រិតព្រោះមិនអាចបង្ហាញពណ៌បែបធម្មជាតិដូច iPhone ស៊េរីឆ្នាំ ២០១៧ នេះបានឡើយ។
+Video

ស្ថិតក្នុងពិន្ទុ ៩៦ នៃការធ្វើតេស្តថតវីដេអូ Pixel 2 ក៏ក្លាយជាស្មាតហ្វូនឈរលំដាប់ខ្ពស់ជាងគេ ដោយការថតវីដេអូធ្វើបានយ៉ាងល្អ។ កម្រិត Exposure ផ្លាស់ប្ដូរទៅតាមពន្លឺគ្រប់លក្ខខណ្ឌបានយ៉ាងរហ័ស ហើយ Autofocus ធ្វើបានលឿន រលូន បន្ថែមនឹងការទប់លំនឹងនៃការថតកាន់តែអស្ចារ្យជាងស្មាតហ្វូនដទៃៗ។
+ការពន្យល់ពីការដាក់ពិន្ទុនៃរូបភាពដែលថត
និយាយពីការថតរូបភាពសុទ្ធ Pixel 2 ទទួលបានពិន្ទុដល់ទៅ ៩៩ ឯណោះ ផ្អែកតាមកត្តាប្រភេទរូបភាពជាច្រើន។ យើងនឹងបង្ហាញប្រិយមិត្តដូចមានខាងក្រោម៖

- កម្រិត Exposure និង Contrast (៩៥ ពិន្ទុ) ក្នុងរូបមួយសន្លឹក រវាងកាមេរ៉ា Pixel 2, iPhone 8 Plus និង Pixel បន្តបង្ហាញថា Pixel 2 អាចធ្វើបានល្អជាង ព្រោះតាមការសម្គាល់នៃផ្ទៃខាងក្រោយនៃភ្លើងពណ៌ដែលបង្ហាញ មានតែស្មាតហ្វូន Pixel 2 មួយគត់ ដែលបង្ហាញមកឃើញច្បាស់។
- កម្រិតពណ៌ Color (៨៦ ពិន្ទុ)

បើយើងសម្លឹងមើលទៅកាន់ថាសនៃសេះហោះ ស្មាតហ្វូនទាំង ៣ អាចផលិតរូបភាពបានល្អដូចគ្នា ប៉ុន្តែចំណុចនេះ Pixel 2 ទទួលបានពិន្ទុតិច ព្រោះបើយើងមើលឲ្យដល់វាពិតជាចាញ់ iPhone 8 Plus យ៉ាងប្រាកដណាស់។

- Autofocus (៩៨ ពិន្ទុ)

Pixel 2 អាច Focus ទៅលើ Subject ណាមួយ បានយ៉ាងរហ័ស, ប្រាកដ និងគ្រប់គ្រងស្ថានភាពទៅតាមលក្ខខណ្ឌពន្លឺបានល្អ។ ក្នុងការសាកល្បង defocus និង refocus ទូរសព្ទ Pixel 2 សម្រាប់ល្បឿន refocus ប្រើពេលត្រឹម 16ms ប៉ុណ្ណោះ។

- Detail/Texture (៧៣ ពិន្ទុ)

ក្នុងបន្ទប់មានពន្លឺខ្សោយត្រឹម 5 Lux គេបានសាកល្បងយក iPhone 8 Plus, Note 8 និង Pixel 2 មកថតបែប Full Image និងការ Crop ១០០ ភាគរយ។ អាចវាយតម្លៃថា Pixel 2 បន្តធ្វើបានល្អជាង iPhone 8 Plus ដោយបង្ហាញរូបមានពណ៌ច្បាស់និងភ្លឺជាង ចំណែកឯការ Crop ក៏ដូចគ្នា ខណៈគូប្រជែងខ្លួនបង្ហាញរូបរាងព្រាលបែកបន្តិចនិងងងឹតបន្តិច។

- Noise (៥៩ ពិន្ទុ)

តេស្តមួយសន្លឹកដំបូងនៃការថតផ្ទៃមេឃពណ៌ខៀវស្រងាត់ បើមើលធម្មតាអ្នកមិនចាប់អារម្មណ៍ទេ ប៉ុន្តែករណីអ្នកយករូបនោះទៅ Zoom មើលត្រង់ទីតាំងផ្ទៃមេឃ អ្នកនឹងឃើញគ្រាប់ Noise លេចចេញមក។ ដោយឡែកបើយើងប្រៀបធៀបការថតបែប Indoor និង Crop រូបភាពដដែលនោះ អ្នកប្រាកដជាលាន់មាត់ថា ហេតុអ្វី Pixel 2 ធ្វើបានប្រសើរជាងគូប្រជែងខ្លួនច្រើនម្ល៉េះ?

- Artifacts (៦៤ ពិន្ទុ)

Artifacts ទាក់ទងនឹងការថតរូប សំដៅទៅលើអ្វីមួយដែលជំនួយមកលើរូបភាពតាមរយៈធម្មជាតិឬទ្រង់ទ្រាយមនុស្ស ខុសពីរូបភាពដើម (Original)។ រូបភាពខាងក្រោមបង្ហាញអ្នកពីពន្លឺចែងចាំងនៃព្រះអាទិត្យ ជះមកលើរូបភាពដើម។

- Flash (៨៨ ពិន្ទុ)

Pixel 2 អាចផលិតរូបភាព ដែលប្រើ Flash បានល្អគ្រប់កាលៈទេសៈ។ ទាំងកម្រិតនៃ White Balance, Color និង Exposure វាធ្វើបានល្អបំផុត។ ខាងក្រោមជាការប្រៀបធៀបនៃទូរសព្ទ Pixel 2 និង Pixel ធម្មតា។

- Zoom (៣២ ពិន្ទុ)

Pixel 2 មិនអាចធ្វើបានល្អ ដូចស្មាតហ្វូនកាមេរ៉ាភ្លោះនោះឡើយ ទាក់ទងនឹងមុខងារ Zoom។ ត្រង់ចំណុចនេះ បើ Zoom នៅលក្ខខណ្ឌទាប អាចមើលឃើញច្បាស់ល្អ ប៉ុន្តែបើស្ថិតក្នុងលក្ខខណ្ឌខ្ពស់ជ្រុល ប្រាកដជាចាញ់ iPhone 8 Plus ម្ល៉ោះទើបចំណុចនេះ Pixel 2 ទទួលបានក្រោម ៥០ ពិន្ទុទៅទៀត។

- Bokeh (ប្រភេទរូបព្រាល Background) ៤៥ ពិន្ទុ

មិនជំនួយពីកាមេរ៉ាភ្លោះ Pixel 2 ពឹងផ្អែកលើប្រព័ន្ធ Software ដើម្បីផលិតរូប Portrait ប៉ុន្តែខ្លួនវិវត្តខ្លួនប្រសើរជាងជំនាន់ Pixel ឆ្នាំ ២០១៦ តែបើធៀបនឹង iPhone 8 Plus អាចថាមិនជាស៊ីដាច់គ្នាទេ។

+ការដាក់ពិន្ទុលើវីដេអូ

ដោយផ្អែកលើការតេស្តមួយចំនួនតូច DxOMark បានដាក់ពិន្ទុលើការថតវីដេអូ សម្រាប់ Pixel 2 បាន ៩៦ ខណៈការថតរូបភាពបានដល់ ៩៩។ នៅលក្ខខណ្ឌខ្វះពន្លឺកម្រិត 100 Lux និង 5 Lux ហើយយកវីដេអូនោះមក Crop មើល គេសង្កេតឃើញ iPhone 8 Plus ចាញ់ Pixel 2 ដូចមេឃនឹងដីទៅហើយ។

ប្រភព៖ dxomark ប្រែសម្រួល៖ កៅ រក្សា

មានរឿងគួរដឹងជាច្រើន ជុំវិញឧបករណ៍ Gimbal និងដងថត Selfie

សម្របនឹងការថតរូបកំពុងទទួលបានការចាប់អារម្មណ៍ខ្លាំងនាពេលបច្ចុប្បន្ន ក្រុមហ៊ុនបច្ចេកវិទ្យាជាច្រើនបានច្នៃប្រឌិតបង្កើតឡើងតៗគ្នានូវឧបករណ៍ជំនួយក្នុងការថតរូបឲ្យបានរហ័សនិងងាយស្រួល។ ឧបករណ៍ Gimbal និង ដង Selfie ជឿជាក់ថាមានប្រិយមិត្តជាច្រើន ធ្លាប់ប្រើប្រាស់វា ប៉ុន្តែប្រាកដជាមិនទាន់ស្គាល់ពីដើមកំណើតនិងអត្ថប្រយោជន៍សំខាន់របស់វានោះឡើយ។

១.ដង Selfie ៖

ដងថត Selfie ជាឧបករណ៍មួយដែលត្រូវបានគេប្រើដើម្បីថតរូប Selfie ឬថតរូបទូទៅ ដោយដាក់ទូរសព្ទឬកាមេរ៉ាភ្ជាប់ជាមួយបរិវេណផ្នែកខាងចុងដង។ ជាទូទៅអាចចាប់ភ្ជាប់ជាមួយទូរសព្ទបាន ដោយពឹងផ្អែកលើដែកឬជ័របង្រួមចូលគ្នា នៅចុងម្ខាង។ ឧបករណ៍ខ្លះមានការបញ្ជាតាមរយៈតេឡេបញ្ជា (Remote) ឬខ្លះទៀតប្រើប្រាស់ Bluetooth។

ដងថត Selfie ដំបូងបង្អស់លេចមុខមាត់តាំងពីឆ្នាំ ១៩២៥ ព្រោះកាលនោះមានលេចចេញនូវរូបភាពមួយសន្លឹក ដែលបង្ហាញពីបុរសម្នាក់និងប្រពន្ធរបស់គាត់ ថតរូបមុខខ្លួនឯង ដោយប្រើដងដែករាងវែងស្របទៅកាមេរ៉ា។ ក្រោយមកចូលដល់ឆ្នាំ ១៩៩៥ ឧបករណ៍បុរាណនេះត្រូវបានគេកត់ចូលក្នុងសៀវភៅ ក្រោមចំណងជើង "ការបង្កើតដែលឥតបានការទាំង ១០១" ក្រោយមកឧបករណ៍ឥតបានការក៏បានក្លាយជាការពេញនិយមជុំវិញពិភពលោកនៅអំឡុងទសវត្សរ៍ទី ២១។
@ អត្ថប្រយោជន៍នៃការប្រើដង Selfie ៖

- អាចថតរូបលក្ខណៈជាក្រុមបានងាយស្រួល
- មិនចាំបាច់ពឹងអ្នកដទៃជួយថតរូបឲ្យ
- អាចថតបានគ្រប់គ្នានៅក្នុងក្រុម
- មិនចាំបាច់ត្រូវការ Tripod (ជាជើងទម្រកាមេរ៉ាស្រដៀងដង Selfie តែពិបាកយកតាមខ្លួន)
- អាចថតរូបភាពបានយ៉ាងស្អាតនិងរហ័ស
- កាត់បន្ថយភាពញ័រអំឡុងពេលថត។

២.ឧបករណ៍ Gimbal ៖

Gimbal សំដៅទៅកាន់ឧបករណ៍ម្យ៉ាង ដែលយើងអាចបង្វិលទៅគ្រប់មុំតាមរយៈអ័ក្សតែមួយ។ អ្នកអាចចាប់យករូបភាពស្រស់ស្អាត សឹងតែគ្រប់មុំដោយការប្រើ Gimbal ជាជំនួយ។ ត្រូវបានគេប្រើញឹកញាប់បំផុត ក្នុងការថតវីដេអូ ប៉ុន្តែសម្រាប់ការថតរូបក៏ធ្វើបានដូចគ្នា។ មិនមានការបង្ហាញច្បាស់ការណាមួយពីកាលបរិច្ឆេទបង្កើតឧបករណ៍ Gimbal ផ្ទាល់នោះទេ ប៉ុន្តែតាមសែស្រឡាយរបស់វាដែលជាឧបករណ៍ Glidecam មានទំហំធំ និយមឃើញប្រើក្នុងការថតខ្សែភាពយន្ត បានបង្កើតនៅឆ្នាំ ១៩៩១ ដោយបុរសសញ្ជាតិអង់គ្លេស Martin Stevens។

ងាកមកឧបករណ៍ Gimbal វិញ មាន ២ ប្រភេទធំៗគឺ 3-axis និង 2-axis ដែលវាខុសគ្នាដូចជាការប្រៀបធៀបរវាងរថយន្តនិងម៉ូតូអ៊ីចឹង ព្រោះពពួក 3-axis អាចប្ដូរចលនាក្នុងទម្រង់ ៣ ផ្សេងគ្នា ខុសពី 2-axis បានតែ ២ ទម្រង់ប៉ុណ្ណោះ ទៀតសោត 3-axis អាចទប់លំនឹងនៃការថតបានប្រសើរជាងឆ្ងាយ។ ការប្រើប្រាស់ យើងអាចយកទៅភ្ជាប់ជាមួយស្មាតហ្វូន, កាមេរ៉ា DSLR និង Go Pro ជាដើម។ ម៉ូដែលពេញនិយមនាពេលបច្ចុប្បន្នមាន ២ គឺ Zhiyun Smooth-Q តម្លៃប្រហែល ១៣៩ ដុល្លារ និង DJI Osmo Mobile តម្លៃ ២៩៩ ដុល្លារ។

ទស្សនាវីដេអូខាងក្រោម ៖

@ អត្ថប្រយោជន៍ឧបករណ៍ Gimbal ៖

- មានទម្ងន់ស្រាល ងាយស្រួលយកទុកដាក់តាមខ្លួន
- ផ្លាស់ទីថតជ្រុងនៃមុំផ្សេងបានរហ័សនិងមិននឿយហត់ក្នុងការបម្លាស់ទី
- រក្សាស្ថិរភាពលំនឹងបានល្អ - បត់បែនបានរហ័ស៕

ណែនាំឲ្យស្គាល់ ហាងលក់ទំនិញកំពូលទាំង ១០ លើលោក

ការលក់ចេញទិញចូលទំនិញលើ Online បានចូលរួមចំណែកផ្ដល់ភាពងាយស្រួលដល់ការរស់នៅរបស់មនុស្ស។ ថ្ងៃនេះ Sabay ចែករំលែកអ្នករាល់គ្នា ឲ្យបានស្គាល់ពីគេហទំព័រលក់ទំនិញ Online លំដាប់កំពូលទាំង ១០ ក្នុងលោក។

១.Amazon

ជាហាងលក់រាយអនឡាញធំបំផុតនៅអាមេរិក។ បង្កើតឡើងដំបូងនាឆ្នាំ ១៩៩៤ ដោយលោក Jeff Bezos និងមានការិយាល័យកណ្ដាលក្នុងទីក្រុង Seattle រដ្ឋ Washington។

ចាប់ផ្តើមដំបូងគ្រាន់តែជាហាងលក់សៀវភៅ ប៉ុន្តែ Amazon បានវិវឌ្ឍទៅជាហាងលក់ទំនិញ ដោយផ្តល់មុខទំនិញរាប់មុឺនមុខ ស្ទើរបំពេញគ្រប់តម្រូវការរបស់អតិថិជន។ មានទំនិញលក់បញ្ចុះតម្លៃជាច្រើន ក៏ដូចជាសេវាកម្មដឹកជញ្ជូនលឿនទាន់ចិត្ត ហើយអតិថិជនអាចប្រើមធ្យោបាយទូទាត់យ៉ាងងាយស្រួល,។

២.eBay

ជាហាងលក់ទំនិញអនឡាញដ៏ធំមួយទៀតរបស់អាមេរិក ដែលមានការិយាល័យកណ្ដាលក្នុងរដ្ឋ California។ បង្កើតឡើងនៅឆ្នាំ ១៩៩៥ ដោយលោក Pierre Omidyar។

eBay មានលក់ទំនិញជាច្រើនមុខ ទាំងអ្នកលក់និងអ្នកទិញអាចកើបលុយបានរាប់លានដុល្លារពីទីផ្សារទំនិញអនឡាញនេះ។ eBay ក៏មានបង្កើតកម្មវិធីដេញថ្លៃទំនិញជារៀងរាល់ថ្ងៃផងដែរ។

៣.Asos

ជាហាងលក់រាយល្បីបំផុតនៅចក្រភពអង់គ្លេស ផ្ដោតលើគ្រឿងសំអាង, សំលៀកបំពាក់, ឧបករណ៍ និងរបស់របរប្រើប្រាស់ទាំងសម្រាប់បុរសនិងនារី។ អ្នកអាចស្វែងរកផលិតផលដែលបែងចែកទៅតាមប្រភេទដែលចូលចិត្ត និងអាចទិញលក់សម្លៀកបំពាក់មួយទឹកនៅលើអ៊ីនធឺណិតបានទៀតផង។

៤.Walmart

ជាហាងលក់រាយដ៏ធំលំដាប់ទី ៣ របស់អាមេរិក។ មានលក់ទំនិញប្រភេទអេឡិចត្រូនិក, វីដេអូហ្គេម, សម្ភារៈក្នុងផ្ទះ, សំលៀកបំពាក់, គ្រឿងអលង្ការ, កាដូអនុស្សាវរីយជាច្រើនទៀតក្នុងតម្លៃសមរម្យ។

៥.Etsy

បង្កើតនាឆ្នាំ ២០០៥ នៅទីក្រុង New York។ មានលក់ទិញទំនិញច្រើនប្រភេទរួមមាន ផលិតផលធ្វើដោយដៃនិងចេញពីរោងចក្រ។ អ្នកអាចឆែកមើលប្រភេទទំនិញលំដាប់ៗ ដូចសមាជិក Etsy ដទៃទៀតដែរ។

៦.Mr Porter

បានបើកដំណើរការនៅឆ្នាំ ២០១១ ដោយផ្ដោតលើគ្រឿងលំអបុរស មានសំលៀកបំពាក់, ឧបករណ៍ប្រើប្រាស់ នាឡិកាដៃ ស្បែកជើង ខ្សែក្រវាត់ជាដើម។ អ្នកអាចស្វែងរកផលិតផល ដែលរចនាដោយអ្នកឌីហ្សាញល្បីៗដោយ Alexander McQueen និង Ray Ban។

៧.Alibaba

ជាវេបសាយលក់ទំនិញធំបំផុតរបស់ប្រទេសចិន។ Alibaba បានបង្កើតនាឆ្នាំ ១៩៩៩ ក្នុងទីក្រុង Hangzhou។

Alibaba ល្បីខ្លាំងបំផុតពីសំណាក់ប្រជាជនចិននិងនៅប៉ែកអាស៊ី ដែលមានលក់ផលិតផលទំនិញស្ទើរតែមុខ។ អតិថិជនអាចស្វែងរកសេវាទូទាត់ទំនិញងាយស្រួល, មានសុវត្ថិភាព ជាមួយសេវាដឹកជញ្ជូនរហ័សទាន់ចិត្ត។

ស្ថិតក្រោមការគ្រប់គ្រងរបស់សេដ្ឋី Jack Ma ក្រុមហ៊ុនកំពូលមួយនេះ ក៏បានបង្កើតគេហទំព័រតូចជាច្រើនទៀតរួមមាន Aliexpress, Tmall និង Taobao។

៨.Nasty Gal

បង្កើតនាឆ្នាំ ២០០៦ ដោយ Sophia Amoruso នៅទីក្រុង Los Angeles ច្រើនលក់ទំនិញផ្ដោតលើផលិតផលស្ត្រីវ័យក្មេង មានស្បែកជើង, សំលៀកបំពាក់ និងគ្រឿងលំអ។

៩.Zappos

បង្កើតឡើងដោយ Nick Swinmurn នាឆ្នាំ ១៩៩៩ នៅសហរដ្ឋអាមេរិក។ ផ្ដោតលើការលក់ទំនិញជាស្បែកជើង និងសំលៀកបំពាក់ និងល្បីដោយសារជាហាងលក់ស្បែកជើងធំបំផុតនៅលើពិភពលោក។

១០.ModCloth

បង្កើតឡើងក្នុងឆ្នាំ ២០០២ ដោយ Eric Koger និង Susan Gregg-Koger មានការិយាល័យកណ្ដាលក្នុងរដ្ឋ California។ មានលក់នូវប្រភេទសំលៀកបំពាក់ ដែលរចនាម៉ូដប្លែកៗ ធ្វើឡើងដោយអ្នករចនាឯករាជ្យ។

កម្មវិធីទាំងបី អាចថតរូបគ្រប់កាលៈទេសៈលើ ស្មាតហ្វូន

១. កម្មវិធី YouCam Perfect

កម្មវិធីនេះអាចប្រើប្រាស់បានឥតគិតថ្លៃ ដែលដំណើរការដូចនឹងកម្មវិធីកាមេរ៉ាដែរ ជាមួយនឹង Settings ដែលជួយអ្នកថតរូបភាពបានកាន់តែល្អ។ ដើម្បីបើកនូវកាមេរ៉ា Setting អ្នកអាចចុចលើ icons ដើម្បី Shuffle តាមរយៈជម្រើសផ្សេងគ្នា។ អ្នកអាចជ្រើសរើសនូវ Exposure និង Focus បានត្រឹមត្រូវ ដែលជួយអ្នកដើម្បីបង្កើតនូវរូបភាពដ៏ល្អ ដោយមិនប្រើប្រាស់ជ្រុលជាមួយនឹង Filter។

២. កម្មវិធី VSCO

VSCO អាចឲ្យអ្នកប្រើប្រាស់ ប្រើនូវ Filter ដ៏ស្រស់ស្អាតរបស់ខ្លួន ហើយជម្រើស Edit ដើម្បីកែប្រែរូបភាពដែលមើលទៅធុញទ្រាន់ទៅជាស្នាដៃថ្មីមួយប្លែក។ លើសពីនេះ ដូចទៅនឹង Instagram អ្នកអាចបង្កើតនូវ Profile លើ VSCO Cam និង Follow អ្នកប្រើប្រាស់ផ្សេងទៀត។

៣. កម្មវិធី Enlight

កម្មវិធីនេះអាចប្រើប្រាស់បានឥតគិតថ្លៃដែលមានជម្រើសដ៏ច្នៃប្រឌិតសម្រាប់ Edit ដែលអាចផ្លាស់ប្ដូរនូវផ្ទៃខាងក្រោយ និងពណ៌នៃរូបភាពណាមួយ។ អ្នកអាចរំកិល Object ទៅកៀក ឬឆ្ងាយពីគ្នាបានដោយមិនកែប្រែនូវរូបភាពទាំងស្រុង។ អ្នកក៏អាចដាក់រូបភាពខ្លួនអ្នកនៅក្នុងទីតាំងផ្សេងគ្នាផងដែរ៕

អ្នកប្រើ iPhone ចង់ថតរូបបានស្អាត កុំភ្លេច តិចនិកទាំង ១២ ក្បាច់នេះ

iPhone បានធ្វើកំណែទម្រង់លើកាមេរ៉ា និងផ្នែកផ្សេងៗជាបន្តបន្ទាប់ ដើម្បីឲ្យទាន់សម័យ បំពេញតម្រូវការអ្នកប្រើប្រាស់ ព្រមទាំងការប្រកួតប្រជែងផងដែរ។ បើអ្នកមាន iPhone ក្នុងដៃអ្នកគួរសាកល្បងអនុវត្តនូវគន្លឹះទាំង ១២ ខាងក្រោម ក្នុងការទាញផលប្រយោជន៍ពីកាមេរ៉ា iPhone ដើម្បីថតឲ្យកាន់តែមានប្រសិទ្ធភាព។

១. អ្នកគួរធ្វើការសម្អាត Lens និង គ្រាប់ Flash ឲ្យបានស្អាតជាមួយនឹងក្រណាត់ទន់ ដូចជាក្រណាត់ជូតវ៉ែនតាជាដើម។

២. អ្នកគួរប្រើប្រាស់ Grid បង្ហាញលើអេក្រង់ ដើម្បីដាក់ Subject ឲ្យត្រូវនឹងបន្ទាត់ប្រសព្វ ដែលជាការអនុវត្តគោលការណ៍ Rule of thirds។ អ្នកអាចបើកវាលើអេក្រង់ ដោយចូលក្នុងកម្មវិធី Settings > Camera > បើកនូវប៊ូតុងត្រង់ Grid។

៣. អ្នកគួរប្រើប្រាស់ Burst mode ដើម្បីផ្ដិតបានបណ្ដុំរូបភាពនៃសកម្មភាពផ្សេងៗ ដែលងាយស្រួលក្នុងការជ្រើសរើសមួយណាល្អប្រសើរ ដោយចុចឲ្យជាប់លើប៊ូតុង Shutter។

៤. អ្នកគួរផលិតរូបភាពដោយប្រើប្រាស់កាមេរ៉ាក្រោយ ព្រោះវាមានកម្រិតគុណភាពខ្ពស់, មានមុខងារទប់លំនឹង, អាចថតរូប Slow motion និងមាន Flash។ ចំពោះកាមេរ៉ាមុខល្អសម្រាប់ការថត Selfies និង FaceTime។

៥. អ្នកគួរប្រើប្រាស់ Flash តែសម្រាប់បំពេញ ស្រមោលប៉ុណ្ណោះ ដែលពេលមានពន្លឺពីក្រោយ Subject នោះ Subject នឹងប្រែងងឹត ដែលជាការល្អក្នុងការប្រើប្រាស់ Flash ដើម្បីបំពេញស្រមោលទាំងនោះ ឲ្យរូបភាពមានតុល្យភាព។

៦. កុំពឹងផ្អែកតែលើ Filter ព្រោះពេលខ្លះវាមិនអាចធ្វើឲ្យប្រសើរឡើងនូវរូបភាពមិនល្អនោះទេ។ អ្វីដែលសំខាន់គឺការថតរូបភាពឲ្យបានត្រឹមត្រូវល្អ។ អ្នកអាចសាកល្បងនូវកម្មវិធី Instagram, VSCO, PhotoShop, Enlight និង Snapseed។

៧. អ្នកគួរដឹងពេលប្រើប្រាស់ HDR (High dynamic range) ដែលធ្វើការបញ្ចូលនូវរូបភាពជាច្រើននូវកម្រិត Exposure ខុសគ្នា ដើម្បីទទួលបានភាពលម្អិត ជាពិសេសពេលទិដ្ឋភាពមានតំបន់ភ្លឺខ្លាំង និងងងឹតខ្លាំង។

៨. iPhone មាន Focal length ប្រហែល 31mm ហើយមិនអាចពង្រីកបាននោះទេលើ Lens វា។ អ្នកអាចសាកល្បងភ្ជាប់នូវ Lens បន្ថែមសម្រាប់ថតរូបបានច្រើនជាងនេះ ដែលមាន Wide-angle, macro និង Fish-eye។

៩. ពេលថតអ្នកគួរទៅជិតនឹង Subject ជៀសជាងពង្រីកពីចម្ងាយ ដែលអាចធ្វើឲ្យបាត់បង់ភាពច្បាស់។

១០. iPhone អាចធ្វើការ Focus និងកំណត់ Exposure ដោយស្វ័យប្រវត្តិដែលអាស្រ័យលើកត្តាផ្សេងៗជាច្រើន ប៉ុន្តែពេលខ្លះអ្នកត្រូវការកំណត់ដោយខ្លួនឯង ដោយចុចឲ្យជាប់លើអេក្រង់ ដើម្បី Focus និង អូសឡើង ឬចុះក្រោមដើម្បីកំណត់ Exposure ដែលត្រូវការងងឹត ឬភ្លឺ។

១១. អ្នកគួរប្រើប្រាស់ Tripod ដើម្បីទប់លំនឹងពេលចុចថតកុំឲ្យរង្គើ។ លើសពីនេះ អ្នកអាចប្រើប្រាស់ ប៊ូតុងលើកាស Apple ដើម្បីចុចថតពីចម្ងាយ កាត់បន្ថយកុំឲ្យកាមេរ៉ារង្គើ។

១២. អ្នកគួរប្រើប្រាស់ Tripod ព្រមទាំង Self-timer ក្នុងការកំណត់វិនាទីថត ដែលល្អសម្រាប់ការថតរូបជាក្រុម ដូច្នេះគ្មាននរណាម្នាក់បាត់ពីរូបភាពនោះទេ៕

កំហុសទាំង ១០ ចំពោះការថតរូបលើស្មាតហ្វូន ដែលគួរជៀសវាង

មនុស្សជាច្រើនបានថតរូបផ្សេងៗ ជាមួយនឹងបច្ចេកវិទ្យាកាមេរ៉ាលើស្មាតហ្វូនចង់មិនចង់ពេលថតរូបគឺបើកកម្មវិធីថតរូបតម្រង់ Subject ហើយចុចថតតែម្ដង។ អ្នកប្រហែលជាបានឆ្លងកាត់នូវលក្ខណៈដែលបានរៀបរាប់ខាងក្រោមមួយចំនួន ទន្ទឹមនឹងនេះអ្នកគួរពិនិត្យមើល និងស្វែងយល់ដើម្បីកែលំអដំណើរការរបស់អ្នកក្នុងការថតរូបភាពឲ្យមានគុណភាពល្អ។

១. ប្រើប្រាស់កម្មវិធីខុស

កំហុស៖ ប្រើប្រាស់តែកម្មវិធីថតរូបស្រាប់ៗដែលមានមកជាមួយប្រព័ន្ធ។
នៅលើ iOS App Store និង Google Play មាននូវកម្មវិធីថតរូបជាច្រើន ដែលផ្ដល់នូវជម្រើសកាន់តែច្រើនក្នុងការថតរូប។ អ្នកគួរធ្វើការសាកល្បងនូវបណ្ដាលកម្មវិធីថតរូបផ្សេងទៀត ដើម្បីស្វែងរកអ្វីដែលចំនឹងចំណង់ចំណូលចិត្ត សម្រាប់គុណភាពរូប។

២. គ្រប់គ្នាត្រូវការ Rule of Thirds

កំហុស៖ មើលរំលងនូវរូបមន្តជាមូលដ្ឋាននូវ Rule of Thirds។
អ្នកគួរធ្វើការបង្ហាញគំនូស Grid លើកម្មវិធីថតរូប ដែលមានគំនូសបីបណ្ដោយទទឹង ហើយពេលអ្នកធ្វើការថតរូបគួរពិនិត្យមើល Subject ឲ្យនៅចំណុចប្រសព្វឆ្វេង ឬស្ដាំ។ អ្នកមិនគួរដាក់ Subject ឲ្យនៅចំណុចកណ្ដាលនៃរូបភាពនោះឡើយ ដែលធ្វើឲ្យកាត់បន្ថយការចាប់អារម្មណ៍លើ Subject។

៣. Composition

កំហុស៖ Composition ជាអ្វីដែលអ្នកគួរតែស្វែងយល់ឲ្យបានល្អ។ វាទាក់ទងថាតើ មនុស្សគួរឈរកន្លែងណា អ្នកចាប់ថតពីមុំណា ហើយសូម្បីតែរបៀបក្នុងការកាន់កាមេរ៉ា។ ការទាញកាមេរ៉ាចេញមក ហើយថត បន្ទាប់មកថតម្ដងហើយម្ដងទៀត វាជារូបមន្តសម្រាប់តែ DSLR ប៉ុណ្ណោះ មិនមែនសម្រាប់កាមេរ៉ាលើស្មាតហ្វូននោះទេ។

អ្នកគួរស្វែងយល់នូវ Composition ព្រោះរបៀបដែលអ្នកកំណត់ទីតាំង Subject មានសារៈសំខាន់ណាស់សម្រាប់រូបភាពអ្នក។ អ្នកគួរចេះប្រើប្រាស់នូវ Golden ratio, leading lines ព្រមទាំងការប្រើប្រាស់ផ្ទៃខាងមុខ និងផ្ទៃខាងក្រោយ។

៤. ប្រញាប់ថតពេក

កំហុស៖ ការទាញទូរសព្ទមក បើកកម្មវិធីថតរូប រួចថតតែម្ដង លឿនរហ័ស ប៉ុន្តែរូបភាពអាចនឹងព្រាល។ អ្នកមិនបានពិនិត្យមើលមនុស្សឈរយ៉ាងម៉េច មិនទៅជិត ឬបន្ទាបខ្លួន ឬកំណត់ Setting មិនប្រាកដលើកម្មវិធី សម្រាប់ការថត។

អ្នកគួរស្វែងយល់នូវកម្មវិធីថតរូបជាមុន ក្នុងការយល់ដឹងពីអ្វីដែលវាអាចធ្វើបាន ជារួមព្យាយាមកុំប្រើប្រាស់កម្មវិធី ឬកំណត់ Setting ណាដែលអ្នកមិនដឹងវាអ្វី។

៥. បើក Flash ចោល

កំហុស៖ Flash មានសារៈសំខាន់ក្នុងការថតរូប ជាពិសេសប្រសិនបើរូបភាពនោះងងឹត ដែលវាអាចបំពេញនូវស្រមោលដែលខ្វះបាន តែមិនល្អសម្រាប់ថតកន្លែងមានពន្លឺខ្លាំង។
អ្នកគួរជៀសវាងការប្រើប្រាស់ Flash តាមតែអាចធ្វើទៅបាន ព្រោះ កាមេរ៉ាលើ ស្មាតហ្វូន ទំនើបៗភាគច្រើនមាននូវ Low-light sensor ដ៏ល្អ។ សម្រាប់ករណីភាគច្រើន អ្នកមិនត្រូវការវានោះទេ ហើយប្រសិនបើអ្នកត្រូវការ ប្រហែលនោះមិនមែនជាពេលវេលា ឬទីកន្លែងដ៏ល្អនោះទេ ក្នុងការថតរូប។

៦. ប្រើប្រាស់នូវមុខងារ Zoom ឲ្យអស់លទ្ធភាព

កំហុស៖ អ្នកយល់ថាមុខងារ Zoom មានដំណើរការយ៉ាងល្អ ដែលអាចពង្រីកទៅកាន់ Subject បានជិតច្បាស់ល្អ។
អ្នកគួរជៀសវាងការប្រើប្រាស់មុខងារ Zoom ជារួមប្រើប្រាស់នូវកម្រិតពង្រីកដើមរបស់ Lens លើស្មាតហ្វូនប្រសិនបើអ្នកចង់ថតជិត អ្នកគួរទៅឲ្យជិតនឹង Subject ហើយថត។ បញ្ហានៃការ Zoom គឺធ្វើឲ្យបាត់បង់នូវគុណភាពនៃរូបភាព។

៧. ទាំងអស់គ្នាត្រូវការ Tripod

កំហុស៖ គ្មាននរណាម្នាក់ខ្វល់នឹងរូបភាពព្រាល ឬម្រាមដៃបង្ហាញក្នុងទិដ្ឋភាពរបស់ Lens នោះទេ។ កាមេរ៉ានៅនឹងល្អហើយថតនឹងដៃទៅបានហើយ។ ម្យ៉ាងទៀត Tripods ថ្លៃ ហើយពិបាកយកតាមខ្លួនទៀត។

អ្នកគួរប្រើប្រាស់នូវ Tripods ទោះជាវាពិបាកដាក់តាមខ្លួនបន្តិចមែន ប៉ុន្តែវានឹងធ្វើឲ្យគុណភាពរូបភាពមិនបាត់បង់។ អ្នកអាចជ្រើសរើសបានគ្រប់ទម្រង់ ទំហំ និងកម្រិតកម្ពស់ ដែលអ្នកចង់បាន ជារួមគឺអាចភ្ជាប់ស្មាតហ្វូនអ្នកបាន។

៨. ភ្លេចរក្សាកាមេរ៉ាឲ្យនៅនឹង

កំហុស៖ ការរង្គើពេលថតមិនអីទេ ហើយពេលថតគួរដកដង្ហើមចេញ។

ក្រៅពី Tripod អ្នកអាចដាក់ Device ផ្អែកនឹងជញ្ជាំង ឬកន្លែងផ្អែកណាដើម្បីរក្សាលំនឹង។ ម្យ៉ាងទៀតអ្នកអាចកាន់ដៃទាំងពីរពេលថត ប៉ុន្តែនៅតែអាចមានករណីរង្គើពេលអ្នកចុចប៊ូតុង Shutter ដូច្នេះ ប្រសិនបើកម្មវិធីថតរូបអាចកំណត់ពេលវេលាឲ្យថតបាន គួរប្រើប្រាស់វា។

៩. កាមេរ៉ា Settings

កំហុស៖ តម្រង់ហើយថត គ្រប់យ៉ាងនឹងដំណើរការដោយ
ស្វ័យប្រវត្តិ ដោយមិនចាំបាច់ប្រើប្រាស់ និងស្វែងយល់នូវ Settings មួយចំនួនដូចជា ISO និង Shutter speed ព្រោះគ្រាន់តែថតរូបធម្មតា មិនមែនអាជីពផង។

អ្នកគួរស្វែងយល់នូវ Settings លើកម្មវិធីថតរូប។ អ្នកមិនចាំបាច់រៀនពី Exposure triangle ប៉ុន្តែគួរដឹងថាទំនាក់ទំនងនៃ Aperture, ISO និង Shutter speed វាអាចកំណត់នូវគុណភាពរបស់រូបភាព។ ស្មាតហ្វូនចាស់មិនមានជម្រើសទាំងអស់នេះទេ តែអ្នកអាចពិចារណាលើ Focus និង White balance បាន។

១០. ភ្លេចរៀបចំពន្លឺ មិនអីទេ បច្ចេកវិទ្យាអាចសម្រួលបានគ្រប់យ៉ាង

កំហុស៖ ការប៉ះដោយផ្ទាល់នូវពន្លឺព្រះអាទិត្យ ពន្លឺតាមបង្អួច ឬពន្លឺដែលប្លាតពីប្រភពផ្សេងទៀត មិនមែនជាបញ្ហានោះទេ គ្មាននរណាម្នាក់សម្គាល់នោះទេ។

ការប្រើប្រាស់ពន្លឺជាផ្នែកមួយសំខាន់ណាស់ ដល់ការថតរូប។ អ្នកមិនគួរថតរូបនរណាម្នាក់ ដែលមានពន្លឺព្រះអាទិត្យនៅពីក្រោយពួកគេនោះ លុះត្រាតែអ្នកចង់ថតរូបលក្ខណៈ Silhouette។ ទីតាំងពន្លឺដែលជះលើ Subject មានសារៈសំខាន់ណាស់ក្នុងការពិចារណា។ ជារួម អ្នកគួរធ្វើតាមគោលការណ៍ Ps បី នៃការថតរូបលើស្មាតហ្វូនរួមមាន គម្រោង កំណត់ទីតាំង និងកំណត់ Settingsទុកជាមុន៕

មុនយក iPhone ទៅលក់ កុំភ្លេចធ្វើរឿងទាំងនេះសិន

Apple បានបង្ហាញ iPhone 8, 8 Plus ហើយថែម iPhone X ដែលធ្វើឲ្យប្រិយមិត្តជាច្រើនរមែងចង់បានមកប្រើ។ ប្រសិនបើអ្នកប្រើប្រាស់ iPhone ចាស់ មានបំណងចង់ធ្វើការផ្លាស់ប្ដូរស៊េរីថ្មី ដោយលក់នូវម៉ូដែលចាស់ចោល អ្នកគួរស្វែងយល់នូវចំណុចខាងក្រោម មុនអ្នកលក់ទៅឲ្យនរណាម្នាក់៖

១. ធ្វើការ Back Up

អ្នកគួរធ្វើការ Back up រាល់អ្វីគ្រប់យ៉ាងលើទូរសព្ទមុននឹងលុបចោល។ នៅលើ PC អ្នកគួរមាននូវជំនាន់ចុងក្រោយនៃកម្មវិធី iTune > ភ្ជាប់ទូរសព្ទទៅនឹងកុំព្យូទ័រ។ ពេលវាបង្ហាញលើ iTune អ្នកចូលទៅកាន់ File > Devices > Back Up។ អ្នកអាចពិនិត្យមើលថាតើបាន Back up ឬអត់ ដោយចូល Preferences > Devices ហើយត្រួតពិនិត្យនូវកាលបរិច្ឆេទនៃការ Back up ចុងក្រោយ។

អ្នកក៏អាច Back up ដោយផ្ទាល់លើ iOS device ផងដែរ ដោយចូលទៅកាន់កម្មវិធី Settings > ជ្រើសរើសឈ្មោះអ្នក > ចុចលើ iCloud បន្ទាប់មកអូសចុះក្រោមដល់ iCloud Backup > Back up now។ ប្រសិនបើប៊ូតុង Toggle លើ iCloud Backup បើក វានឹងធ្វើការ Update នូវរាល់ទិន្នន័យ និង Settings អ្នក ពេល Device បាន Locked ហើយភ្ជាប់នឹងអ៊ីនធឺណិត។

ក្រោយមក ពេលអ្នកទិញនូវ iPhone ថ្មីអ្នកអាចជ្រើសរើស Back up ពី iTune ឬ iCloud ហើយគ្រប់ទិន្នន័យ និង Settings នឹងមានសភាពដូចទៅនឹងទូរសព្ទចាស់។

២. បិទមុខងារ Find My iPhone

ការបើកដំណើរការមុខងារ Find My iPhone ពេលខ្លះអាចត្រូវបាន Block activation ដោយម្ចាស់ថ្មី។ ដូច្នេះអ្នកគួរបិទ មុនអ្នកលក់ឲ្យអ្នកដទៃ។ អ្នកអាចចូលទៅកាន់កម្មវិធី Settings > ឈ្មោះអ្នក > iCloud > Find My iPhone ហើយចុចអូសបិទចោល។

៣. Sign out ពី iMessage

ពេលខ្លះសារបានបញ្ជូនពី iPhone មួយទៅ iPhone មួយទៀត ត្រូវបានទទួលដោយ iPhone ចាស់ ជៀសជាង Device ប៉ុន្តែបញ្ហានេះត្រូវបានដោះស្រាយរួចហើយ។ យ៉ាងណាមិញ ជាយោបល់ល្អ អ្នកគួរធ្វើការបិទ ដោយចូលទៅកាន់កម្មវិធី Settings > Messages > ហើយចុចលើប៊ូតុង Toggle បិទ iMessage។

៤. Unpair Apple Watch

ប្រសិនបើអ្នកមាន Apple Watch អ្នកគួរ Unpair វាពី iPhone អ្នកមុនលក់ចេញ។ អ្នកអាចដាក់ Device ទាំងពីរនៅជិតគ្នា ហើយបើកកម្មវិធី Apple Watch លើ iPhone > ចូលទៅកាន់ Tab ឈ្មោះ My Watch ហើយជ្រើសរើស នាឡិកាដែលនៅខាងលើនៃអេក្រង់ > ជ្រើសរើសនូវសញ្ញា Info circle នៅក្បែរនឹងនាឡិកា ដែលអ្នកចង់ Unpair > បន្ទាប់មកចុច Unpair Apple Watch ហើយចុច Confirm ដែលប្រហែលជាត្រូវការបញ្ចូលលេខសំងាត់ Apple ID។

៥. Sign Out ពី iCloud

ក្រុមហ៊ុន Apple បានណែនាំដល់អ្នកគ្រប់គ្នាដែលប្រើប្រាស់នូវ iOS 10 ឬលើនេះ គួរធ្វើការ Sign out ពី iCloud ក៏ដូចជា iTune និង App Store មុនលក់ចេញ។

លើ iOS 10.3+ អ្នកអាចចូលកម្មវិធី Settings > ឈ្មោះអ្នក > Sign Out > បញ្ចូលនូវពាក្យសំងាត់ Apple ID ហើយចុច Turn Off។
លើ iOS 10.2 អ្នកអាចចូលកម្មវិធី Settings > iCloud > Sign Out > ចុចលើ Sign Out ម្ដងទៀត បន្ទាប់មកចុច Delete from My Device ណាមួយ ហើយបញ្ចូលនូវពាក្យសំងាត់ Apple ID។ ក្រោយមកទៀតចូលកម្មវិធី Settings > iTunes & App Store > Apple ID > Sign Out។

៦. Erase all Settings

អ្នកគួរធ្វើការលុបនូវរាល់ទិន្នន័យ ដោយចូលទៅកាន់កម្មវិធី Settings > General > Reset > Erase all Content and Settings ហើយបញ្ជាក់នូវការយល់ព្រមលើផ្ទាំងដែលបង្ហាញ។

៧. Sim Card
អ្នកគួរធ្វើការដកនូវ Sim card ចេញ។

៨. ដល់ពេលលក់

ក្រោយរៀបចំរួចរាល់ អ្នកអាចថតរូបទូរសព្ទអ្នក ហើយបង្ហោះលើ Online សម្រាប់ធ្វើការលក់ ឬទៅលក់ដល់កន្លែងទិញ លក់ទូរសព្ទតែម្ដង។ លើសពីនេះ គួរដឹងពីហាងឆេងតម្លៃរបស់ iPhone ពេលកំពុងលក់ ព្រោះមិនដូច្នេះ អាចលក់ចេញខាតជ្រុល៕

Khmer Techno Innovation

Saturday, October 14, 2017

មកស្វែងយល់ពី AR ក្នុងពិភពបច្ចេកវិទ្យា

Friday, October 13, 2017

ស្មាតហ្វូនស៊េរីថ្មី កាមេរ៉ា៤ Huawei nova 2i

Thursday, October 12, 2017

ចំណុចខ្លាំងនិងខ្សោយទាំង ៣ មុនទិញ Pixel 2 ឬ Pixel 2 XL

មានរឿងគួរដឹងជាច្រើន ជុំវិញឧបករណ៍ Gimbal និងដងថត Selfie

ណែនាំឲ្យស្គាល់ ហាងលក់ទំនិញកំពូលទាំង ១០ លើលោក

កម្មវិធីទាំងបី អាចថតរូបគ្រប់កាលៈទេសៈលើ ស្មាតហ្វូន

អ្នកប្រើ iPhone ចង់ថតរូបបានស្អាត កុំភ្លេច តិចនិកទាំង ១២ ក្បាច់នេះ

កំហុសទាំង ១០ ចំពោះការថតរូបលើស្មាតហ្វូន ដែលគួរជៀសវាង

មុនយក iPhone ទៅលក់ កុំភ្លេចធ្វើរឿងទាំងនេះសិន

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

Ordered List

Definition List

Sample Text

Labels