សំបកកង់ប្រើខ្យល់ធម្មតា និង ប្រើហ្គាស នីត្រូហ្សែន

ពុធ, 13 វិច្ឆិកា 2013 09:14

តើខ្យល់ធម្មតា (compressed air) និង ហ្គាសនីត្រូហ្សែន ខុសគ្នាយ៉ាងដូចម្តេច ហើយមានសារៈសំខាន់យ៉ាងម៉េចខ្លះ សំរាប់កង់រថយន្តលោកអ្នក?

 

ខ្យល់រួមមានធាតុផ្សំជាច្រើនដួចជា ហ្គាសនីត្រូហ្សែន 78%, អុហ្ស៊ីហ្សែន 21%, Argon 1% និង នៅសល់ប៉ុន្មានភាគរយទៀតមានដូចជា សំណើម, CO2 និង ម៉ូលគុលផ្សេងៗទៀត ដោយសារតែធាតុទាំងអស់នេះហើយ ធ្វើឲ្យខ្យល់ក្នុងសំបកកង់ឆាប់ រីកមាឌ, មានទម្ងន់ធ្ងន់, អាចធ្វើឲ្យអាយុកាលសំបកកង់ ប្រើបានរយៈពេលខ្លី និង ធ្វើឲ្យរថយន្តស៊ីប្រេង ព្រោះតែសំណើមនៅក្នុងនោះ។

ខុសគ្នានិងហ្គាសនីត្រូហ្សែន បើយើងប្រើហ្គាសនីត្រូហ្សែន ដែលសុទ្ធ ១០០% នោះអត្ថប្រយោជន៍ដែលទទួលបានមានដូចជាៈ

សំពាធកង់មានលំនឹងៈ តាមធម្មតាខ្យល់ក្នុងកង់ តែងស្រក ឬ រីកមាឌទៅតាមសីតុណ្ហភាពនៃអាកាសធាតុ ជាទូរទៅវាស្រកចំនួន 3.5 psi បើប្រៀបជាមួយហ្គាសនីត្រូហ្សែនវិញ ស្រកត្រឹមតែ 2.2 psi ប៉ុណ្ណោះ។

ជួយសន្សំសម្ចៃប្រេងៈ តាមការសិក្សាស្រាវជ្រាវមួយ បានរកឃើញថា សំពាធខ្យល់កង់ធ្លាក់ 1 psi អាចធ្វើឲ្យរថយន្តស៊ីប្រេង 0,3% ដូច្នេះការប្រើហ្គាសនីត្រូហ្សែន គឺកាត់បន្ថយការធ្លាក់ចុះនៃសំពាធកង់ ប្រសិនបើលោកអ្នកប្រើខ្យល់ធម្មតា ត្រូវឧហ្សាពិនិត្យខ្យល់កង់ឲ្យបានទៀងទាត់។

សីតុណ្ហភាពត្រជាក់ នៅពេលកំពុងបើកបរៈ នៅពេលគេបូមខ្យល់ចូលទៅក្នុងម៉ាស៊ីន វានិងបូមទាំងសំណើមនៅក្នុងបរិយាកាសទៅជាមួយដែរ ហើយសំណើមនេះ បង្កើតបានជាវត្ថុរាវ ផ្ទុកនៅក្នុងធុងខ្យល់ ខណៈដែលលោកអ្នកសប់កង់រថយន្ត ដោយប្រើខ្យល់នេះ នោះខ្យល់ និង សំណើម និងចូលទៅក្នុងកង់រថយន្ត ហើយខ្យល់ និង សំណើមនេះនិងបង្កើតបានជាហ្គាស ដែលធ្វើឲ្យវាអាចរីកមាឌបានដោយសារតែកំដៅសំបកកង់ កំពុងតែរត់នៅលើផ្លូវថ្នល់ ហ្គាសនីត្រូហ្សែនពុំមានបញ្ហាដូច្នេះទេ ដោយសារតែវាស្ងួត ហើយគ្មានសំណើម ធ្វើឲ្យកង់មានទំងន់ស្រាលជាងសំបកប្រើខ្យល់ និង ស៊ីប្រេងតិច។

សរុបសេចក្តីមក ហ្គាសនីត្រូហ្សែនពិតជា មានអត្ថប្រយោជន៍ច្រើនក៏ពិតមែន ប៉ុន្តែវាមានតម្លៃថ្លៃនិងមិនសំបូរ ឬ ពុំមានកន្លែងបូមខ្យល់ណាមួយប្រើ ហ្គាសប្រភេទនេះ​នៅឡើយ​ទេ ការបូមខ្យល់កង់រថយន្តម្តងត្រូវចំណាយ ៥-៧ ដុល្លាសំរាប់កង់មួយ ហើយការចម្រាញខ្យល់​យក​តែ នីត្រូហ្សែនសុទ្ធត្រូវចំណាយពេលច្រើន និង ត្រូវការម៉ាស៊ីនទំនើប សង្ឈឹមថាថ្ងៃអនាគតហ្គាស​ប្រភេទនេះនិងមានតម្លៃថោក ដូចខ្យល់ធម្មតាដែរ។