2:07 AM
សព្វថ្ងៃភាគច្រើននៃម៉ាស៊ីនថតរូប (SLR)
ជាទូទៅអាចធ្វើការថតរូប បានទាំងក្នុងឯកសារប្រភេទ RAW និង JPEG
។ តើអ្នកធ្លាប់ដឹងទេ វាទាំង ២ មានលក្ខណៈខុសគ្នាអ្វីខ្លះ
ហើយពេលណាអ្នកគួរប្រើប្រាស់ឯកសារ RAW ឫ JPEG?
អ្វីទៅជាឯកសារ RAW?
RAW ជាឯកសារទ្រង់ទ្រាយថ្មីមួយ ដែលវាផ្ទុកនូវទិន្នន័យទទួលបានពីឧបករណ៍ចាប់សញ្ញារូបភាព (Image Sensor) តិចតួចបំផុត មិនថាតែចេញពីកាមេរ៉ាឌីជីថល, ម៉ាស៊ីនស្កេនរូបភាព និងម៉ាស៊ីនស្កេនរូបភាពមានចលនាឡើយ។ ឯកសារ RAW ត្រូវបានគេដាក់ឈ្មោះបែបនេះ ក៏ដោយសារជាធម្មតាវាមិនទាន់រួចរាល់ក្នុងការដំណើរការបោះពុម្ព (Print) ចេញនោះទេ ព្រោះតម្រូវឱ្យយកទៅកែច្នៃក្នុងកម្មវិធីមួយចំនួនជាមុនសិន។
ភាពខុសគ្នារវាង RAW និង JPEG
ជាទូទៅឯកសារ RAW រក្សាផ្ទុកនូវគុណភាពរូបភាពដែលទទួលបានពីកាមេរ៉ា ច្រើនផ្ដោតទៅលើភាពមុតស្រួច Sharpness និង Contrast ដោយពុំចាំបាច់ធ្វើប្រតិបត្តិការលើរូបភាពដើម ឫពង្រួមទំហំឯកសារឱ្យតូចឡើយ។ យ៉ាងណាមិញឯកសារ RAW តម្រូវឱ្យបម្លែងទៅជា JPEG ឫឯកសារផ្សេងទៀតជាមុនសិន ព្រោះវាអាចផ្ដល់ភាពងាយស្រួលក្នុងការបោះពុម្ពចេញនិងចែកចាយទៅកាន់អ្នកដទៃ។
ចំណែកឯ JPEG វិញជាទូទៅគេត្រូវធ្វើប្រតិបត្តិការលើរូបភាពដែលថតចេញនោះសិន ហើយពង្រួមទំហំឯកសារ (Compress) ឱ្យបានរួចរាល់ មុននឹងធ្វើការថតចម្លងឯកសាររក្សាទុក។ យ៉ាងណាមិញវាអាចថាជាឯកសារពេញនិយមបំផុត ហើយងាយស្រួលក្នុងការបើកមើលក្នុងកុំព្យូទ័រគ្រប់ប្រភេទ ។
អ្នកប្រើប្រាស់អាចកំណត់បានដោយសេរីក្នុងកម្រិតថ្នាក់នៃការបង្រួមឯកសារ ហើយការពារគុណភាពដើមនៃឯកសារ JPEG មានភាពងាយស្រួលបំផុត។
ហេតុអ្វីត្រូវថតរូបក្នុងឯកសារ RAW?
នៅពេលដែលអ្នកថតរូបក្នុងទ្រង់ទ្រាយឯកសារ RAW នោះវានឹងផ្ដល់លទ្ធភាពខ្ពស់ ក្នុងការត្រួតពិនិត្យបន្ថែមទៅលើអ្វីដែលអ្នកបានថត ហើយធ្វើការកែប្រែនៅកំហុសរូបភាពតូចៗដែលអ្នកបានថត ដូចជាការបង្កើនពន្លឺ (Exposure) ។ ទៀតសោតអ្នកក៏អាចជួសជុល White Balance ដែលវាជាប្រព័ន្ធដំណើរការលុបចោលនូវពណ៌មិនប្រាកដមួយចំនួនចេញពីរូបភាព ករណីបើការថតរូបភ្លាមៗអ្នកមិនធ្វើអាចការកំណត់មុខងារមួយនេះបាន។ សរុបមកបើអ្នកសម្រេចថតរូបក្នុងឯកសារ RAW នោះរូបភាពដែលផ្ដិតចេញមកគឺវាមានគុណភាពប្រសើរ ហើយ Contrast នៃរូបភាពក៏មានកម្រិតខ្ពស់ល្អថែមទៀតផង។ ជាធម្មតាឯកសារ JPEG ដែលបម្លែងចេញមកពីឯកសារ RAW វាមានគុណភាពច្បាស់ល្អជាងឯកសារ JPEG ថតផ្ទាល់ មួយវិញទៀតគេច្រើនប្រើឯកសារ RAW ដើម្បីផ្ដិតចេញនូវរូបភាពតាំងខ្នាតធំ (Wallpaper) និងឯកសារនៃរូបភាពធំៗមួយចំនួនទៀត។
ហេតុអ្វីត្រូវថតក្នុងឯកសារ JPEG?
ទំហំឯកសាររបស់ JPEG មានទំហំតូចជាងឯកសារ RAW ។ យើងក៏អាចនិយាយបាន វានឹងចំណាយពេលតិចជាងក្នុងការផ្ទេរឯកសារ JPEG ទៅកាន់កុំព្យូទ័រ។ JPEG ជាឯកសារស្តង់ដារមួយ ដែលគេនិយមប្រើបំផុតលើរាល់កម្មវិធីរូបភាពទាំងអស់នាពេលបច្ចុប្បន្ន។ ផ្ទុយទៅវិញសម្រាប់ឯកសារ RAW បើអ្នកជំនាញឫអ្នកអាជីពចង់ធ្វើការបើកឯកសារ RAW និងកែច្នៃគុណភាពរូប បើកុំព្យូទ័រពួកគេពុំមានកម្មវិធីតម្រូវឯកសារ RAW ទេ នោះក៏ពុំមានឱកាសក្នុងការបើកមើលវាបានឡើយ។ JPEG ឯណោះវិញ វាទូទៅសម្រាប់ការប្រើប្រាស់ ព្រោះមិនថាតែកុំព្យូទ័រអ្នកប្រើប្រាស់ធម្មតាមិនអាជីពក៏អាចបើកដំណើរការមើលនូវឯកសារ JPEG បានដែរ។ ម្ល៉ោះហើយបើអ្នកមិនមែនជាអ្នកថតរូបអាជីព ហើយមិនជាយល់ច្បាស់ពីតិចនិកការថតរូបច្រើន អ្នកគួរតែជ្រើសរើសក្នុងការថតរូបត្រឹមជាឯកសារ JPEG បានហើយ។
ជាចុងក្រោយ Sabay ជឿថាការរ៉ាយរ៉ាប់សង្ខេបខាងលើនេះ ប្រិយមិត្តអ្នកប្រើប្រាស់កាមេរ៉ាធំ ប្រាកដជាយល់ច្បាស់បានច្រើន ប៉ុន្តែបើអ្នកមានចម្ងល់ត្រង់ចំណុចណាមួយ សូមធ្វើការ Comment នៅខាងក្រោម ហើយយើងស្វាគមន៍ជានិច្ចក្នុងការបកស្រាយចម្ងល់របស់អ្នកទាំងអស់គ្នា តាមការដែលអាចធ្វើទៅបាន។
0 comments:
Post a Comment