April 2017 ~ Khmer Techno Innovation

Friday, April 28, 2017

ផលិតផលនិងសេវាកម្មដ៏ពេញនិយមបំផុតទាំង ១៦ របស់ Google (featured)

Google ដែលបានសម្រេចបង្កើតឈ្មោះក្រុមហ៊ុនថ្មី Alphabet ជាក្រុមហ៊ុនបច្ចេកវិទ្យាយក្សមួយ ដែលបង្កើតឡើងតាំងពីឆ្នាំ ១៩៩៨។ ក្រុមហ៊ុនបច្ចេកវិទ្យាមួយនេះ បានដំណើរការសេវាកម្មនិងផលិតផលរាប់មិនអស់ សម្រាប់អ្នកប្រើប្រាស់ទូទាំងពិភពលោកតាមប្រព័ន្ធអ៊ីនធឺណិត។

ថ្ងៃនេះ Sabay ណែនាំពីផលិតផលនិងសេវាកម្មដ៏ពេញនិយមបំផុតទាំង ១៦ របស់ក្រុមហ៊ុនមួយនេះ ដើម្បីមិត្តអ្នកអានជ្រាបកាន់តែច្បាស់។

១. Google Search Engine: ជាម៉ាស៊ីនស្វែងរកបែបបច្ចេកវិទ្យាទំនើប ដែលមានអ្នកប្រើប្រាស់ច្រើនបំផុត។ ប្រមាណ ៦០ ភាគរយនៃចំណែកទីផ្សារម៉ាស៊ីនរុករក Google ជាអ្នកកាន់កាប់។ គេហទំព័រជាច្រើន ត្រូវបានគេស្រាវជ្រាវតាមរយៈសេវារបស់ Google នេះឯង។

២. Google Chrome: វាជា Web Browser មួយដែលបង្កើតឡើងដោយ Google ដូចគ្នា ដែលមានអ្នកប្រើច្រើនបំផុតក្នុងលោក។ ហេតុផលដែលទទួលបានអ្នកប្រើប្រាស់ច្រើន ដោយសារផ្ទៃកម្មវិធីទាំងស្រុង គឺមានលក្ខណៈសាមញ្ញងាយស្រួលប្រើប្រាស់ ហើយល្បឿនដំណើរការលឿន។
បច្ចុប្បន្នភាព Chrome អាចគាំទ្របានទាំងនៅលើប្រព័ន្ធប្រតិបត្តិ Windows, OS X, Linux, Android និង iOS ។

៣. Gmail: ជាសេវាផ្ញើ Email ឥតគិតថ្លៃ ដែលត្រួតពិនិត្យនិងបង្កើតឡើងដោយក្រុមហ៊ុនយក្ស Google ។ ក្រុមហ៊ុនសឹងពាក់កណ្ដាលប្រទេសនៅសហរដ្ឋអាមេរិក ប្រើប្រាស់ Gmail ក្នុងគោលបំណងផ្ញើសារ Email ផ្សេងៗ។ ក្នុងបណ្ដាប្រទេសមួយចំនួនអ្នកប្រើប្រាស់ ក៏អាចធ្វើការផ្ញើលុយតាមរយៈគណនី Gmail ថែមទៀតផង ។

បញ្ជាក់ថា Gmail អនុញ្ញាតឱ្យអ្នកប្រើប្រាស់ទទួលបានអង្គផ្ទុក 15GB ដែលបូកបញ្ចូលទាំងការប្រើលើ Google Drive និង Google+ Photos ។

៤. Android: មិនថាតែស្មាតហ្វូន រថយន្ត ទូរទស្សន៍ឆ្លាតវៃ នាឡិកាឆ្លាតវៃ និងឧបករណ៍ថេបប្លេតជាច្រើនក្នុងលោក កំពុងដំណើរការនៅលើប្រព័ន្ធប្រតិបត្តិ Android ដែលបង្កើតឡើងដោយ Google ។ ក្រៅពីនោះស្មាតហ្វូនដែលមានតម្លៃថោកមួយចំនួន ក៏អាចដំណើរការលើ Android បានផងដែរ នេះហើយជាកត្តាដែលធ្វើឱ្យអ្នកប្រើប្រាស់ទូទៅ អាចស្គាល់ច្បាស់ច្រើនពីវា។

៥. YouTube: YouTubeមកទល់បច្ចុប្បន្នកំពុងប្រែក្លាយជាប្រព័ន្ធទស្សនាវីដេអូ Online លំដាប់ទី ១ ក្នុងលោក។ ដំបូងឡើយ YouTube បង្កើតឡើងដោយអតីតបុគ្គលិក PayPal ចំនួន ៣ រូប តែដល់ឆ្នាំ ២០០៦ ក្រុមហ៊ុនយក្ស Google ក៏ទិញយកតែម្តង។ អ្នកប្រើប្រាស់អាចទស្សនានិងបង្ហោះផ្សាយនូវវីដេអូជាច្រើនប្រភេទនៅលើ YouTube។

៦. Google Adsense: ជាកម្មវិធីដែលមានមូលដ្ឋានផ្តោតលើការផ្សព្វផ្សាយគ្រប់គ្រងដោយ Google ។ កម្មវិធីនេះបង្ហាញនូវរូបភាព អក្សរ វីដេអូផ្សេងៗ នៅលើគេហទំព័រ ដែលម្ចាស់អ្នកផ្សព្វផ្សាយពាណិជ្ជកម្មបានបង់លុយទៅឱ្យ Google។
អ្នកប្រើប្រាស់ Adsense ក៏អាចទទួលបានថវិកាមកវិញ ក្រោយពេលទទួលបានការចុច (Click) លើផ្ទាំងផ្សព្វផ្សាយណាមួយ។ យ៉ាងណាមិញ Google Adsense ក៏មានច្បាប់ទម្លាប់ត្រឹមត្រូវ និងលក្ខខណ្ឌច្បាស់លាស់ជាច្រើន ទៅដល់អ្នកប្រើប្រាស់ផងដែរ។

៧. Google Drive: ជាប្រភេទសេវាផ្ញើឯកសារលើអ៊ីនធឺណិតមួយរបស់ Google ហើយក៏អាចនិយាយបានថា វាកំពុងពេញនិយមបំផុតនាពេលបច្ចុប្បន្ន។ ទំហំ Free សម្រាប់អតិថិជន 15GB អាចអនុញ្ញាតឱ្យអ្នកធ្វើការរក្សាទុកឯកសារផ្សេងៗជាច្រើន ទៅក្នុងប្រព័ន្ធខាងលើបាន។

៨. Google Adwords: ជាប្រព័ន្ធផ្សព្វផ្សាយពាណិជ្ជកម្ម Online សម្រាប់អ្នកដែលចង់ផ្សព្វផ្សាយផលិតផលនិងសេវាកម្មរបស់ខ្លួនជាមួយ Google ។ អ្នកប្រើប្រាស់ក៏អាចទទួលបានអត្ថប្រយោជន៍ជាថវិកាមកវិញជុំវិញចំនួន Click និងចំនួនអ្នកចាប់អារម្មណ៍ផ្ទាំងពាណិជ្ជកម្មទាំងឡាយ។

៩. Google Maps: អ្នកប្រើប្រាស់សេវាមួយនេះ អាចធ្វើការមើលនូវផែនទីនៃផ្នែកណាមួយរបស់ពិភពលោក ហើយអ្នកក៏អាចមើលឃើញពីទិដ្ឋភាពនៅលើដងផ្លូវផងដែរ។ កម្មវិធី Google Maps មានបម្រើជូនអ្នកប្រើប្រាស់ទាំងនៅលើគេហទំព័រផ្ទាល់ និងនៅលើស្មាតហ្វូនផ្ទាល់។ វាមានទំនាក់ទំនងជាមួយ Google Earth ដែលមានមុខងារស្រដៀងគ្នានោះ។

១០. Google Public DNS : ជាសេវា DNS សាធារណៈនៅក្នុងពិភពលោក ។ សេវាកម្មមួយនេះ ផ្ដល់ជូននូវដំណោះស្រាយ សម្រាប់ម្ចាស់គេហទំព័រ ហើយមានសមត្ថភាពអាចជំរុញល្បឿន និងផ្ដល់ការការពារដល់គេហទំព័រណាមួយ។

១១. Google News: បើសិនជាអ្នកចង់ទទួលបានព័ត៌មានក្រៅប្រទេសថ្មីៗទាក់ទិននឹងកីឡា បច្ចេកវិទ្យា អ្នកប្រាកដជាមិនអាចរំលងជាមួយសេវាកម្មនេះបានឡើយ។ មកទល់បច្ចុប្បន្ន Google News អាចគាំទ្រនូវ២៨ ភាសា ក្នុង ៦០ ប្រទេសផ្សេងគ្នា។

១២. Google+ : នេះជាបណ្ដាញសង្គមមួយ បង្កើតឡើងដោយ Google ដែលលេចចេញវត្តមានកាលពីឆ្នាំ ២០១១ ។ មុខងារពិសេសមួយរបស់វា គឺ Hangouts ដែលអាចអនុញ្ញាតឱ្យអ្នកប្រើប្រាស់ធ្វើការ Call ជាលក្ខណៈ Video ទៅកាន់មនុស្ស ១០ នាក់ក្នុងពេលតែមួយបាន។

១៣. Blogger: វាជាប្លុកសម្រាប់អនុញ្ញាតឱ្យអ្នកសាកល្បងបង្កើតនូវគេហទំព័រ បង្ហោះព័ត៌មាន សរសេរអត្ថបទផ្សេងៗជាដើម។

១៤. Google Docs: នេះជាផលិតផលដ៏ល្អបំផុតមួយរបស់ Google ដូចគ្នា។ តាមពិតទៅវាមានមុខងារស្រដៀង Microsoft Word អីចឹងដែរ ដោយយើងអាចបង្កើតនិងកែច្នៃឯកសារ Docs, Spreadsheet និង Presentation (ឯកសារធ្វើបទបង្ហាញ) ដែលមានការភ្ជាប់ជាមួយ Google Drive។

១៥. Google Books: ក្រុមហ៊ុន Google បានសេ្កននិងរក្សានូវអត្ថបទជាច្រើន ដកស្រង់ចេញពីសៀវភៅ ទស្សនាវដ្ដី ហើយបង្ហោះផ្សាយឡើងលើផលិតផលមួយនេះរបស់ខ្លួន។ Google បានប្រើប្រាស់នូវបច្ចេកវិទ្យា OCR (Opitcal Chracter Recognition) ដើម្បីរក្សាទុកនូវទិន្នន័យទាំងអស់។

១៦. Google Translate: វាជាសេវាបកប្រែភាសាល្អបំផុតមួយក្នុងលោក។ វាគាំទ្រច្រើនភាសាណាស់ ដោយទោះបីភាសាមួយចំនួន បកប្រែមិនជាត្រូវខ្លះក្តី ប៉ុន្តែ Google បានជំរុញឱ្យម្ចាស់ភាសាដើម ព្យាយាមជួយកែប្រែចន្លោះប្រហោងទាំងនោះ តាមរយៈមុខងារកែប្រែរបស់ខ្លួនផងដែរ។
សរុបមកវិញក៏នៅមានសេវាកម្មនិងផលិតផលដទៃទៀត ដែលក្រុមហ៊ុន Google កំពុងអភិវឌ្ឍសោតយ៉ាងដូចជា Google Fiber, Project Loon និងមួយចំនួនបន្ថែមទៀត។

Vimeo និង YouTube ខុសគ្នាយ៉ាងណា

បច្ចុប្បន្នមានប្រព័ន្ធផ្សព្វផ្សាយវីដេអូពីរដែលទទួលការពេញនិយមបំផុតគឺ YouTube ដែលឈរតំណែងលេខ ១ និង Vimeo ដែលឈរនៅតំណែងលេខ ២។ តាមពិតទៅប្រព័ន្ធផ្សព្វផ្សាយវីដេអូទាំង ២ សុទ្ធសឹងតែមានលក្ខណៈសម្បត្តិនិងគុណវិបត្តិខុសប្លែកពីគ្នា។

តើប្រព័ន្ធផ្សព្វផ្សាយវីដេអូទាំង ២ មានលក្ខណៈខុសគ្នាយ៉ាងដូចម្ដេច?
Vimeo ត្រូវបានបង្កើតឡើងនៅឆ្នាំ ២០០៤ ហើយសន្ទុះការគាំទ្របានកើនឡើងរហ័សជាទីបំផុត។ ភាគច្រើនប្រភេទវីដេអូរបស់ Vimeo ច្រើនបង្កប់នៅក្នុងវេបសាយផ្សេងៗ។ Vimeo អាចគាំទ្រវីដេអូកម្រិត HD បានមុនគេបង្អស់នៅក្នុងលោក។

YouTube ត្រូវបានបង្កើតឡើងកាលពីឆ្នាំ ២០០៥។ មកទល់បច្ចុប្បន្ន វាឈរនៅតំណែងទី ១។ អ្នកទស្សនាភាគច្រើន ចូលទៅកាន់ YouTube ដើម្បីទស្សនាប្រភេទវីដេអូការណែនាំនិងការបង្រៀនផ្សេងៗ។ YouTube បានបង្កើតនូវមុខងារពិសេស ដែលអាចឱ្យអ្នកទស្សនាអាចធ្វើការ Like និង Comment ជាមួយម្ចាស់ផលិតវីដេអូថែមទៀតផង។

ការប្រៀបធៀបគុណភាព

កាលពីឆ្នាំ ២០០៧ Vimeo គាំទ្រការបង្ហោះវីដេអូកម្រិត HD និងក្រោយមកបានវិវត្តទៅរកកម្រិត 4K Ultra HD។ គួរឱ្យសោកស្ពាយ អ្នកផលិតវីដេអូដែលមិនបានចំណាយលុយឱ្យ Vimeo នឹងមិនទទួលការអនុញ្ញាតបង្ហោះវីដេអូកម្រិតខ្ពស់ៗបានទេ ហើយស្វ័យប្រវត្តិវានឹងលោតមកវីដេអូកម្រិត 720p វិញ។
ខាងក្រោមជាវីដេអូកម្រិត 4K UHD ដែលបានបង្ហោះនៅលើប្រព័ន្ធ Viemo:

YouTube បានដំណើរការគាំទ្រការបង្ហោះវីដេអូកម្រិត 720p HD នៅចុងឆ្នាំ ២០០៨ ។ ពេលចុងក្រោយ ពួកគេបានបោះជំហានយ៉ាងរហ័សទៅរកវីដេអូកម្រិតដល់ទៅ 8K UHD ឯណោះ។ យ៉ាងណាហេតុផលមិនល្អសម្រាប់អ្នកទស្សនា ដោយសារកុំព្យូទ័រមួយចំនួននៅមិនទាន់អាចគាំទ្រជាមួយវីដេអូកម្រិត 4K/8K UHD បានឡើយ ដោយតម្រូវឱ្យទម្លាក់កម្រិតទស្សនាមកទាបបន្តិច។

ខាងក្រោមជាវីដេអូកម្រិត 1440p ដែលបង្ហោះនៅលើ YouTube (អ្នកក៏អាចសាកល្បងបាន ក្នុងការទស្សនាវីដេអូកម្រិត 8K បើចង់ដឹងថាតើវាដំណើរឫអត់?

ការប្រៀបធៀបតម្លៃ

Vimeo និង YouTube មានកញ្ចប់សេវាកម្មបង់លុយនិងឥតគិតថ្លៃសម្រាប់អ្នកប្រើប្រាស់ដូចគ្នា ។ អត្ថប្រយោជន៍គ្រាន់ថា អ្នកបង់លុយអាចទទួលបានមុខងារពិសេសៗជាង។
Vimeo មានកញ្ចប់សេវាកម្មបង់លុយ ៣ ប្រភេទ (អ្នកប្រើប្រាស់កញ្ចប់ Free អាចបង្ហោះវីដេអូដល់ 500MB តែកម្រិត 720p អស់ធំ)

-Vimeo Plus: តម្លៃ ៦០ ដុល្លារ ក្នុងមួយឆ្នាំ អ្នកអាចបង្ហោះវីដេអូដល់កម្រិត 5GB ក្នុងមួយសប្ដាហ៍និងមានមុខងារឯកជនកម្រិតខ្ពស់។ អ្នកក៏អាចបង្ហោះវីដេអូក្នុងកម្រិតដល់ទៅ 4K UHD ហើយផ្ទាំងពាណិជ្ជកម្មនឹងត្រូវបានលុបចោលនៅលើវីដេអូសម្រាប់អ្នកទស្សនា។

- Vimeo Pro: តម្លៃ ២០៤ ដុល្លារក្នុងមួយឆ្នាំ អាចបង្ហោះវីដេអូបានដល់ 20GB ក្នុងមួយសប្ដាហ៍ មានអត្ថប្រយោជន៍ដូចខាងលើ និងមានការបន្ថែមមុខងារវិភាគកម្រិតខ្ពស់។

- Vimeo Business: តម្លៃ ៦០០ ដុល្លារក្នុងមួយឆ្នាំ អ្នកអាចបង្ហោះវីដេអូដល់ 5TB មិនកំណត់ពេលវេលាប្រចាំសប្ដាហ៍ ទទួលបានអត្ថប្រយោជន៍ពិសេសបន្ថែមទៀត គឺមុខងារទីផ្សារសម្រាប់ការគ្រប់គ្រងវីដេអូរបស់អ្នក។

សរុបមកវិញការចំណាយលុយសម្រាប់ Vimeo មានអត្ថប្រយោជន៍មួយខ្ពស់ សម្រាប់អ្នកផលិតនិងអ្នកទស្សនា ដែលអាចធ្វើឱ្យពួកគេកាន់តែទទួលបានភាពរីករាយបន្ថែមទៀត។

YouTube សេវាកម្មខុសប្លែកដូចមេឃនិងដីធៀបទៅនឹង Vimeo គឺវាមានសេវាកម្ម YouTube Red ដែលអ្នកទស្សនាចំណាយ ៩,៩៩ ដុល្លារក្នុងមួយខែ អាចមើលវីដេអូដោយពុំជាប់ផ្ទាំងផ្សព្វផ្សាយពាណិជ្ជកម្មអ្វីទាំងអស់។

អ្នកអាចបង្ហោះវីដេអូឥតគិតថ្លៃដល់កម្រិត 8K UHD ឱ្យតែគណនីបង្កើតមានការបញ្ជាក់ (Verify)។ ជាមួយគ្នានេះ វាពុំមានការកំណត់ទំហំវីដេអូផុសបានប៉ុន្មាននោះដែរ។

ការប្រៀបធៀបទស្សនិកជន

បើអ្នកជាម្ចាស់វីដេអូនៅលើប្រព័ន្ធ Vimeo ជាទូទៅរាល់ថ្ងៃអាចមិនទទួលបានអ្នកទស្សនាដល់ ១ ពាន់នាក់ផងក៏ថាបាន ព្រោះតួលេខទស្សនិកជនគាំទ្រ Vimeo គឺតិចបំផុត ។ បញ្ជាក់ថាវីដេអូភាគច្រើននៅលើប្រព័ន្ធនេះ គឺជាវីដេអូប្រភេទកីឡា។

YouTube ជាបណ្តុំប្រព័ន្ធទស្សនាមានអ្នកគាំទ្រច្រើនរាប់មិនអស់ ហើយវីដេអូភាគច្រើនក៏មានការចូលរួមផ្ដល់មតិយោបល់ពីអ្នកទស្សនាមិនថាអាក្រក់ឫល្អ ដែលអ្នកបង្ហោះនឹងទទួលជារឿយៗ។ អ្នកក៏អាចធ្វើការផ្សព្វផ្សាយវីដេអូរបស់អ្នកបន្ថែម ប៉ុន្តែត្រូវចំណាយលុយឱ្យ YouTube ក្រោយមកអ្នកនឹងក្លាយជាបុគ្គលដែលទទួលបានការចាប់អារម្មណ៍ខ្ពស់មួយនៅក្នុងប្រព័ន្ធនោះ។

ខាងក្រោមជាវីដេអូដែលមានអ្នកទស្សនាជាង ៩០ មីននាក់ក្នុងពេលថ្មីៗនេះ។

ការសម្រេចចិត្តចុងក្រោយរវាង YouTube និង Vimeo

ជាធម្មតាបើអាជីវកម្មចង់បង្ហោះវីដេអូទៅកាន់គេហទំព័រភាគច្រើន គេនឹងរើសយក Vimeo។ ផ្ទុយទៅវិញ ម្ចាស់វីដេអូដែលចង់បង្កើតនិងទទួលបានអ្នក Follow ច្រើន គេនឹងរើសយក YouTube គួបផ្សំនឹងអត្ថប្រយោជន៍ជាច្រើនទៀតរបស់វា។

បន្ទាប់ពីការអានត្រួសៗជុំវិញការរ៉ាយរ៉ាប់ខាងលើ Sabay ជឿជាក់ថាប្រិយមិត្តអ្នកអាន បានសម្រេចចិត្តច្បាស់លាស់រួចទៅហើយ ថាគួរជ្រើសរើសយកប្រព័ន្ធវីដេអូមួយណាទៅប្រើប្រាស់?

កម្មវិធីបណ្ដាញសង្គមទាំង ២៣ ដែលសព្វថ្ងៃមនុស្សកំពុងប្រើប្រាស់!

បច្ចុប្បន្នមនុស្សជាច្រើន និយមធ្វើការប្រាស្រ័យទាក់ទងគ្នា ដោយប្រើប្រាស់កម្មវិធីបណ្ដាញសង្គមនានា។ កម្មវិធីមួយចំនួន បានបង្កើតឡើងទទួលបានភាពល្បីល្បាញតាំងពីដំបូង ខ្លះទៀតត្រូវផ្អាកចោលនៅពាក់កណ្ដាលទី ហើយខ្លះទៀតទើបតែបង្កើតថ្មី ដែលត្រៀមឆក់យកបេះដូងអ្នកប្រើប្រាស់ជុំវិញសកលលោក។

ដោយឡែកក្នុងថ្ងៃនេះ Sabay ចែករំលែកនូវកំពូលបណ្ដាញសង្គមទាំង ២៣ ដែលសព្វថ្ងៃមនុស្សកំពុងប្រើប្រាស់។

១.បណ្ដាញសង្គម Facebook

នរណាៗក៏ប្រើប្រាស់ Facebook ដែលនេះហើយជាកត្តាធ្វើឱ្យបណ្តាញសង្គមខាងលើ បម្រើការប្រើប្រាស់របស់មនុស្សប្រមាណ ១,៥៩ ពាន់លាននាក់ ជារៀងរាល់ខែ គិតត្រឹមខែធ្នូឆ្នាំ ២០១៥ ហើយមានមនុស្សប្រមាណ ១ ពាន់លាននាក់ បានចុចប្រើប្រាស់ប្រចាំថ្ងៃ (នេះបើយោងតាមរបាយការណ៍ពី Facebook ផ្ទាល់។) ក្រៅពីនោះ ក៏មានកម្មវិធី Messenger ដែលឈរនៅលំដាប់ទី ២ បន្ទាប់ពី WhatsApp ជាប់ឈ្មោះជាកម្មវិធីផ្ញើសារលំដាប់កំពូលក្នុងលោកផងដែរ ទន្ទឹមពេលដែល Facebook បរាជ័យក្នុងការបោះទុនទិញយកបណ្ដាញសង្គម Snapchat កាលពីឆ្នាំ ២០១៣ ។

២. បណ្ដាញសង្គម Twitter

Twitter ក៏ត្រូវបានគេស្គាល់ថាជាកម្មវិធីបណ្ដាញសង្គមមួយ ដែលកំណត់ឱ្យអ្នកប្រើប្រាស់ធ្វើការបង្ហោះជាលក្ខណៈសារជាអក្សរត្រឹមតែ ១៤០ តួប៉ុណ្ណោះ ដោយវាក៏ជាចំណង់ចំណូលចិត្តមួយរបស់អ្នកប្រើប្រាស់ភាគច្រើន។ មុខងារពិសេសៗជាច្រើន នាពេលបច្ចុប្បន្នរបស់ Twitter ក៏មិនខុសពី កម្មវិធី Facebook ប៉ុន្មាននោះដែរ។

៣. បណ្ដាញសង្គម LinkedIn

LinkedIn ជាបណ្ដាញសង្គមមួយ ដែលបណ្ដុំទៅដោយអ្នកមានវិជ្ជាជីវៈខ្ពស់ ក៏ដូចជាទីតាំងសម្រាប់ការតភ្ជាប់ទៅនឹងរបរចិញ្ចឹមជីវិតរបស់មនុស្សគ្រប់គ្នា។ ទាក់ទងនឹង Profiles របស់គណនីអ្នកប្រើប្រាស់ សុទ្ធសឹងតែបង្ហាញពី បទពិសោធន៍ការងារ, ចំណេះដឹង, ការងារស្ម័គ្រចិត្ត, វិញ្ញាបនបត្រ និងពានរង្វាន់ផ្សេងៗ ដែលមានអត្ថប្រយោជន៍ក្នុងការស្វែងរកការងាររបស់ពួកគេម្នាក់។ បន្ថែមពីនោះអ្នកប្រើប្រាស់ក៏អាចធ្វើការចែករំលែកនូវយោបល់ពីមុខជំនួញឫអ្វីផ្សេងទៀត តាមរយៈការបង្ហោះផ្សាយជាលក្ខណៈអត្ថបទស្រដៀងទៅនឹង Facebook ផងដែរ។

៤. បណ្ដាញសង្គម Google+

ក្រោយទទួលភាពបរាជ័យជាច្រើនដង ជាមួយ Google Buzz និង Google Wave រហូតដល់ចុងឆ្នាំ ២០១៥ ក្រុមហ៊ុនយក្ស Google ក៏បានបង្កើតជាថ្មីនូវបណ្ដាញសង្គម Google+ ដែលបញ្ចូលនូវមុខងារពិសេសៗ ជាច្រើន គួបផ្សំនឹងការប្រមែប្រមូលនូវមធ្យោបាយផ្ដល់ការប្រាស្រ័យទាក់ទងគ្នាយ៉ាងងាយស្រួល ដល់អ្នកប្រើប្រាស់ទូទៅ។

៥.បណ្ដាញសង្គម YouTube

កន្លែងដែលមនុស្សរាល់គ្នា ទស្សនានិងធ្វើការចែករំលែកវីដេអូលើប្រព័ន្ធអ៊ីនធឺណិតគឺ YouTube ។ អាចនិយាយថា វាជាម៉ាស៊ីនស្រាវជ្រាវលំដាប់ទី ២ បន្ទាប់ពី Google ។ បញ្ជាក់ថាកាលពីពេលថ្មីៗកន្លងទៅនេះ YouTube ក៏បានបង្កើតនូវសេវាកម្មថ្មីមួយ ដែលហៅបានថា YouTube Red ដែលវាជាកញ្ចប់សេវាកម្មបិទចោលរាល់ផ្ទាំងផ្សព្វផ្សាយពាណិជ្ជកម្មទាំងអស់ ជៀសវាងការរំខានក្នុងការទស្សនាវីដេអូផ្សេងៗ។

៦. បណ្ដាញសង្គម Instagram

បណ្ដាញសង្គមដែលក្រុមហ៊ុន Facebook ទិញយកក្នុងទំហំសាច់ប្រាក់ប្រមាណ ១ ពាន់លានដុល្លារ កាលពីឆ្នាំ ២០១២ គឺ Instagram ដោយវាបានប្រែក្លាយជាបណ្ដាញសង្គមមួយ ដែលសំបូរទៅដោយការចែករំលែកកម្រងរូបភាពផ្សេងៗ គួបផ្សំនឹងវីដេអូខ្លីៗ ជាច្រើន។ យ៉ាងណាមិញមកទល់ពេលនេះ Instagram ក៏បានបង្កើតកញ្ចប់សេវាកម្មផ្សព្វផ្សាយពាណិជ្ជកម្មសម្រាប់ផលិតផលផងដែរ។

៧. បណ្ដាញសង្គម Pinterest

បច្ចុប្បន្នមានមនុស្សប្រមាណ ១០ លាននាក់ បានកំពុងប្រើប្រាស់ជារៀងរាល់ខែ នៅលើបណ្ដាញសង្គម Pinterest ដោយវាបានប្រមូលចែកចាយនូវកម្រងរូបភាពស្អាតៗ ជាច្រើន ប៉ុន្តែចំពោះរូបភាពមួយចំនួន ក៏តម្រូវឱ្យមានការចំណាយលុយទិញ ពីអ្នកប្រើប្រាស់ផងដែរ ព្រោះមានការលក់ចេញពីអ្នកចែកចាយរូបភាពមួយចំនួន។

៨. បណ្ដាញសង្គម Tumblr

Tumblr ក៏ជាបណ្ដាញសង្គមមួយ ដែលមានភាពស្រដៀងទៅនឹង Pinterest ដែរ ប៉ុន្តែភាគច្រើនគេសង្កេតឃើញអ្នកប្រើប្រាស់ ច្រើនជាមនុស្សវ័យជំទង់និងមនុស្សពេញវ័យ។ អ្នកប្រើប្រាស់អាចធ្វើការ កែប្រែនូវផ្ទៃ Blog របស់ពួកគេ បង្កើតការផុសផ្សេងៗ ក្នុងគោលបំណងទាក់ទាញ ការចូលចិត្តពីសំណាក់អ្នកប្រើប្រាស់ឯទៀត ក្នុងបណ្ដាញសង្គមតែមួយ។

៩. បណ្ដាញសង្គម Snapchat

Snapchat ជាបណ្ដាញសង្គមដែលទទួលបានការគាំទ្រគួរសមនាពេលបច្ចុប្បន្ន ដោយលក្ខណៈពិសេសមួយរបស់វា គឺត្រូវបានគេដឹងថា ក្រោយពេលដែលយើងផ្ញើជារូបភាពឫវីដេអូខ្លីៗទៅកាន់មិត្តភ័ក្ដិដែលប្រើប្រាស់ បណ្ដាញសង្គមនោះ ក្រោយពេលដែលពួកគេមើលឃើញហើយភ្លាម ប៉ុន្មាននាទីក្រោយ ឯកសារទាំងនោះ នឹងត្រូវបានលុបចោលដោយស្វ័យប្រវត្តិតែម្ដង។ បន្ថែមពីនោះវាក៏មានមុខងារ Stories ដែលយើងធ្លាប់តែបានឃើញនៅលើបណ្ដាញសង្គម Facebook ទើបចាប់ផ្តើមកាលពីប៉ុន្មានសប្ដាហ៍មុន។

១០. បណ្ដាញសង្គម Reddit

Reddit ជាបណ្ដាញសង្គមមួយ ដែលមានការរចនាផ្ទៃគេហទំព័រមិនជាស្អាតប្លែកភ្នែកដូចទៅនឹងបណ្ដាញសង្គមដទៃឡើយ ប៉ុន្តែវាពោរពេញទៅដោយអត្ថប្រយោជន៍ខ្ពស់ជាទីបំផុត មនុស្សភាគច្រើន ចូលចិត្តធ្វើការចែករំលែកនូវ លីង, រូបភាពនិងវីដេអូ ទៅជាប្រធានបទដ៏ក្ដៅគគុកមួយ ហើយមានការចូលរួមវែកញែកពោរពេញទៅដោយចំណេះដឹងពីសំណាក់អ្នកប្រើប្រាស់ដទៃទៀត។

១១.បណ្ដាញសង្គម Flickr

Flickr ជាបណ្ដាញសង្គមមួយ ដែលនៅក្រោមទ្រនុងគ្រប់គ្រងរបស់ Yahoo ។ កាលពីដំបូងឡើយ មុន Pinterest និង Instagram វាយលុកចូល Flickr ទទួលបានការគាំទ្រខ្លាំងបំផុត ពីសំណាក់អ្នកប្រើប្រាស់ ដែលនិយមបង្ហោះរូបភាព បង្កើតជាលក្ខណៈ Album និងបង្អួតគ្នាពីរូបភាពជំនាញផ្សេងៗ ទៅកាន់មិត្តភ័ក្ដិ ។ អ្នកប្រើប្រាស់អាចបង្ហោះរូបភាពក្រោមទំហំ 1,000GB ដោយឥតគិតថ្លៃ។

១២. បណ្ដាញសង្គម Swarm ដោយ Foursquare

Swarm ជាបណ្ដាញសង្គមមួយ ដែលគ្រប់គ្រងដោយក្រុមហ៊ុន Foursquare ដោយអ្នកប្រើប្រាស់អាចធ្វើការចែករំលែកនៅទីតាំងដែលអ្នកកំពុងឈរ ផ្ញើសារប្រាប់ពីគម្រោងផ្សេងៗ ដែលអ្នកត្រូវណាត់ជួបជាមួយមិត្តភ័ក្ដិ។

១៣. បណ្ដាញសង្គម Kik

Kik ជាបណ្ដាញសង្គមផ្ញើសារឥតគិតថ្លៃ ដែលពេញនិយមបំផុត សម្រាប់យុវវ័យនាពេលបច្ចុប្បន្ន ដោយអ្នកអាចធ្វើការផ្ញើជាកម្រងរូប GIFs, រូបភាពនិងវីដេអូទៅកាន់មិត្តភ័ក្ដិរបស់អ្នក។ Kik ក៏អាចធ្វើការស្កេនកូដគណនីអ្នកប្រើប្រាស់ឯទៀត ពីការជំនួសដោយស្វែងរកឈ្មោះ ស្រដៀងទៅនឹង Snapcode របស់ Snapchat ផងដែរ។

១៤. បណ្ដាញសង្គម Yik Yak

Yik Yak ត្រូវបានគេដាក់ឈ្មោះថាជាបណ្ដាញសង្គមដ៏អាថ៌កំបាំងមួយ ដោយពុំមានការ Add Friend អ្វីដូចទៅនឹងបណ្ដាញសង្គមឯទៀតឡើយ ដោយវាមានការផ្ញើសារជាលក្ខណៈអនាមិក (Anonymous) ប៉ុន្តែជួនកាល វាក៏អាចបង្កបញ្ហាមួយចំនួនផងដែរ ដល់អ្នកប្រើប្រាស់។

១៥. បណ្ដាញសង្គម Shots

Shots ជាបណ្តុំនៃការចែករំលែករូបភាពនិងវីដេអូ ដែលយុវវ័យនិយមប្រើបំផុតដែរ ប៉ុន្តែគេសង្កេតឃើញ បណ្តាញសង្គមមួយនេះ ភាគច្រើនពោរពេញទៅដោយកម្រងរូបភាព Selfie ហើយការថតវីដេអូ VHS-Styleប៉ុន្តែវាមិនបានបញ្ចូលមុខងារ Like និង Comment នោះទេ។

១៦. បណ្ដាញសង្គម Periscope

Periscope ជាបណ្ដាញសង្គមប្រមូលផ្ដុំការ Live វីដេអូពីទូរស័ព្ទរបស់អ្នក។ អ្នកផ្សព្វផ្សាយវីដេអូអាចធ្វើការផ្ញើជាលក្ខណៈសម្ងាត់ទៅកាន់នរណាម្នាក់ក៏បាន។ ប្រិយមិត្តអ្នកប្រើប្រាស់អាចសាកល្បងធ្វើការបើកទៅក្នុងបណ្ដាញសង្គមនេះ ហើយទស្សនាវីដេអូ Live ជាច្រើនជុំវិញសកលលោក។

១៧. បណ្ដាញសង្គម Medium

Medium អាចសាកសមបំផុតសម្រាប់អ្នកចូលចិត្តអាន និងអ្នកនិពន្ធ។ វាស្រដៀងទៅនឹង Tumblr ប៉ុន្តែមុខងារចែកចាយទៅកាន់អ្នកដទៃ គឺមិនទទួលបានការចាប់អារម្មណ៍ច្រើននោះទេ។
អ្នកប្រើប្រាស់អាចធ្វើការបង្ហោះនូវព័ត៌មានរបស់ពួកគេតាមរយៈរូបភាពវីដេអូជាដើម។

១៨. បណ្ដាញសង្គម SoundCloud

SoundCloud ជាបណ្ដាញសង្គមលំដាប់ លេខ ១ ខាងចែកចាយសម្លេង អ្នកប្រើប្រាស់ភាគច្រើន ចូលចិត្តចែករំលែកនូវចម្រៀងដែលពួកគេបានបង្កើតដោយផ្ទាល់ខ្លួន ឫសម្លេងផ្សាយផ្សេងៗដែលពួកគេបានថតទុក។

១៩. បណ្ដាញសង្គម Tinder

Tinder ជាបណ្ដាញសង្គម ដែលចាប់គូឱ្យមនុស្សរស់នៅក្នុងតំបន់តែមួយ អាចធ្វើការណាត់ជួបគ្នាបានយ៉ាងងាយ ប៉ុន្តែវាក៏មានមុខងារពិសេសផ្សេងទៀត ដែលអាចអនុញ្ញាតឱ្យមនុស្សរស់នៅក្នុងទីតាំងផ្សេងពីគ្នា ធ្វើការភ្ជាប់ទំនាក់ទំនងកាន់តែវិសេសវិសាលជាមួយគ្នាផងដែរ។

២០. បណ្ដាញសង្គម WhatsApp

អ្នកប្រើប្រាស់ WhatsApp អាចនឹងស្គាល់ច្បាស់ពីមុខងារពិសេសៗរបស់វា រួមមាន ការផ្ញើសារជាសម្លេង រូបភាព ឯកសារផ្សេងៗ តែវាមានសុវត្ថិភាពនិងសម្ងាត់ ជាងប្រព័ន្ធដទៃ ហើយ WhatsApp គឺតម្រូវឱ្យអ្នកចុះឈ្មោះដោយប្រើប្រាស់លេខទូរស័ព្ទផ្ទាល់ខ្លួនតែម្តង។

២១. បណ្ដាញសង្គម Slack

Slack ល្អបំផុតសម្រាប់ការងារជាក្រុម ឫនៅក្នុងស្ថាប័នណាមួយ សម្រាប់ការចែករំលែកឯកសារការងារផ្សេងៗទៅកាន់សមាជិករួមតែមួយ បន្ថែមពីនោះវាក៏មានការតភ្ជាប់ជាមួយសេវាពិសេសសោតយ៉ាងដូចជា Dropbox និង Trello ជាដើម។

២២. បណ្ដាញសង្គម Musical.ly

Musical.ly ជាបណ្ដាញសង្គម សម្រាប់ចែកចាយវីដេអូខ្លីៗ ស្រដៀងទៅនឹង Instagram ដែរ ហើយវាមានមុខងារកែច្នៃវីដេអូ មុននឹងបង្ហោះចេញផ្សាយ។ អ្នកប្រើប្រាស់ក៏អាចធ្វើការបង្កើតវីដេអូរួមគ្នា ជាលក្ខណៈមនុស្ស ២ នាក់ប្រើប្រាស់សម្លេងចម្រៀង ក្នុងវីដេអូតែមួយ ដែលនេះក៏ជាមុខងារពិសេសរបស់ Musical.ly ។

២៣. បណ្ដាញសង្គម Peach

Peach ទើបតែដាក់ឱ្យប្រើប្រាស់នាដើមឆ្នាំ ២០១៦ នេះ ទាក់ទិននឹងការទទួលបានការគាំទ្រច្រើនកម្រិតណានោះ គឺយើងមិនអាចសន្មតបាននោះទេ ដោយទោះបីជា Peach មានមុខងារមួយចំនួនពិសេសៗ ក៏ពិតមែន ប៉ុន្តែវាបានដើរក្រោយគេមួយជំហានបាត់ទៅហើយ។

គុណសម្បត្តិនិងគុណវិបត្តិ iCloud លើ iPhone អ្នកត្រូវដឹងឲ្យច្បាស់ មុនសម្រេចចិត្តប្រើ

បច្ចុប្បន្នបណ្ដាយុវវ័យជាច្រើន អាចកំពុងស្ទាក់ស្ទើរចិត្តថាគួរប្រើប្រាស់ប្រព័ន្ធ iCloud នៅលើទូរសព្ទរបស់ខ្លួនឫក៏អត់។ ថ្ងៃនេះ Sabay ក៏សូមលើកយកពីចំណុចនៃអត្ថប្រយោជន៍និងគុណវិបត្តិចំនួន ៥ ធំៗដែលអ្នកប្រើប្រាស់គួរស្វែងយល់ឱ្យបានច្បាស់ ជុំវិញការប្រើប្រាស់ iCloud។

គុណសម្បត្តិ៖
- សាមញ្ញងាយស្រួលប្រើ៖ ដំណើរការនៃប្រព័ន្ធ iCloud គឺងាយបំផុត តួយ៉ាងដូចជាការរក្សាទុក (Back up) ឯកសារ ដោយអ្នកគ្រាន់តែចុចតាមវា ប៉ុន្មានជំហានគឺហើយជាការស្រេច។
- មិនតម្រូវឲ្យមានកុំព្យូទ័រនិងខ្សែតភ្ជាប់៖ សម្រាប់ចំណុចនេះ ការប្រើប្រាស់ iCloud យើងក៏អាចបញ្ជាតាមរយៈ iPhone ផ្ទាល់ ដោយពុំបាច់មានឧបករណ៍ជំនួយដទៃឡើយ។
- Free អង្គផ្ទុកទិន្នន័យ 5GB ឥតគិតថ្លៃ៖ បើអ្នកសម្រេចចិត្តធ្វើការ Back up ឯកសារទៅក្នុងប្រព័ន្ធ iCloud នោះអ្នកនឹងទទួលបានអង្គផ្ទុកទិន្នន័យ 5GB ដោយឥតគិតថ្លៃ។
- ងាយស្រួលផ្ទេរទិន្នន័យត្រលប់មកវិញ៖ មិនខុសពីចំណុចទី ១ ដោយទោះបីជាអ្នកចង់ផ្ទុកឯកសារ

- ត្រលប់មកទូរស័ព្ទវិញ (Restore) អ្នកប្រើល្មមៗ អាចចុចបាន ព្រោះវាងាយបំផុត។
ប្រើ iCloud ដោយពុំបាច់ចំណាយលុយ៖ គ្រប់មុខងារទាំងអស់ គឺបើកឲ្យប្រើប្រាស់ដោយសេរី ពុំមានតម្រូវចំណាយលុយអ្វីបន្ថែមឡើយ ដែលកត្តានេះហើយ ធ្វើឱ្យមនុស្សជាច្រើនចូលចិត្តប្រើប្រាស់វា។

គុណវិបត្តិ៖

- តម្រូវឱ្យប្រើប្រាស់ប្រព័ន្ធអ៊ីនធឺណិត៖ រាល់ពេលដែលអ្នកចង់ធ្វើការ Back Up រាល់ឯកសារពី iPhone ចូល iCloud គឺតម្រូវឱ្យអ្នកតភ្ជាប់ទៅប្រព័ន្ធ Wi-Fi ជាមុនសិន។
- បញ្ហាសុវត្ថិភាព៖ នេះជាបញ្ហាធំបំផុត ករណីបើអ្នកចែករំលែកគណនីទៅកាន់អ្នកប្រើប្រាស់ដទៃ នោះពួកគេ នឹងអាចឆែកមើលរាល់ឯកសារសម្ងាត់ទាំងអស់បាន។
- ល្បឿនផ្ទេរទិន្នន័យយឺត: អ្នកប្រើប្រាស់ជាច្រើន បានកត់សម្គាល់ឃើញថា ករណីបើយើងផ្ទេរឯកសារកាន់តែធំ នោះល្បឿនផ្ទេរទិន្នន័យទៅក្នុង iCloud ពិតជាយឺតមែនទែន។
- អង្គផ្ទុកទិន្នន័យ 5GB: សម្រាប់អង្គផ្ទុកទិន្នន័យប៉ុននេះ អ្នកប្រើប្រាស់មួយចំនួនអាចសម្របបានតែដំបូងប៉ុណ្ណោះ ក្រោយៗមកទៀត បើអ្នកចង់បន្ថែមអង្គផ្ទុកទិន្នន័យក្នុងប្រព័ន្ធ iCloud ឲ្យបានច្រើន វាតម្រូវឱ្យអ្នក ធ្វើការចំណាយលុយ។
- មិនគាំទ្រការ Back Up គ្រប់ឯកសារទាំងអស់៖ ទាក់ទងដូចជាឯកសារវីដេអូ ចម្រៀងជាដើម បើមិនបានទិញពី iTunes Store ទេ គឺវាមិនអនុញ្ញាតឱ្យ Back Up បាននោះឡើយ៕

ភ្លេចលេខសម្ងាត់គណនី Facebook ប្តូរថ្មីវិញបានតាមវិធីនេះ

ជារឿយៗ រាល់ពេលដែលប្រិយមិត្តខ្ចីកុំព្យូទ័រ ឬទូរស័ព្ទពីគេយកមកលេង Facebook ភាគច្រើនគឺភ្លេច Log out រួចក៏ភ័យខ្លាចម្ចាស់ឧបករណ៍ទាំងនោះអាច ប្រើប្រាស់គណនីរបស់ខ្លួនបាន ទើបសម្រេចចិត្តផ្លាស់ប្តូរលេខកូដសម្ងាត់ថ្មី។ ប៉ុន្តែរាល់ពេលផ្លាស់ប្តូរ លេខកូដសម្ងាត់ច្រើនដងពេកវាក៏បណ្តាលឲ្យភ្លេច ឬភាន់ច្រឡំផងដែរ។

ហេតុដូចនេះ ប្រសិនបើប្រិយមិត្តភ្លេចលេខកូដសម្ងាត់ អាចប្តូរថ្មីវិញបាន តាមវិធីដែល Post Tech បង្ហាញខាងក្រោមនេះ៖

លក្ខខណ្ឌអនុវត្ត

បានប្រើលេខទូរស័ព្ទ ដើម្បីបង្កើតគណនី
ជាម្ចាស់អ៊ីម៉ែលផ្ទាល់ ដែលបានប្រើដើម្បីចុះឈ្មោះបង្កើតគណនី Facebook

របៀបអនុវត្ត

១ – បើកកម្មវិធីរុករក Safari ឬ Chrome រួចចូលទៅកាន់អាសយដ្ឋាន www.facebook.com/login/identify

២ – វាយបញ្ចូលអ៊ីម៉ែល ឬលេខទូរស័ព្ទដែលបានយកទៅចុះឈ្មោះបង្កើតគណនី Facebook ចូលក្នុងប្រអប់ រួចចុចប៊ូតុង Search បន្ទាប់មក ឈ្មោះគណនីរបស់លោកអ្នកនឹងបង្ហាញឡើង។
៣ – បន្ទាប់មកទៀត សូមចុចលើពាក្យ This is my account ក្រោយមក លោកអ្នកនឹងឃើញជម្រើស ២៖

លេខទូរស័ព្ទ ត្រូវឆែកមើលសារក្នុងទូរស័ព្ទ ដែល Facebook នឹងមកជាមួយលេខកូដសម្រាប់ផ្លាស់ប្តូរ Password
អ៊ីម៉ែល សូមចូលទៅឆែកមើលសារនៅក្នុងអ៊ីម៉ែល ដែល Facebook នឹងធ្វើការផ្ញើជូន ក្នុងរយ:ពេលដ៏ខ្លី

៤ – ជ្រើសយកជម្រើសណាមួយក៏បាន រួចចុចលើពាក្យ Continue
៥ – ភ្លាមនោះ លោកអ្នកនឹងតម្រូវឲ្យបញ្ចូលលេខកូដ ៦ ខ្ទង់ ក្នុងប្រអប់ Enter Security Code ដែល Facebook ទើបនឹងផ្ញើចូលនៅក្នុងអ៊ីម៉ែល ឬលេខទូរស័ព្ទរបស់លោកអ្នក
៦ – វាយបញ្ចូលលេខកូដ ៦ ខ្ទង់ ដែល Facebook ផ្ញើឲ្យ រួចចុចលើប៊ូតុង Continue

៧ – ឥឡូវនេះ លោកអ្នកអាចវាយបញ្ចូលលេខកូដសម្ងាត់ថ្មី ក្នុងប្រអប់ New Password រួចចុច Continue
៧ – ក្រោយមកលោកអ្នកមានជម្រើស ២ ទៀត

Log out of other devices ធ្វើឲ្យគណនីនេះមិនអាចបន្តប្រើប្រាស់បានទៀត លុះត្រាតែវាយបញ្ចូលលេខកូដសម្ងាត់ថ្មី នៅលើឧបករណ៍ណាដែលជាប់គណនីនេះ
Stay logged in អនុញ្ញាតឲ្យឧបករណ៍ណាដែលកំពុងប្រើគណនីនេះ អាចបន្តការប្រើប្រាស់វាបាន ដោយមិនទាមទារឲ្យវាយលេខកូដសម្ងាត់ថ្មី

៨ – ជ្រើសយកជម្រើសណាមួយ រួចលោកអ្នកអាចបន្តប្រើប្រាស់គណនីនេះបានវិញហើយ៕

ចុចអានអត្ថបទ៖ គន្លឹះការពារគណនី Facebook កុំឲ្យគេលួចប្រើបាន

អិុនធើណែត 3G/4G ស៊ីលុយទូរសព្ទលឿន សាកដំណោះស្រាយ ៩ ចំណុចនេះ (featured)

បច្ចុប្បន្ន ថ្វីត្បិតតែប្រព័ន្ធ Wi-Fi មានស្ទើរគ្រប់ទីកន្លែងក៏ពិតមែន ប៉ុន្តែ តម្រូវការប្រើប្រាស់អិុនធើណែតលើទូរសព្ទចល័ត គឺមានគ្រប់ពេល គ្រប់ទីកន្លែង ហើយអ្វីដែលអាចបំពេញវាបាន គឺមានតែប្រព័ន្ធអិុនធើណែត 3G/4G ឬ Cellular ប៉ុណ្ណោះ។ ជាទូទៅ ទំហំទិន្នន័យអិុនធើណែត 3G/4G មិនមែនឥតដែនកំណត់នោះទេ

បើទោះជាក្រុមហ៊ុនបណ្តាញទូរសព្ទចល័តដូចជា Smart ផ្តល់ជម្រើសប្តូរលុយ ១ ដុល្លារ បាន ៣០ ដុល្លារ ក៏ដោយ ក៏ជួនកាល បើលោកអ្នកប្រើភ្លេចខ្លួនតែបន្តិច នោះលុយដែលនៅសល់ក្នុងគណនីទូរសព្ទ ប្រាកដជាដាច់អស់មួយរំពេចជាមិនខាន។

ដើម្បីបញ្ជៀសបញ្ហានេះ Post Tech សូមលើកយកមកបង្ហាញជូនលោកអ្នកនូវវិធីកាត់បន្ថយការខ្ជះខ្ជាយទំហំទិន្នន័យអិុនធើណែតតាមប្រព័ន្ធ 3G/4G ឱ្យដល់កម្រិតអតិបរមា លើទូរសព្ទ iPhone ឬ iPad ដែលដំណើរការលើប្រព័ន្ធ iOS ជំនាន់ 10.3.1 ដូចតទៅ៖

១– បិទដំណើរការចាក់វីដេអូស្វ័យប្រវិត្តនៅលើកម្មវិធីបណ្តាញសង្គម

Facebook: សូមចុចលើមឺនុយ More (សញ្ញា…) -> Settings -> Account Settings -> Videos and Photos -> Video Settings -> Auto-play រួចជ្រើសរើសយក ‘On Wi-Fi Connections Only’ ឬ ‘Never Auto-plays Videos’។
Twitter: ឋិតនៅក្នុងផ្ទាំង Profile របស់លោកអ្នកក្នុងកម្មវិធីនេះ សូមចុចចូលមឺនុយ Gear (រូបសញ្ញាស្ពឺ) -> Settings -> Data -> Video Autoplay រួចជ្រើសរើស ‘Never play videos automatically’ ឬ ‘Use Wi-Fi Only’។
Instagram: ឋិតនៅក្នុងផ្ទាំង Profile របស់លោកអ្នកក្នុងកម្មវិធីនេះ សូមចុចចូលមឺនុយ Gear -> Mobile Data Use រួចចុចយកជម្រើស Use Less Data។

២– តាមដានកម្មវិធីណាស៊ីទិន្នន័យអិុនធើណែតច្រើន

ដើម្បីធ្វើដូចនេះ លោកអ្នកគ្រាន់តែចូលទៅកាន់កម្មវិធី Settings -> Cellular រួចចូលទៅកាន់ All Apps។ នៅក្នុងនេះ វានឹងបង្ហាញពីទំហំទិន្នន័យអិុនធើណែតដែលកម្មវិធីនីមួយៗបានស៊ី។ ដូច្នេះ ប្រសិនបើអាច សូមចុចកុងតាក់បិទលើកម្មវិធីណាដែលស៊ីទំហំអស់ច្រើន។

៣– បិទមុខងារ Cellular Data ក្នុង iCloud

ប្រសិនបើលោកអ្នកប្រើ iCloud សម្រាប់ការទាញយកឯកសារ និងទិន្នន័យពីកម្មវិធីផ្សេងៗទុក លោកអ្នកគួរតែឆែកមើលថាតើ មុខងារ ‘Use Cellular Data’ ក្នុងកម្មវិធី Settings ផ្នែក iCloud Drive កំពុងបើក ឬក៏បិទ។ បើវាកំពុងបើក សូមចុចកុងតាក់បិទវាចោលទៅ!

៤– បិទមុខងារទាញយកដោយស្វ័យប្រវត្តិ

សូមចូលទៅកាន់កម្មវិធី Settings -> iTunes and App Store រួចចុចបិទលើមុខងារ Use Cellular Data។ បន្ទាប់ពីចុចបិទរួច កម្មវិធីនានានៅក្នុងទូរសព្ទរបស់លោកអ្នកនឹងមិនធ្វើបច្ចុប្បន្នភាព (Update) ដោយស្វ័យប្រវត្តិដែលនាំឱ្យស៊ីទិន្នន័យអិុនធើណែតអស់ច្រើនទៀតនោះទេ។

៥– បិទមុខងារ Wi-Fi Assistant

មុខងារនេះ ត្រូវបានបង្កើតឡើងដើម្បីជួយបំពេញការតភ្ជាប់អិុនធើណែតពីប្រព័ន្ធ 3G/4G នៅពេលការតភ្ជាប់អិុនធើណែតតាមប្រព័ន្ធ Wi-Fi រអាក់រអួល។ ដូច្នេះ វាអាចនឹងទាញយកទំហំទិន្នន័យអិុនធើណែតតាមប្រព័ន្ធ 3G/4G ដោយលោកអ្នកមិនដឹង។ ដើម្បីបិទវា សូមចូលទៅកាន់កម្មវិធី Settings -> Cellular រួចចុចកុងតាក់បិទលើមុខងារ Wi-Fi Assist ជាការស្រេច។

៦– បិទមុខងារ Background App Refresh

សូមចូលទៅកាន់កម្មវិធី Settings -> General -> Background App Refresh ហើយចុចកុងតាក់បិទលើឈ្មោះកម្មវិធី Facebook, Instagram, Twitter,…។ ធ្វើដូច្នេះ វាក៏ជួយសន្សំសំចៃថាមពលថ្មរបស់ទូរសព្ទផងដែរ។

៧– កុំប្រើមុខងារ Cellular Data សម្រាប់ Apple Music

ប្រសិនបើលោកអ្នកប្រើកម្មវិធី Apple Music នោះ បទចម្រៀងបញ្ជូនមកឱ្យលោកអ្នកស្តាប់ អាចនឹងប្រើប្រាស់ទិន្នន័យ Cellular ក្នុងទំហំដ៏ធំ។ បើដូច្នេះមែន លោកអ្នកគួរតែចូលទៅបិទវាតាមកម្មវិធី Settings -> Music -> Cellular Data រួចចុចកុងតាក់បិទវា។

៨– ប្រើកម្មវិធី Chrome និងបើកមុខងារ Reduce Data របស់វា

លោកអ្នកអាចនឹងសន្សំសំចៃទិន្នន័យអិុនធើណែតបានពី ៥ ទៅ ១៣ មេហ្គាបៃយ៍ ក្នុងមួយគេហទំព័រ ប្រសិនបើខ្លួនចូលចិត្តស្រាវជ្រាវព័ត៌មានតាមកម្មវិធី Browser។ ព្រោះ Chrome មានភ្ជាប់មកជាមួយមុខងារកាត់បន្ថយការទាញយកទិន្នន័យពីប្រព័ន្ធអិុនធើណែតតាមម៉ាស៊ីនមេរបស់ Google។ ដើម្បីធ្វើដូចនេះ លោកអ្នកគ្រាន់តែចូលទៅកាន់មឺនុយ Settings -> Bandwidth របស់កម្មវិធី រួចបើកមុខងារ Reduce Data Usage ជាការស្រេច។

៩– បិទប្រព័ន្ធ Cellular នៅពេលឈប់ប្រើ

វាជាវិធីសាមញ្ញបំផុត ប៉ុន្តែ លោកអ្នកប្រហែលជាមើលរំលង ខណ:ដែលវាគឺជាមធ្យោបាយល្អបំផុតក្នុងការសន្សំសំចៃទំហំទិន្នន័យអិុនធើណែត បន្ថែមពីលើថាមពលថ្ម។ ព្រោះនៅពេលដែលវាត្រូវបានបើកចោល កម្មវិធីមួយចំនួនអាចនឹងធ្វើបច្ចុប្បន្នភាពទិន្នន័យរបស់វាដោយស្វ័យប្រវត្តិ ដែលនាំឱ្យខ្ជះខ្ជាយទំហំទិន្នន័យអិុនធើណែតរបស់ទូរសព្ទ។ ដើម្បីបិទវា លោកអ្នកគ្រាន់តែចូលទៅកាន់កម្មវិធី Settings -> Cellular រួចចុចកុងតាក់បិទជាការស្រេច៕

គន្លឹះយ៉ាងងាយស្រួលដើម្បីផ្ទេរ/បញ្ចូល (Transfer) ទិន្នន័យទាំងអស់ពី iPhone ចាស់របស់អ្នកមកក្នុង iPhone 7 (featured)

តើមានវិធីអ្វីដែលងាយស្រួលបំផុត និងល្អបំផុតសម្រាប់ការផ្ទេរទិន្នន័យពី iPhone ស៊េរីចាស់ មក iPhone 7 ថ្មីរបស់អ្នក? ខាងក្រោមនេះ គឺជាវិធីសាស្ត្រ គឺមាន ២វិធី គឺ (១)-ប្រើ iTunes (២)-ប្រើ iCloud។

១) របៀបផ្ទេរទិន្នន័យពី iPhone ស៊េរីចាស់មក iPhone 7 ដោយប្រើ iTunes

-ត្រូវប្រាកដថា អ្នកកំពុងដំណើរការកម្មវិធី iTunes ជំនាន់ចុងក្រោយបង្អស់

-ដោត iPhone ស៊េរីចាស់ មានទិន្នន័យដែលអ្នកចង់ផ្ទេរ ជាមួយកុំព្យូទ័រ Mac ឬ Windows PC

-បើកកម្មវិធី iTunes

-ចុចលើរូបតាង (icon) ទូរស័ព្ទ iPhone ស្ថិតនៅលើរបារម៉ឺនុយ

-ចុចលើ Back Up Now

-ចុចលើ Encrypt Backup និងបញ្ចូល Password

-ចុចរំលង (skip) លើ Backup Apps ប្រសិនកម្មវិធីសួរ។ (ព្រោះអ្នកក៏អាចទាញយកពី App Store មកវិញងាយស្រួល)

-ដកខ្សែភ្ជាប់ចេញពីទូរស័ព្ទ iPhone ចាស់នោះ នៅពេលរួចរាល់

-បិទ iPhone ចាស់

-ដកស៊ីមកាតចេញពី iPhone ចាស់

ចំណាំ៖ ត្រូវរង់ចាំដល់ការ backup ចង់សព្វគ្រប់មុនពេលអនុវត្តជំហានទាំងពីរចុងក្រោយខាងលើ។

-បន្ទាប់មកយកស៊ីមកាតទៅដោតចូល iPhone 7

-បើក (Turn On) iPhone 7

-ដោតខ្សែ ភ្ជាប់ទៅកាន់ Mac ឬ Windows PC

-ចុច Slde to set up នៅលើ iPhone

-ធ្វើតាមការណែនាំ ដោយជ្រើសរើសយកភាសា ហើយកំណត់ set up បណ្ដាញ Wi-Fi

-ចុច Restore from iTunes backup

-កម្មវិធី iTunes នៅលើ Mac ឬ Windows PC សូមចុចយក Restore from this backup

-ជ្រើសរើស recent backup ពីបញ្ជី list

-បញ្ចូល password ដែលអ្នកបានដាក់ នៅដំណាក់កាល backup

បញ្ជាក់៖ ល្បឿន backup និង restore យូរ ឬឆាប់ គឺអាស្រ័យលើទំហំទិន្នន័យដែលអ្នកចង់ backup និង restore។ iPhone អាចនឹងឡើងកម្ដៅខ្លាំងបន្តិចនៅដំណាក់កាល Backup និង Restore។

២) របៀបផ្ទេរទិន្នន័យរបស់អ្នកចូលទៅ iPhone 7 ដោយប្រើ iCloud

ប្រសិនអ្នកប្រើសេវាកម្មអនឡាញ របស់ Apple គឺ iCloud នោះអ្នកនឹងងាយស្រួល backup ទិន្នន័យសំខាន់ៗទុក។ សេវាកម្ម iCloud អាចឱ្យអ្នកផ្ទេរទិន្នន័យទាំងអស់របស់អ្នក ដោយមិនចាំបាច់ប្រើខ្សែ។ ដើម្បី backup និង restore តាម iTunes សូមអនុវត្តដូចខាងក្រោម៖

-អនុវត្តនៅលើ iPhone ចាស់ដែលអ្នកចង់យកទិន្នន័យចូលទៅ iPhone 7

-ត្រូវប្រាកដថា iPhone របស់អ្នក ឬ iPad បានភ្ជាប់ Wi-Fi រួចហើយ (ប្រសិន iPhone/iPad ជិតអស់ថ្ម សូមដោតសាកថ្មជាប់)

-បើកចូលទៅ Settings របស់ iPhone/iPad

-ចុចលើ iCloud

-ចុចលើ Backup

-ចុចលើ Back Up Now

-នៅពេល backup រួចរាល់ សូមបិទ iPhone ចាស់នោះ

-ដកស៊ីមកាតចេញពី iPhone ចាស់

បញ្ជាក់៖ មុននឹងអនុវត្តជំហានចុងក្រោយទាំងពីរខាងលើ ត្រូវរង់ចាំឱ្យដំណើរការ Backup ចប់សព្វគ្រប់ជាមុនសិន។

-ដោតស៊ីមកាតចូលទៅ iPhone 7

-បើក (turn on) iPhone 7

-ចុច slide ដើម្បីកំណត់ set up (slide to set up)

-អនុវត្តតាមការណែនាំជាលំដាប់ ដោយការជ្រើសរើសភាសា និងភ្ជាប់ Wi-Fi

-ចុចលើ Restore from iCloud backup

-Sign ចូលទៅគណនី iCloud account (ឬ Apple ID របស់អ្នក)

-ចុចលើ Next

-ចុច Agree ទៅលើឃ្លា Terms and Conditions និងចុច Confirm

-ជ្រើសរើសយក recent backup ពីបញ្ជី list

-បញ្ចូល Password នៃគណនី iCloud នៅពេលលោតផ្ទាំងសួររក ជាការស្រេច។

កម្មវិធី (app) ច្រៀងខារ៉ាអូខេល្អបំផុតចំនួន ៤ សម្រាប់ iPhone និងទូរស័ព្ទ Android

ជាការបន្ថែមបទពិសោធន៍ថ្មីដល់ការកម្សាន្តនៅលើស្មាតហ្វូន ទំព័រនេះយើងសូមណែនាំប្រិយមិត្តអំពីកម្មវិធីច្រៀងខារ៉ាអូខេល្អជាងគេចំនួន ៤ សម្រាប់ប្រើនៅលើស្មាតហ្វុន Android ក៏ដូចជា iPhone បានយ៉ាងពិសេស។

១) Sing! Karaoke by Smule

កម្មវិធីច្រៀងខារ៉ាអូខេនៅលើស្មាតហ្វូននេះ អាចដំណើរការបានទាំងនៅលើប្រព័ន្ធប្រតិបត្តិការ Android និង iOS។ Sing! Karaoke by Smule ផ្ដល់ភាពសប្បាយរីករាយដល់អ្នកប្រើ ដោយសារបានភ្ជាប់មកជាមួយមុខងារអាចច្រៀងចម្រៀងខារ៉ាអូខេបាន។

ទាញយក សម្រាប់ Android | iOS

២) Yokee

មានលក្ខណៈពិសេសដោយវាត្រូវបានច្របាច់បញ្ចូលជាមួយវីដេអូ YouTube អាចឱ្យអ្នកបើករកមើលចម្រៀងខារ៉ាអូខេច្រើនលើសលុបនៅលើ YouTube បានងាយស្រួល។ កម្មវិធីនេះ អ្នកអាចទាញយកមកប្រើបានដោយឥតគិតថ្លៃ។ Yokee អាចឱ្យអ្នកស្វែងរកពិន្ទុ ដើម្បីដោះ (unlock) ចម្រៀងដែលអ្នកចូលចិត្ត ដោយមិនចាំបាច់ចំណាយប្រាក់ក៏បាន។

ទាញយកសម្រាប់ Android | iOS

៣) Red Karaoke

ដូចជាកម្មវិធី Yokee ដែរ ដោយ Red Karaoke មានវីដេអូយកចេញពី YouTube ហើយនិងប្រភេទចម្រៀងបានពីប្រភពដទៃ ដូច្នេះអ្នកប្រភពចម្រៀងខារ៉ាអូខេកាន់តែសំបូរបែប។

ទាញយក សម្រាប់ Android | iOS

៤) StarMaker

កម្មវិធី StarMaker អាចឱ្យអ្នកថតបទចម្រៀងដែលអ្នកច្រៀង ព្រមទាំងរូបអ្នកដែលថតដោយកាមេរ៉ាទូរស័ព្ទខាងមុខបាន។ ដូច្នេះអ្នកនឹងអាចបើកមើលពីការសម្ដែង និងច្រៀងរបស់អ្នកចាស់ៗបានងាយស្រួល។

ទាញយក សម្រាប់ Android | iOS

គន្លឹះខ្លីៗ ងាយស្រួលអនុវត្ត ដើម្បីសន្សំសំចៃទំហំ Memory លើទូរស័ព្ទ iPhone យ៉ាងមានប្រសិទ្ធភាព (Video)

ប្រសិនលោកអ្នកកំពុងប្រើប្រាស់ទូរស័ព្ទ iPhone ហើយជិតអស់មេម៉ូរី (Memory) សម្រាប់ផ្ទុកទិន្នន័យតទៅទៀតនោះ អ្នកអាចអនុវត្តតាមជំហានដ៏មានប្រសិទ្ធភាពខាងក្រោមនេះបាន។ គន្លឹះខាងក្រោមនេះ នឹងជួយអ្នកសន្សំសំចៃទំហំទំនេរ (free space) បានមួយកម្រិត។ មិនមានអ្វីពិសេស ឬអាថ៌កំបាំងអីនោះទេ គេគ្រាន់តែអនុវត្តរបៀបដ៏សាមញ្ញដោយគ្រាន់តែលុបចោលនូវឯកសារមិនសំខាន់ៗ ដើម្បីសន្សំសំចៃមេម៉ូរីប៉ុណ្ណោះដូចគន្លឹះខាងក្រោមប៉ុណ្ណោះ។

-ឆែកមើលថាតើ iPhone សល់មេម៉ូរីទំហំប៉ុន្មានទៀត គឺត្រូវចូលទៅ Settings → General → Usage → Manage Storage។ នៅត្រង់នេះ អ្នកអាចប្រាកដថា តើមានកម្មវិធីណាខ្លះ ដែលអ្នកមិនចាំបាច់ ឬមិនដែលប្រើ រួចលុបចោល ដើម្បីសន្សំសំចៃទំហំ (space) របស់អង្គចងចាំបានមួយផ្នែក។ ឬអ្នកអាចលុបកម្មវិធីម្ដង១ ពីម៉ឺនុយ Home ក៏បាន។

-ប្រសិនលោកអ្នកប្រើសេវាកម្ម Podcasts សូមចូលទៅលុបទិន្នន័យ Podcasts និង Music នៅក្នុង Settings → General → Usage → Manage Storage រួចលុបឯកសារដែលពាក់ព័ន្ធ (ដូចក្នុងវីដេអូ)។

-លុប TV Shows និង Movies នៅក្នុងកម្មវិធី Videos (ចំពោះលោកអ្នកដែលប្រើសេវាកម្មភ្ជាប់ទៅកាន់ Store

-លុបរូបថត (Photo) និងវីដេអូ (Video) ដែលមិនត្រូវការទុក ឬរូបថតខូចៗ (ថតមិនស្អាត) ចោល។ រួចហើយបន្តលុបនៅផ្នែក Recently Deleted ទាំងរូបថត និងវីដេអូ (ដួចរូប)។

-បិទ (disable) Photo Stream និង Duplicate HDR Image ដោយចូលទៅ Settings → Photo & Camera រួចបិទ (disable) នៅត្រង់ My photo stream និង Keep Normal Photo (ដូចវីដេអូ)។

-លុបសារ (Message) ដែលលែងចាំបាច់ទុក ក៏ដូចជាប្រភេទសារ threads។

-បើក (enable) លើ Message Expiration ដោយចូលទៅ Settings → Messages → Keep Messages ត្រង់នេះសូមរើសយក ៣០ថ្ងៃ (30 days) ចំណែកនៅក្នុងផ្នែក Expire កំណត់យកបន្ទាប់ពី ២នាទី (After 2 Minutes)

បណ្ដុំវិបសាយដោនឡូតវីដេអូពី Facebook សម្រាប់កុំព្យូទ័របាន HD កប់ស៊េរី (featured)

ឆ្លើយតបទៅនឹងសំណួរប្រិយមិត្តដែលចង់បានរបៀបដោនឡូតវីដេអូពី Facebook ងាយៗលើទូរសព្ទដៃទាំងពពួក Android និង iPhone ក្រុមការងារបានបង្ហាញជូនរួចមកហើយ ដោយឡែកនៅលើកុំព្យូទ័រក៏មានរបៀបដោនឡូតផ្សេងៗគ្នាដែរ។ តោះ! ទៅសាកល្បងទាំងអស់គ្នា!

ជម្រើសទី១៖ en.savefrom.net (អនុវត្តតាម Chrome)

វិបសាយ en.savefrom.net នេះក្រុមការងារបានណែនាំម្ដងរួចហើយ ប៉ុន្តែពេលនេះលើកយកមកម្ដងទៀត ព្រោះវាល្អងាយប្រើ អាចដោនឡូតបានទាំងអស់រួមទាំង URL Youtube, Facebook ក្នុងពេលតែមួយ ហើយថែមទាំងគ្មានសារពាណិជ្ជកម្មលោតរញ៉ែរញ៉ៃ ចំណែកវីធីដោនឡូតប្រិយមិត្តអាចអនុវត្តតាមរូប។

ជម្រើសទី២៖ getfbstuff.com

វិបសាយ getfbstuff.com ក៏ជាវិបសាយពេញនិយមមួយដែរសម្រាប់ការដោនឡូតវីដេអូពី Youtube និង Facebook ងាយៗ ចំណាយពេលតិច ដោនឡូតបាន HD ហើយវា Support គ្រប់ Browser ទាំងអស់ ចំណែកវីធីដោនឡូតប្រិយមិត្តអាចអនុវត្តតាមរូប។

ជម្រើសទី៣៖ fbdown.net

វិបសាយ fbdown.net ជាវិបសាយពេញនិយមមួយដែរសម្រាប់ការដោនឡូតវីដេអូពី Youtube និង Facebook ងាយៗ ដោនឡូតបាន HD ហើយវា Support គ្រប់ Browser ទាំងអស់ជាពិសេស Safari លើ iPhone ចំណែកវីធីដោនឡូតប្រិយមិត្តអាចអនុវត្តតាមរូប។

ជម្រើសទី៤៖ downvids.net

វិបសាយ downvids.net មិនសូវជាពេញនិយមប៉ុន្មានទេ ព្រោះវាមាន Interface មិនសូវទាក់ទាញ តែយ៉ាងណាមុខងារពិសេសរបស់វាក៏មិនចាញ់វិបសាយទាំងបីខាងលើដែរ អាចដោនឡូតវីដេអូបាន HD ទាំង Youtube និង Facebook ចំណែកវីធីដោនឡូតប្រិយមិត្តអាចអនុវត្តតាមរូប។

ជម្រើសទី៥៖ downloadvideosfrom.com

វិបសាយ downloadvideosfrom.com ចុងក្រោយនេះ សម្រាប់ក្រុមការងារ Sabay សូម Rate ឲ្យផ្កាយ ៥ ព្រោះវាល្អ មានមុខងារច្រើន និងដោនឡូតលីងពីវិបសាយណាមួយក៏បានដែរ តាមចិត្តចង់ បានវីដេអូ HD ហើយចំណាយពេលតិចបំផុត តោះ! នៅចាំអីទៀត។

ប្រសិនបើប្រិយមិត្តមានវិបសាយផ្សេងពីនេះហើយងាយស្រួលដោនឡូត អាចចែករំលែកនៅខាងក្រោមនេះបាន៕

ប្រើ iPhone កាន់តែស្រួល តម្លើងកម្មវិធីតែមួយ អាចបញ្ជាបានទាំងអស់

AirLauch ជាកម្មវិធីមួយនៅលើ App Store ដែលអ្នកប្រើ iPhone ភាគច្រើនចូលចិត្តបំផុត។ វាមានចំណុចពិសេសច្រើនគួរឲ្យចាប់អារម្មណ៍ ផ្ដល់ភាពងាយស្រួលក្នុងការប្រើ iPhone ប្រចាំថ្ងៃ។

របៀបប្រើកម្មវិធី AirLauch

Launcher ដ៏ឡូយនេះអាចកំណត់កម្មវិធីពេញនិយមនៅលើអេក្រង់តែម្ដង (Notifications) មិនចាំបាច់ចំណាយពេលយូរក្នុងការចុចអូសទៅអូសមក ហើយថែមទាំងមិនចាំបាច់ Jailbreak ទូរសព្ទទៀតផង។
AirLauch អាចអនុញ្ញាតិឲ្យប្រិយមិត្តកំណត់នូវកម្មវិធីដែលពិបាកចុចចូលទៅ Setting ដូចជា Cellular និងមុខងារក្នុង Setting ផ្សេងទៀតហើយអាចដោនឡូតយកពី App Store បានដោយឥតគិតថ្លៃ៕

ចុចដោនឡូត នៅទីនេះ App Store

កម្មវិធី AirLauch

កម្មវិធីសម្រាប់ Copy ចម្រៀងចេញចូលទូរស័ព្ទ iPhone (featured)

អត្ថបទនេះ ក៏អាចជាគន្លឹះផ្ដល់អត្ថប្រយោជន៍សម្រាប់ប្រិយមិត្តដែលចង់ស្វែងរកកម្មវិធីល្អៗ សម្រាប់ចម្លង (copy) ឯកសារពីទូរស័ព្ទ iPhone ចេញទៅកុំព្យូទ័រផងដែរ។ តាមធម្មតា បន្ទាប់ពីអ្នកប្រើ iPhone/iPad ឬ iPod យូរៗទៅ នឹងនាំឱ្យឧបករណ៍របស់អ្នកពេញទៅដោយឯកសារ ពិសេសគឺ រូបថត និងវីដេអូតែម្ដង ដែលជាហេតុនាំឱ្យពេញមេម៉ូរី។ ពេលទូរស័ព្ទពេញមេម៉ូរី នោះវានឹងធ្វើឱ្យដំណើរការយឺត និងមិនអាចបន្តថតរូប ឬវីដេអូ ក៏ដូចជាបញ្ចូលកម្មវិធីបានទៀតឡើយ។ ទំព័រនេះ BizKhmer សូមបង្ហាញកម្មវិធីដែលជា tool ចំនួន៥ ក្នុងការផ្ទេរឯកសារយ៉ាងងាយស្រួលពី iPhone មកកុំព្យូទ័រ ហើយ iPad និង iPod ក៏បានដូចគ្នា។

១) iMazing

មានមុខងារ ផ្ទេរនូវរាល់ឯកសារទាំងឡាយពី iPhone របស់អ្នកចូលទៅកុំព្យូទ័រ បានយ៉ាងងាយស្រួល ព្រោះកម្មវិធីនេះ ផ្ដល់លក្ខណៈក្នុងការប្រើប្រាស់យ៉ាងសាមញ្ញ។ iMazing ងាយស្រួលចម្លង (copy) ឯកសាររូបថត និងថតឯកសារ (folder) តាម file browser។ វានឹងមិនពិបាក ក្នុងការចម្លងយកឯកសារចេញពី iPhone ដូចកម្មវិធី iTunes នោះទេ។ ជាមួយ iMazing អ្នកអាចភ្ជាប់ស្គាល់ទូរស័ព្ទរបស់ខ្លួន នៅលើកុំព្យូទ័រផ្សេងៗណាក៏បាន ទាំង Mac ឬ PC។ iMazing អាចឱ្យគេ share និង transfer ឯកសារ ឬមេឌា រវាងឧបករណ៍ iOS និងកុំព្យូទ័រ។

ទាញយកកម្មវិធី iMazing សម្រាប់កុំព្យូទ័រ Windows

២) Fonepaw

ប្រសិនអ្នកកំពុងស្វែងរកកម្មវិធីមានមុខងារដូច iTunes និងមុខងារច្រើនជាងនេះ នោះកម្មវិធី Fonepaw គឺស័ក្ដិសម។ Fonepaw អាចគ្រប់គ្រងឯកសារតន្ត្រី ហើយផ្ដល់នូវជម្រើសក្នុងការជ្រើសរើសបទចម្រៀង ដើម្បីផ្លាស់ទី និងបង្កើត playlists រវាងឧបករណ៍ iOS និង PC ដោយគ្មានដែនកំណត់។ គ្រាន់តែចុចប៊ូតុង sync all ឬ ជ្រើសបទចម្រៀង podcasts, iTunes U, audio book និងជាច្រើនទៀតរវាងឧបករណ៍ iOS និង PC។ អ្វីដែលអ្នកប្រើត្រូវធ្វើដំបូង គឺ ត្រូវភ្ជាប់ iDevice ទៅនឹងកុំព្យូទ័រ រួចចាប់ផ្ដើមផ្ទេរឯកសារដូចជា videos, podcasts, movies និង ជាច្រើនទៀតពី iOS Device ទៅក្នុងកុំព្យូទ័រ ឬពីកុំព្យូទ័រទៅទូរស័ព្ទ។

ទាញយកកម្មវិធី Fonepaw សម្រាប់កុំព្យូទ័រ Windows និង Mac

៣)

កម្មវិធី Syncios ផ្ដល់ភាពងាយស្រួលក្នុងការភ្ជាប់ជាមួយឧបករណ៍ iOS ទៅកាន់កុំព្យូទ័រ ហើយថែមទាំងគាំទ្រប្រភេទ iOS Device បានច្រើនស៊េរី គាំទ្រភាសាបានច្រើន ស្គាល់ប្រភេទ file ផ្សេងៗបានច្រើន។ ភាសាដែល Syncios គាំទ្ររួមមាន បារាំង អាល្លឺម៉ង់ ព័រទុយហ្គាល់ អ៊ីតាលី និងជាច្រើនទៀត។ មុខងារផ្សេងៗរបស់ tool នេះ គឺបានភ្ជាប់មកស្រាប់ៗ ដូចជា មុខងារបម្លែងប្រភេទវីដេអូ និងសំឡេង (audio & video converter) ដែលជួយឱ្យទូរស័ព្ទស្គាល់ប្រភេទតន្ត្រីបានច្រើន។

ទាញយកកម្មវិធី Syncios សម្រាប់កុំព្យូទ័រ Windows

៤) iExplorer

iExplorer អាចឱ្យអ្នកផ្ទេរឯកសារតន្ត្រីពីឧបករណ៍ iOS ទៅកុំព្យូទ័រ និង iTunes។ វាអាចឱ្យអ្នកចម្លង (copy) ចម្រៀងបានតាមចិត្តចង់ ទៅក្នុង iTunes។ មុខងារពិសេសលើ iExplorer គឺអាចឱ្យអ្នកប្រើ iPhone/iPod/iPod របស់អ្នកធ្វើដូចជា USB Flash drive អីចឹង។ អ្នកអាចកូពី (copy) ឯកសារចេញចូលបានតាមចិត្តបាន។

ទាញយកកម្មវិធី iExplorer សម្រាប់កុំព្យូទ័រ Windows

៥) iMobile AnyTrans

iMobile ជា tool ពិសេសមួយ ផ្ដល់ភាពងាយស្រួលក្នុងការផ្ទេរឯកសារចេញចូលរវាងឧបករណ៍ iOS និងកុំព្យូទ័រតាមវិធីដ៏សាមញ្ញ ងាយស្រួលប្រើ។ វាគាំទ្រមាតិកា iOS ជាច្រើនដូចជា Photo, Videos, Music និង Text Message, Movies, Notes, Safari និងជាច្រើនទៀត។ គ្រាន់តែចុចប៉ុន្មានដង គេនឹងអាចផ្ទេរឯកសារចេញពី iPhone ដោយផ្ទាល់។ Tool នេះមានលក្ខណៈ ពិសេស និងគាំទ្រការប្រើបានច្រើនបែប។

ទាញយកកម្មវិធី iMobile AnyTrans សម្រាប់កុំព្យូទ័រ Windows

៦) Apowersoft

មិនដូចជា tool ផ្សេងៗឡើយ កម្មវិធី Apowersoft នេះគឺមានលក្ខណៈហ្វ្រី និងពុំមានការលាក់នូវជម្រើសប្រើប្រាស់ឡើយ។ មុខងារគួរកត់សម្គាល់ជាងគេនៅលើ tool នេះគឺអាចឱ្យគេធ្វើការ backup ទិន្នន័យ និងមាតិកាផ្សេងៗរបស់ឧបករណ៍ iDevice បាន។ គេអាចប្រើវា សម្រាប់ផ្ទេរឯកសារដូចជា iBooks, Photos, Voice Memo, iTunes, podcasts ឬឯកសារផ្សេងៗទៀតដោយចុចលើប៊ូតុង Export។ កម្មវិធី Apowersoft ក៏មានមុខងារ import មាតិកាតន្ត្រីចូលទៅក្នុង iOS device របស់អ្នកផងដែរ ដូចជា គ្រប់គ្រងឯកសារមេឌារបស់អ្នក គ្រប់គ្រងព័ត៌មានផ្ទាល់ខ្លួន (personal information), calendar និង note និងគ្រប់គ្រងរាល់កម្មវិធី (app) ទាំងឡាយ ទាំងការ installing, unstalling និងការ update៕

ទាញយកកម្មវិធី Apowersoft សម្រាប់កុំព្យូទ័រ Windows

Khmer Techno Innovation

Friday, April 28, 2017

ផលិតផលនិងសេវាកម្មដ៏ពេញនិយមបំផុតទាំង ១៦ របស់ Google (featured)

Wednesday, April 26, 2017

Vimeo និង YouTube ខុសគ្នាយ៉ាងណា

កម្មវិធីបណ្ដាញសង្គមទាំង ២៣ ដែលសព្វថ្ងៃមនុស្សកំពុងប្រើប្រាស់!

គុណសម្បត្តិនិងគុណវិបត្តិ iCloud លើ iPhone អ្នកត្រូវដឹងឲ្យច្បាស់ មុនសម្រេចចិត្តប្រើ

Tuesday, April 25, 2017

ភ្លេចលេខសម្ងាត់គណនី Facebook ប្តូរថ្មីវិញបានតាមវិធីនេះ

Monday, April 24, 2017

អិុនធើណែត 3G/4G ស៊ីលុយទូរសព្ទលឿន សាកដំណោះស្រាយ ៩ ចំណុចនេះ (featured)

Saturday, April 22, 2017

គន្លឹះយ៉ាងងាយស្រួលដើម្បីផ្ទេរ/បញ្ចូល (Transfer) ទិន្នន័យទាំងអស់ពី iPhone ចាស់របស់អ្នកមកក្នុង iPhone 7 (featured)

Friday, April 21, 2017

កម្មវិធី (app) ច្រៀងខារ៉ាអូខេល្អបំផុតចំនួន ៤ សម្រាប់ iPhone និងទូរស័ព្ទ Android

គន្លឹះខ្លីៗ ងាយស្រួលអនុវត្ត ដើម្បីសន្សំសំចៃទំហំ Memory លើទូរស័ព្ទ iPhone យ៉ាងមានប្រសិទ្ធភាព (Video)

Thursday, April 20, 2017

បណ្ដុំវិបសាយដោនឡូតវីដេអូពី Facebook សម្រាប់កុំព្យូទ័របាន HD កប់ស៊េរី (featured)

ប្រើ iPhone កាន់តែស្រួល តម្លើងកម្មវិធីតែមួយ អាចបញ្ជាបានទាំងអស់

កម្មវិធីសម្រាប់ Copy ចម្រៀងចេញចូលទូរស័ព្ទ iPhone (featured)

Categories

Unordered List

Sample Text

Blog Archive

Pages

As a biginner of technology i m really want to know about the develope the technology in cambodia

Blogger news

Blogger templates

Popular Posts

Recent Posts

Text Widget

Ordered List

Definition List

Sample Text

Labels