គន្លឹះ​សម្រាប់​អ្នក​ទើប​ប្រើ Android Phone ដំបូង

10 March 2014 គន្លឹះ Android មតិ

ទូរសព្ទឆ្លាតវៃ (SmartPhone) បាន​ក្លាយជា​ឧបករណ៍​ពេញ​និយម​សម្រាប់​អ្នក​ប្រើប្រាស់​បច្ចុប្បន្ន ។ ការ​ផ្លាស់ប្តូរ​ពី​ទូរសព្ទ​ម៉ាក​មួយទៅ​ម៉ាក​មួយផ្សេង​អាច​​ចំណាយពេល​វេលា​មួយ​ចំនួន​ដើម្បី​ស្វែងយល់ និង​សិក្សា​ពី​របៀប​ប្រើ​ប្រាស់ ។ បើ​លោកអ្នក​ធ្លាប់​ប្រើ iPhone ហើយ​ងាក​មក​ប្រើ Android វិញ ប្រហែលជា​ពិបាក​ប្រើបន្តិច ព្រោះថា​ទាំង​រូបរាង និង​ការ​កំណត់​នានា គឺ​ខុសគ្នា​ស្ទើរ​ទាំង​ស្រុង ។ ពេល​ខ្លះ ចំណុច​តូច​មួយសោះ លោកអ្នក​ត្រូវ​ប្រើ​ទាំង​ស្រពិច​ស្រពិល រហូត​ដល់​មួយ​ថ្ងៃ​ទើប​រក​គន្លឹះ​ឃើញ​​ការប្រើ​ប្រាស់​ត្រឹម​ត្រូវ​បាន​ជាក់លាក់ជាដើម ។

បើ​លោកអ្នក​ចង់​ទិញទូរសព្ទ ឬ Tablet ប្រភេទ Android ប្រើ សូម​អាន​ពី​គន្លឹះ​ដំបូងៗ ដែល​លោកអ្នក​គួរ​ដឹង​ពេល​ចាប់​ផ្តើម​ដំបូង ។ សូម​អនុវត្តន៍ជាមួយ​សំបុកអាយធី ដូចតទៅ៖

១. តំរៀប Widgets លើអេក្រង់ Home

ការ​តំរៀប​ Widgets ជាចំណុច​សំខាន់​មួយ​សម្រាប់​ជួយ​លោកអ្នក​ដែល​ចង់​បង្ហាញ​កម្មវិធី​ណាមួយ​នៅ​ខាងមុខ ឬ​លក្ខណៈ​ពិសេស​នានា ដែល​ជួយ​ឲ្យ​លោកអ្នក​ងាយ​ស្រួល​ប្រើ Android ជាង iOS (iPhone/iPad) ។ ក្នុង Android មិន​ត្រឹម​តែ​បង្ហាញ​ជា​លក្ខណៈ​ទម្រង់​ខ្លី (Shortcut) ប៉ុណ្ណោះទេ តែ​លោកអ្នក​អាច​បង្ហាញ​ជា​ផ្ទាំង​កម្មវិធី​ធំៗ ដូចជា​កម្មវិធី Flipboard (Your Personal Magazine), ផ្ទាំង​ចាក់​ចម្រៀង និង​វីដេអូ, មើល​អាកាសធាតុ​លើ​អេក្រង់​ផ្ទាល់ ដោយ​មិន​ចាំបាច់​​ចូល​កម្មវិធី ជាដើម ។

ដើម្បី​ដំឡើង​ Widget លោកអ្នក​គ្រាន់​តែ​​ចុច​ឲ្យជាប់​លើ​អេក្រង់ Home (អាស្រ័យ​លើ​ App Launcher) នោះ​វា​នឹង​លោត​ផ្ទាំង​ឲ្យ​លោកអ្នក​បន្ថែម ឬ​ដក Widget តាមតម្រូវការ​បាន ។

២. កំណត់​ឲ្យ Update កម្មវិធី​ដោយ​ស្វ័យ​ប្រវត្តិ

ជំនួស​ឲ្យ​ការ Update ម្តង​មួយៗ លោកអ្នក​ក៏អាច​កំណត់ឲ្យ​វា Update ដោយ​ស្វ័យ​ប្រវត្តិ​បាន​ផងដែរ ។ ការ Update ឲ្យ​ទាន់​សម័យ​កាល (ជំនាន់​ចុង​ក្រោយ​) នៃ​កម្មវិធី​ក៏​អាច​ជួយ​បញ្ហា​កម្មវិធី​នានា និង​ទាក់​ទង​នឹង​ល្បឿន​ទូរសព្ទ​ទៀត​ផង ។

ដើម្បី​កំណតឲ្យកម្មវិធី​ Update ដោយ​ស្វ័យ​ប្រវត្តិ​បាន​សូម​លោកអ្នក​ចូល​ទៅកាន់កម្មវិធី Play Store ហើយ​ចុច​លើប៊ូតុង menu រួច​ចុចលើ Settings > Auto-update apps ។ លោកអ្នក​នឹង​ឃើញ​ជម្រើស​ចំនួន​បី៖

·         Do not auto-update apps: មិន​អនុញ្ញាតឲ្យ Update ដោយស្វ័យ​ប្រវត្តិឡើយ

·         Auto-update app at any time. Data charge may apply: អនុញ្ញាត​ឲ្យ Update ដោយ​ស្វ័យ​ប្រវត្តិ នៅ​ពេល​ណា​ក៏ដោយ តែ​លោកអ្នក​ប្រហែល​ចំណាយ​ Data ( មេកាបៃ – MB អ៊ីនធឺណេត) បន្ថែម​លើ​ការ Update ។

·         Auto-update apps over Wifi only: អនុញ្ញាតឲ្យ Update តែ​នៅ​ពេល​ប្រើ Wifi មានន័យថា​ពេល​ប្រើ Cellular Data ឬ 3G នឹង​មិន​ Update ដោយ​ស្វ័យ​ប្រវត្តិ​ឡើយ ។

៣. Upload រូបភាពទៅលើ​អនឡាញ – Cloud

ប្រសិន​បើ​លោកអ្នកប្រើ​ប្រាស់​ទូរសព្ទ​ជា កាមេរ៉ា អ្នកនឹង​ចង់​យក​រូបភាព​នោះ​ចេញ​មក​ប្រើ​ការណ៍ ។ ជំនួស​ឲ្យ​ការ​ដក​ចេញចូល Memory Card ឬ ដោតខ្សែ​ភ្ជាប់​កុំព្យូទ័រ​ច្រើន លោកអ្នក​អាច​ប្រើប្រាស់សេវា​រក្សាទុក​រូបភាព​នៅ​លើ Cloud ដែល​លោកអ្នក​មិន​ចាំបាច់​វិធី​សាំញាំ ដូចមុនឡើយ ។

ការ Upload រូបភាព​ចូល​ក្នុង Cloud នឹង​រក្សា​រូបភាព​របស់​អ្នក​ឲ្យមាន​សុវត្ថិភាព ទោះ​ទូរសព្ទ​លោកអ្នក​ខូច ឬ​បាត់​បង់​ក្នុង​ករណី​ណាមួយ​ក៏ដោយ ។ Dropbox អាច​ជួយ​លោកអ្នក​ ឲ្យ​រក្សាទិន្នន័យ​លើ​អនឡាញ ដោយ​ងាយស្រួល និង​ស្វ័យ​ប្រវត្តិ ។

អត្ថបទ​គួរអាន៖ អត្ថប្រយោជន៍​ក្នុងការប្រើប្រាស់ Dropbox

ក្រៅពី Dropbox លោកអ្នក​ក៏អាច​ប្រើ Google+, Flickr និង SkyDrive ក៏មាន​មុខងារ​រក្សា​ទិន្ន័យ​លោកអ្នក​លើ​អនឡាញ​បាន​ផងដែរ ។

៤. របៀប​ទទួល និង​ផ្ញើ​សារ​ពីកុំព្យូទ័រ

ការ​ប្រើប្រាស់​ទូរសព្ទ​ពិត​ជា​មាន​ប្រយោជន៍ និង​ងាយ​ស្រួល​នៅពេល​ដែល​លោកអ្នក​នៅ​តាម​ផ្លូវ ឫ​នៅ​ឆ្ងាយ​ពី​កុំព្យូទ័រ ។ ពេល​ប្រើ​ប្រាស់​កុំព្យូទ័រវិញ លោកអ្នក​ពិត​ជាចង់​ឲ្យ​អ្វី​ដែល​លោកអ្នក​ប្រើ​ក្នុងទូរសព្ទ​បន្ត​មក​ក្នុង​កុំព្យូទ័រ​ផងដែរ ។

ដើម្បីទទួល​បាន​សារ និង​អាច​បន្ត​ផ្ញើ​នៅ​ក្នុង​កុំព្យូទ័រ​ និង​ទូរសព្ទ លោកអ្នក​អាច​ប្រើ​កម្មវិធី​មួយចំនួន​ដូចជា MightyText, AirDroid, Google Voice ឬ Skype ដែល​កម្មវិធី​នីមួយៗ​មាន​មុខងារ​ពិសេស​ក្នុងការ​ Sync សារ​ដែល​លោកអ្នក​បាន​ប្រើ​ក្នុង​កុំព្យូទ័រ ឬទូរសព្ទ​ចូល​គ្នា​តែ​មួយ (លោកអ្នក​ត្រូវ​ប្រើ​គណនី​ដូចគ្នា ក្នុង​កុំព្យូទ័រ និង​ទូរសព្ទ) ។

៥. របៀប​ភ្ជាប់​អ៊ីនធឺណេត Cellcard, Smart

សម្រាប់​អ្នក​ប្រើ Android ដំបូងៗ​ពិត​ជា​មាន​ភាព​លំបាក​ក្នុងការ​ភ្ជាប់​អ៊ីនធឺណេត នៅ​ក្នុង​ទូរសព្ទ​ដៃ ឬ Tablet ។ យ៉ាងណាមិញ លោកអ្នក​ក៏អាច​ទាក់​ទង​ទៅ​កាន់​ផ្នែក​បម្រើ​សេវា​អតិថិជន​ដែល​អាច​ជួយ​លោកអ្នក​ក្នុងការភ្ជាប់​មួយ​ជំហាន​ម្តងៗ ។ ការ​ភ្ជាប់​មិនជា​ពិបាក​ណាស់ណាទេ ប្រសិន​បើ​លោកអ្នក​ចង់​អនុវត្តន៍​ជាមួយ​សំបុកអាយធី សូម​បន្ត​អាន​មក​ចំណុច​ខាងក្រោម ។

សូម​ចូល​ទៅកាន់ Settings  > More settings  > Mobile Network > Mobile Data > Access Point Name > New APN

·         ភ្ជាប់ជាមួយ Cellcard សូម​បំពេញតែ​ពីរ​ចំណុច​ខាងក្រោម ក្រៅពីនោះ សូម​រក្សា​ដូច​សភាពដើម ។ ចំណុច​សំខាន់​ជាងគេ គឺ​កំណត់​ APN ឲ្យ​ត្រូវ​តាម​ឈ្មោះ​ក្រុមហ៊ុន​កំណត់ ។

– Name: Cellcard
– APN: cellcard

·         ភ្ជាប់​ជាមួយ Smart ក៏​ស្រដៀង​គ្នា​នឹង Cellcard ដែរ​គ្រាន់​តែ​ប្តូរ​ពី cellcard មក​ជា​ smart វិញ

– Name: Smart
– APN: smart

សម្រាប់​ប្រព័ន្ធ​ទូរសព្ទ​ផ្សេង​ក៏​មិនខុសពី Cellcard និង​ Smart ប៉ុន្មានដែរ លោកអ្នក​គ្រាន់​តែ​កែ​ត្រង់ APN ពី​ឈ្មោះ​មួយ ទៅ​ឈ្មោះ​មួយ​ទៀត​តាម​ការ​កំណត់​របស់​ក្រុម​ហ៊ុន​ផ្សេង​ៗគ្នា ។

សេចក្តីសន្និដ្ឋាន

ក្រោយពី​បាន​អាន​ចប់​សព្វ​គ្រប់​ហើយ តើ​លោកអ្នក​អាច​ប្រើ​ប្រាស់ Android បាន​ប្រសើរ​ជាង​មុន​ដែរ​ឬទេ? សូម​អនុវត្តន៍​ម្តងៗ​មួយចំណុចៗ ប្រសិន​បើ​លោកអ្នក​មាន​បញ្ហា​ ឬមិនទាន់​ច្បាស់​ត្រង់​ចំណុច​ណាមួយ សូម​ដាក់មតិ​ក្នុង​ប្រអប់​មតិ​ខាងក្រោម ក្រុម​ការងារ​សំបុកអាយធី នឹង​ធ្វើ​ការ​ឆ្លើយ​តប​​ទៅលោកអ្នក​វិញ តាម​ការ​សមគួរ​ ៕