​បន្ទះ​ឈីប​​ជា​អ្វី?

អត្ថបទ​ដែល​ Sabay ចេញ​ផ្សាយ​កន្លង​ទៅ​ទាក់​ទង​នឹង​ស្មាតហ្វូន​ស៊េរី​ថ្មី​តែង​មាន​លើក​ឡើង​ពី​ប្រភេទ​បន្ទះ​ឈីប​ដែល​ជា​លក្ខណៈ​សម្បត្តិ​សំខាន់​មួយ​ ​ប៉ុន្តែ​​មិន​​ធ្លាប់​បាន​បង្ហាញ​លម្អិត​ទេ​ថា​បន្ទះ​ឈីប​នេះ​ជា​អ្វី។ ហេតុ​នេះ​ក្រុម​ការងារ​នឹង​បង្ហាញ​ឲ្យ​ច្បាស់​ពី​លក្ខណៈ​សម្បត្តិ​របស់​បន្ទះ​ឈីប​ដែល​ជា​បេះដូង​របស់​ស្មាតហ្វូន។
​​​

​
បន្ទះ​ឈីប​​ដែល​គេ​បំពាក់​​លើ​ស្មាតហ្វូន​មាន​ឈ្មោះ​ពេញ​ថា​ System-on-a-Chip ឬ​ហៅ​កាត់​ថា​ SoC។ បន្ទះ​ឈីប​នេះ​​ប្រៀប​ដូច​ជា​ Motherboard របស់​កុំព្យូទ័រ​អ៊ីចឹង​ដែរ​​ដោយ​មាន​​បំពាក់​នូវ​​វត្ថុធាតុ​ដទៃ​ទៀត​ដូច​ជា ៖

​#Central Processing Unit(CPU) ​ជា​​ផ្នែក​ដ៏​សំខាន់​មួយ​ដែល​ធ្វើ​ឲ្យ​អ្វី​គ្រប់​យ៉ាង​លើ​ស្មាតហ្វូន​អាច​ដំណើរ​ការ​ទៅ​បាន ដោយ​លើ​បន្ទះ​ឈីប​មួយ​អាច​មាន​ CPU ច្រើន​គ្រាប់​រហូត​ដល់​ ៨ គ្រាប់​ (Octa-Core)

#Memory លើ​បន្ទះឈីប​​ស្មាតហ្វូន​ក៏​មាន​ជា​មេមូរី​ដូច​ Motherboard លើ​កុំព្យូទ័រ​ដែរ ហើយ​បច្ចុប្បន្ន​ទំហំ​មេមូរី​ធំ​បំផុត​ដែល​គេ​អាច​បំពាក់​លើ​បន្ទះឈីប​ទូរសព្ទ​បាន​គឺ​ ៨ GB

#Graphic Processing Unit (GPU) ក៏​ជា​ផ្នែក​សំខាន់​មួយ​ដែរ​លើ​បន្ទះឈីប​ ដោយ​មាន​តួនាទី​​ទ្រាំទ្រ​នឹង​​ដំណើរ​ការ​ដ៏​ស្មុគស្មាញ​នៃ​ហ្គេម​ប្រភេទ 3D

​​​​​​​#Northbridge នេះ​ជា​គ្រឿង​បន្លាស់​មួយ​ដែល​ដោះស្រាយ​លើ​ការ​ទំនាក់​ទំនង​រវាង​ CPU និង​ផ្នែក​សំខាន់ៗ​ដទៃ​ទៀត​លើ​បន្ទះ​ឈីប
#Cellular Radio នៅ​លើ​បន្ទះឈីប​ខ្លះ​មាន​បង្កប់​នូវ​​គ្រឿង​បន្លាស់​នេះ​ ដែល​មាន​នាទី​គ្រប់គ្រង​លើ​ដំណើរ​ការ​សេវាទូរសព្ទ​ ដូច​ជា​ប្រព័ន្ធ​ 4G LTE ជា​ដើម

#​គ្រឿង​បន្លាស់​​ទំនាក់​ទំនង​ដទៃ​ទៀត ​នៅ​លើ​បន្ទះ​ឈីប​ក៏​អាច​មាន​គ្រឿង​បន្លាស់​ដទៃ​ទៀត​ដែល​ទទួល​ខុស​ត្រូវ​​លើ​ការ​ភ្ជាប់​ទំនាក់​ទំនង​រួម​មាន​ Wi-Fi, GPS ឬ Bluetooth ជា​ដើម

​#បូក​រួម​នឹង​គ្រឿង​បន្លាស់​ផ្សេងៗ​ទៀត​ជា​ច្រើន

គួរ​បញ្ជាក់​ថា​បច្ចុប្បន្ន​នេះ​បន្ទះ​ឈីប​ដែល​គេ​និយម​ប្រើ​លើ​ស្មាតហ្វូន​មាន​ចំនួន​ ៧ ប្រភេទ​​ក្នុង​នោះ​រួម​មាន​ Qualcomm Snapdragon, Ax របស់​ Apple, Intel Atom, Nvidia, MediaTek, HiSilicon និង Exynos។ ចង់​ដឹង​លម្អិត​ពី​បន្ទះឈីប​ទាំង​ ៧ អាច​ចុច​អាន​ត្រង់​នេះ៕

ប្រភព៖ Androidauthority ប្រែ​សម្រួល៖ សុខហេង