ការ​គណនា​រក​ទម្ងន់​សមស្រប BMI

រូបមន្ត BMI នេះ អាចគណនាបាន​យ៉ាងងាយស្រួល ដោយ​គ្រាន់​តែ​យក ទម្ងន់ចែកនឹង ការេ រកម្ពស់។

ជាឧទាហរណ៍ មនុស្សម្នាក់ មានទម្ងន់ 65 Kg កម្ពស់ 1ម៉ែត្រ65 តើការគណនា BMI ត្រូវធ្វើរបៀបណា?ដូចដែលបាន​លើកឡើងក្នុង​រូបមន្ដ វិធីងាយបំផុត​ដំបូង ត្រូវយក​កម្ពស់របស់គាត់ លើកជា ការេសិន ឬ យក 1.65 x 1.65=2.7225។

ជំហាន​បន្ទាប់គឺ យកទម្ងន់របស់គាត់មកចែក​ទៅនឹងលទ្ធផលរបស់ កម្ពស់លើកជាការេខាងលើ ពោលគឺ 65 ចែកនឹង 2.7225 = 23.875។

នោះមានន័យថា  BMI របស់បុរសម្នាក់នោះគឺ 23.875។

  តើត្រូវបកស្រាយ​លទ្ធផល តួលេខយ៉ាងដូចម្ដេច?

  1. ប្រសិនជា ការគណនា BMI ឃើញលទ្ធផលទាបជាង 18.5 នោះបានន័យថា មនុស្សនោះ មិនគ្រប់ទម្ងន់ ឬ ស្គមខ្លាំងពេក។ ដូចនេះ គួរតែព្យាយាមញ៉ាំអាហារ​បំប៉ន​បន្ថែម។

  2. ប្រសិនជា ការគណនា BMI ឃើញលទ្ធផលចន្លោះ 18.5 – 24.9 នោះ បានន័យថា អ្នកជាបុគ្គល​មានទម្ងន់ និង កម្ពស់សមាមាត្រគ្នា ពោលគឺ ជាបុគ្គលដែលមានសុខភាពល្អ។

  3. ប្រសិនជា ការគណនា BMI ឃើញលទ្ធផលចន្លោះ 25.0 – 29.9 នោះ បានន័យថា អ្នកជាបុគ្គល​ដែលលើសទម្ងន់​បន្តិចហើយ គួរព្យាយាម​តមនូវ​អាហារណា​ ដែលមានជាតិខ្លាញ់ច្រើន ឬ អាហារដែលអាច​ធ្វើបណ្ដាលឲ្យ​ធាត់ គួរបរិភោគ​បន្លែ ឬ ផ្លែឈើឲ្យបានច្រើន និងហាត់ប្រាណជាប្រចាំ។

  4. ប្រសិនជា ការគណនា BMI ឃើញលទ្ធផលលើសពី 30.0 ឡើងទៅ អ្នកជា​មនុស្ស​ដែលធាត់​ខ្លាំង​ហើយ ដូចនេះ គួរប្រយ័ត្ននូវការបរិភោគ​ចំណីអាហារ​ឲ្យបានម៉ត់ចត់ជាទីបំផុត គួរព្យាយាមរក​វិធីដើម្បី​សម្រក​ទម្ងន់​ទើបប្រសើរ ព្រោះតួលេខនេះ គឺប្រឈមមុខនឹងជម្ងឺជាច្រើន។

ដូចនេះ បុរសខាងលើដែលមាន BMI=23.875 គឺស្ថិតនៅចន្លោះ 18.5 – 24.9 នោះ បានន័យថា អ្នកជាបុគ្គល​មានទម្ងន់ និង កម្ពស់សមាមាត្រគ្នា ពោលគឺ ជាបុគ្គលដែលមានសុខភាពល្អ។ ដើម្បីឲ្យកាន់តែងាយស្រួល សម្រាប់ការគណនា BMI ឬ ចង់ដឹងថា ខ្លួងឯងធាត់ សូមគណនាតាម​តារាងខាងក្រោម។