កំពូល​កម្មវិធី​កម្ចាត់​មេរោគ​​ទាំង ១០ លើកុំព្យូទ័រ

គ្មាន​ប្រព័ន្ធ​កុំព្យូទ័រ​ណា ដែល​អាច​ទប់ស្កាត់​ពី​ការ​ចម្លង​មេរោគ​បាន ១០០ ភាគរយ​នោះ​ទេ លុះ​ត្រា​តែ​មាន​កម្មវិធី​កម្ចាត់​មេរោគ​ជា​ជំនួយការ។ ​ថ្ងៃ​នេះមក​ស្គាល់​កំពូល​កម្មវិធី​កម្ចាត់​មេរោគ​ទាំង ១០ ដែល​កំពុង​ពេញ​និយម​មាន​គេ​ប្រើ​ច្រើន​បំផុត​ក្នុង​ពិភពលោក។

១.Symantec: (អាមេរិក)

Symantec ជា​កម្មវិធី​កម្ចាត់​មេរោគ​ដ៏​ល្បីល្បាញ​បង្កើត​ឡើង​ដោយ​ក្រុមហ៊ុន​របស់​សហរដ្ឋអាមេរិក។ ក្រោយ​ការ​បង្កើត​ឡើង​ជាង ២០ ឆ្នាំ កម្មវិធី​នេះ​ផ្តល់​ជូន​អ្នក​ប្រើប្រាស់​នូវ​ដំណោះស្រាយ​កិច្ច​ការពារ​ប្រព័ន្ធ​សន្តិសុខ​តាម​អ៊ីនធឺណិត​ សម្រាប់​កុំព្យូទ័រ​ Windows។
បច្ចុប្បន្ន​អាច​គាំទ្រ​បាន​ទាំង​នៅ​លើ Windows 8 ហើយ​មុខងារ​ពិសេស​គឺ​កម្ចាត់​មេរោគ​ដែល​លាក់​ទុក។

២.Kaspersky: (រុស្សី)

បង្កើត​ឡើង​ដោយ​ក្រុមហ៊ុន Kaspersky Lab ស្ថិត​ក្នុង​ទីក្រុង​ម៉ូស្កូ ប្រទេស​រុស្សី។ ភាគ​ច្រើន​គេ​ប្រើ​កម្មវិធី​មួយ​នេះ សម្រាប់​ការ​ទប់ស្កាត់​ការពារ​នៃ​មេរោគ​ចម្លង​ចេញ​ពី​ប្រព័ន្ធ​ Online ​នៃ​ធនាគារ និង​ផ្សារ​អីវ៉ាន់ Online។

៣.Microsoft Security Essentials: (អាមេរិក)

កម្មវិធី​នេះ​សម្រិតសម្រាំង​ឡើង​ដោយ​ក្រុមហ៊ុន Microsoft ហើយ​ដាក់​ឱ្យ​ប្រើប្រាស់​ឥត​គិត​ថ្លៃ។ ដំណើរការ​បាន​ល្អ​ក្នុង​ការ​សម្អាត​មេរោគ​ទាំង​នៅ​លើ​កុំព្យូទ័រ​ឯកជន និង​ប្រភេទ​អាជីវកម្ម​តូច​ធំ។​ សរុប​មក​គេ​នៅ​តែ​ទទួល​ស្គាល់ ថា​វា​ធ្វើ​ការ​បាន​ល្អ​មិន​ចាញ់​ប្រភេទ​កម្មវិធី​ដាក់​លក់​ផ្សេង​ទៀត​នោះ​ទេ។

៤.AVG:( ឆេក)​

បង្កើត​ឡើង​ដោយ​ក្រុមហ៊ុន​របស់​សាធារណៈ​រដ្ឋ​ឆែក អាច​ប្រើប្រាស់​បាន​ទាំង​នៅ​លើ​ប្រព័ន្ធ Windows, Mac OS, និង Android (ទូរសព្ទ)។ ភាគច្រើន​គេ​ប្រើ​វា​សម្រាប់​កុំព្យូទ័រ​មាន​ម៉ាស៊ីន​តូច ព្រោះ​ទំហំ​ផ្ទុក​មិន​ស៊ី​ធំ​ដូច​កម្មវិធី​ដទៃ។

៥.ESET:(ស្លូវាគី)

បង្កើត​ឡើង​ដោយ​ក្រុមហ៊ុន​របស់​ប្រទេស​ស្លូវ៉ាគីនា​ឆ្នាំ ១៩៩២។ កម្មវិធី​មួយ​នេះ គឺ​ដំណើរការ​បាន​លឿន​បំផុត ហើយ​មិន​មាន​បញ្ហា​ដល់​ល្បឿន​ម៉ាស៊ីន​នោះ​ទេ។ ESET ផ្តល់​កំណែ​អាប់ដែត​ថ្មីៗ ជា​រឿយៗ ក្នុង​កិច្ច​ការពារ​ប្រព័ន្ធ​កុំព្យូទ័រ​របស់​អ្នក​ឱ្យ​បាន​កាន់​តែ​ប្រសើរ។​ អ្នក​ប្រើ​ភាគ​ច្រើន​ផ្ដល់​មតិ​ថា​វា​ងាយ​ស្រួល​ប្រើប្រាស់។

៦.McAfee: (អាមេរិក)

បង្កើត​ឡើង​ដោយ​ក្រុមហ៊ុន​របស់​សហរដ្ឋអាមេរិក ដែល​ជាប់​ជា​កំពូល​កម្មវិធី​កម្ចាត់​មេរោគ​ដ៏​ល្បីល្បាញ​មួយ។​ ជា​កម្មវិធី​ដាក់​លក់ មិន​មែន Free នោះ​ទេ ប៉ុន្តែ​មុខងារ​ពិសេសៗ​របស់​វា មាន​ដូច​ជា​ការ​ប្រាប់​ឱ្យ​ដឹង​ជា​មុន​ នៃ​គេហទំព័រ​ណា​ដែល​ត្រៀម​ចម្លង​មេរោគ​ចូល​មក​កុំព្យូទ័រ។

៧.Avast: (ឆេក)

បង្កើត​ឡើង​ដោយ​ក្រុមហ៊ុន​របស់​សាធារណរដ្ឋ​ឆែក ដែល​ដាក់​ឱ្យ​ទាញ​យក​ឥត​គិត​ថ្លៃ ហើយ​អាច​កម្ចាត់​មេរោគ​លើ​កុំព្យូទ័រ​បាន​ប្រមាណ ៩៨ ភាគរយ។​ ដំណើរការ​ទាំង​នៅ​លើ​ប្រព័ន្ធ Windows, iOS និង Android។ វា​មិន​ស៊ី​អង្គ​ផ្ទុក​ចងចាំ​ម៉ាស៊ីន​ធំ​នោះ​ទេ។
​
៨.BitDefender:(​រ៉ូម៉ានី)

បង្កើត​ឡើង​ដោយ​ក្រុមហ៊ុន​របស់​ប្រទេស​រ៉ូម៉ានី ដោយ​មាន​បើក​ឱ្យ​ទាញ​យក​ទាំង​ប្រភេទ​ឥត​គិត​ថ្លៃ និង​ដាក់​លក់។ សម្រាប់​ប្រភេទ​កម្មវិធី Free អាច​ធ្វើ​បាន​តែ​ត្រឹម​មុខងារ​ស្កេន​ធម្មតា​ប៉ុណ្ណោះ ខុស​ពី​ប្រភេទ​ដាក់​លក់ ដែល​មាន​មុខងារ​ច្រើន​លើស​ពី​នោះ។ ដំណើរការ​ទាំង​នៅ​លើ​ប្រព័ន្ធ Windows និង Mac។

៩.Panda Security: (អេស្ប៉ាញ)

បង្កើត​ឡើង​ដោយ​ក្រុមហ៊ុន​ប្រទេស​អេស្ប៉ាញ អំឡុង​ឆ្នាំ ១៩៩០។ កម្មវិធី​នេះ អាច​ធ្វើ​ការ​ការពារ​នូវ​ប្រព័ន្ធ​កុំព្យូទ័រ​របស់​អ្នក និង​ Email ឱ្យ​មាន​សុវត្ថិភាព។​​ ទៀត​សោត​ករណី​បើ​អ្នក​មាន​បញ្ហា​ទាក់ទង​នឹង​កម្មវិធី​នោះ អ្នក​អាច​ទំនាក់ទំនង​ទៅ​ក្រុមការងារ​រង់ចាំ​បម្រើ​អតិថិជន​របស់​ពួក​គេ​ ដើម្បី​ជួយ​រក​ដំណោះស្រាយ។

១០.Avira: (អាល្លឺម៉ង់)

បង្កើត​ឡើង​ដោយ​ក្រុមហ៊ុន​ប្រទេស​អាល្លឺម៉ង់ មាន​មុខងារ​ពិសេស​កម្ចាត់​មេរោគ​ពី​ការ​ចម្លង​ចេញ​នៃ​គេហទំព័រ។ អាច​ប្រើប្រាស់​វា​ជាមួយ​នឹង​ការ​អាប់ដែត​រហ័ស បន្ថែម​នឹង​ភាព​ងាយស្រួល​នៃ​ការ​ដំឡើង។​